Айкеԯӑт - Новости

Вәщ тыӆӑщ 28-мит хӑтӆӑн Ёмвошн «Музей геологии, нефти и газа» хуща нәмӑӆмӑты ӑктупсы вәс. Щи хӑтӆӑн 95 оӆа йис, хән питы вуй кӑншты хә Фарман Курбанович Салманов сєма питӑс. Ӆўв мєт оӆӑӊ пўш тӑм мўвн питы вуй вәйтӑс.

Мўвтєӆ шуши мир хӑтӆ постӑты пурайн округев ӆу­ваттыйн «Югра. Коренные народы Севера: фотохроника ТАСС» нємпи хурӑӊ ванӆтуп­сы пўншсы. Щи хурӑт пєӆы ванттыйн нюр Советский Союз пурая питӆӑн. Ёмвошн ванӆтупсы пўн­шумн щив кәща ёх, оса тӑхет хуятӑт, шу­ши мир, вошӑӊ хӑннєхуятӑт юхӑтсӑт.

Увӑс мўв, Сибирь, Дальний Восток мирӑт Ассоциация кә­ща хә, Федерация Советн сенатор хуят Александр Новьюхов вўща вєрман лупӑс:

Округев дума хот депутатӑт мєвӆ хӑры вўш эвӑӆт ма нынана Мўвтєӆ мирӑт шуши ёхӆўв-нєӊӆўв мӑӊхӑтӆ пӑта м вўща ясӑӊ китӆум! Ӆӑӊхаӆум лупты, тӑмӑщ хӑтӆ нємасыя кәщайтн ӆэщӑтсы, ӆәӆн кашӑӊ оӆ мсыева нәмӑӆмӑты, муй арат унтас арсыр шуши мир хәйт-нєӊӑт сыр-сыр вән мирӑт культурая па ӆыв тӑм йисэӆн вәӆты-хоӆты щирӑта тәсӑт.
Щи тумпийн тӑмхӑтӆ вән мирӑт тўӊщирӑӊа ат нәмӑсӆӑт, муй щирн па хуты тӑм юхи хӑщум пурайтн арсыр ай шуши мирӑт хӑннєхуята нётты вєритӆӑт.

Сўмӑтвош па Нуви сӑӊхум районӊӑн «Арктическая зона» тӑхия питсӑӊӑн. Вәйт лор тылӑщ 3-7 мит хӑтӆӑтн Нуви сӑӊхум районăн «Айӆат ёх па няврємӑт» нємпи вєр вәс. Щит мўвтєӆ мир арктической корпус волонтёрской экспедиция, Россия мўв эвӑӆт яӊ хӑннєхә па ихущьяӊ хуят па мўвӑт эвӑӆт юхӑтсӑт. 

Вәщ тыӆӑщ 7-мит хӑтӆӑн «Югра-Классик» тӑхи хуща мӑӊхӑтӆ щира ӑкмум вәйтан­тупсы вәс. Щит округ хуща мєт оӆӑӊа вєрум «Новости Югры» газета 95 оӆа йис. Щи хӑтӆ иха ӑктӑщсӑт: айкеӆӑт ӑкӑтты па хӑншты вәна вум ёх, тӑмхӑтӆ щи щира рәпитты хуятӑт, округ кәща ёхӆўв, арсыр мирев пиӆа рәпитты хуятӆўв, тӑм газета ӆўӊӑтты хӑн­нєхәйӆўв, щи хуятӑт, мӑта ёх оӆӑӊ газета хуща хӑншман вәс па газета пиӆа ӆәхӑс щира вәӆты ар мирев.

А.И. Герцен нємпи Российской педаго­гической университет Увӑс мир институт кәща нє Софья Урун «Говорит учёный» хӑншум нєпекӑӆ хущи путӑртӑс, муй щирн увӑс мирӑта ӆыв путӑртты ясӑӊӆаӆ ӆавӑӆ­ман тӑйты. Тӑта мосӆ нємасыя касӑӆман вәӆты ӑшколайт па малокомплектной ӑшколайт кєши учителят вәнӆтӑты.

Мосӆ увӑс мир вәӆ­ты пищӑт оӆӑӊӑн научной исследованияйт вєрты.

2026-мит оӆн А.И. Герцен нємпи университет тӑм оӆ Увӑс мўв пӑта 60 вәнӆтӑты хуят єсӑӆ. Ӆыв Увӑс мўв ӑшколайт хущи няврємӑт рәт ясӊӑта, литературая, культура вєрӑта вәнӆтӑты питӆӑт. Щи оӆӑӊӑн университет ректор хә Сергей Тарасов лупӑс.

 Увӑс мўв пӑта учите­лят ӆэщӑтты вєр, щит мєт вуӆаӊ па мосты вєра вәӆ. Мўӊ щимӑщ хуятӑт ӆэщӑтӆўв, мӑта ёх увӑс мўв ӑшколайт хущи рә­пит­ты питӆӑт. Ӆыв шуши мир вәӆупсы па тӑм йис вєрӑт иха кӑрӑтты пит­ӆӑт, – лупӑс кәща хә. 

Ёмвошн вәщ тыӆӑщ 20-мит хӑтӆӑн РИЦ «Югра» хущи вәйтантупсы вәс.

Югра хуща государстваев нётупсы вўты пӑта мирева арсыр нєпекӑт вєрӆайт. Тӑмӑщ многофункциональной центр мухты щи нєпекӑт сора ёх вўша юхӑтӆӑт. 

Мирева ӑн мосӆ нєпекӑт ӑкӑтман ар тӑхетн ӊхты. Центр хуща рәпитты ёхӆӑнӑн имухты мосты нєпекӑт похӆа ӑкӑтӆайт. Югра кәща ёхӆўв нєпекӑт пох­ӆа ӑкӑтты нётупсэт тӑм оӆ па арашӑк вєрсайт. Ин центр хуща 128 государ­ст­венной нётупсы пӑта нєпекӑт ӑкӑтты пищ вәӆ.

Тӑм оӆ мўвев питы вуй эвӑӆт вєрум йиӊкӑт па мўвев тӑйты лавӊӑт Югра хуща вәӆты ай вошӑта сырышӑк тәсыйт. Муйкєм постыйӆса 2026-мит оӆн тәты, щи арат щи тәсы.