№ 15 (3531) - 2019

Вәйт ӆор тыӆӑщ 7-митн «Югра» нємпи ай­кеӆӑт ӑкӑтты хотн округ мир мӑӆты вєр тәты департамент кәща хә Алексей Добровольский пиӆа вәйтантупсы вәс. Ӆўв айкеӆ тәс, хутыса ок­ругев ӆуваттыйн мир мӑӆты вєр ӆэщӑтман вәӆ.

Россия мўвевн «Мир мӑӆты вєр» нємпи нац­проект хўват нивӑӆ вән вєр ӆэщӑтӆы. Щи эвӑӆт мўӊ округевн ӆапӑт вєр тәӆы — щит мир ма-тәса мӑӆты вєр; сӑм, пўвӆупсы мәшӑт тӑйты ёха тӑм йис щўӊкӑтн ма лекщитты; няврємӑт мӑӆты вєр. Щи тумпи айӆат тохтурӑт вәнӆтӑ­ты, тӑм йис щирн ин­тернет хўват мир лек­щитты па па вєрӑт.

Тӑм йисн юӆн ай тёпиет пиӆа хәӆум оӆ вўш вәнта омӑсты нєӊӑт вәнӆтыйӆты вєритӆӑт. Ван­тэ, ай няврємиет пиӆа вулкємӑты хәӆум оӆ мӑр арсыр йиӆуп па ищи кємн ушӑӊа-сащӑӊа мӑн­ты рәпатайт тывӆӑт. Щитӑт пиӆа рәпитты итәх нєӊӑта шєӊк ӆавӑрта йиӆ. Хӑщум оӆӑтн арсыр рәпата вєрӑт йиӆпатӆыйт. Щит пӑта кашӑӊ ай муй вән вєр мсыева ӆэщӑтты пӑта хӑннєхәя пура-пурайн вәнӆтыйӆты мосӆ.

Казамкинӑт хоттєӆ ёх Россия мўвтєӆ «Кәртӑӊ хоттєӆ ёх» нємпи кӑсупсыйн нух питсӑт.

Яӊ муӆтас оӆ «Торум Маа» тӑхи ёх «Хоттєӆ ёх вәӆупсы рәт мўвев вәӆупсыйн» нємпи вєр тәӆӑт, хута шуши мир рәтӑт нух хӑншӆыйт па ванӆтӑӆыйт. 

Вәйт ӆор тыӆӑщ кимит хӑтӑӆн Югра мўв кәща нє Наталья Комарова ӆӑӊкӑр ёхӆаӆ пиӆа мирхот вєрӑс, хута лыпӑт хойты тыӆӑщ нивӑӆмит хӑ­тӑӆн кәща ёх па депутатӑт пириты вєрӑт оӆӑӊӑн путӑртӑс.

Сырыя ӆўв лупӑс, муй щирн кашӑӊ сўс ок­ругев ӆуваттыйн де­путатӑт Дума хота муй арсыр районӑт хў­ват­тыйн вәӆты Дума тӑ­хета муй па ӑӆ кәртӑӊ кәщаита пириӆыйт. Ӆўв ясӑӊӆаӆ щирн, тӑм кўтн 29 районӑтн рәпитты депутӑт ёх па вет кәща хә 11 муниципальной тӑхета ин йиӆпа пири­ты мосмитӆ. Вантэ, вәщ тыӆӑщ 24-мит хӑтӑӆн веӆщи ӆыв нємӑӊ нє­пекӆаӆ иха ӑкӑтты вє­рӑт етшуптӑсыйт.

Ёмвошн вўнш тыӆӑщ 27-мит хӑтӑӆн нацио­нальной проектӑт еӆӆы тәты вєр әхтыйн вән мирхот вәс. Тыв Югра мўв вошӑт, районӑт эвӑӆт кәщайт, щурӑсӆӑты ёх, культура вєрӑт тәты тӑ­хетн капӑртты хуятӑт, мир мӑӆтӑты хӑннє­хәйт, оса нўшайт тўӊматты каркам имет па икет, ӑктӑщийӆсӑт.

Тӑта мосванӑн окру­гев правительства хот йитн видеоконферен­ция щирн Югра мўвев вән вошӑт па районӑт ӆуваттыйн хўӆ веӆты вєрӑт артаӆӑты кәщайт мирхот вєрсӑт. Ӆыв луп­сӑт, муй щирн тӑм йисн арсыр хўӆ веӆпӑсӆӑты щирӑт округевн мӑн­ӆӑт па муйсӑр йиӆўп поступсэт щи вєр оӆӑ­ӊӑн Россия хон пєлӑкн ӆэщӑтсыйт.

Тӑм ванӑн Ёмвошн киникайт ӆўӊӑтты хотн Алла Иштимирова-Посохова йиӆуп хурӑӊ ванӆ­тупсы ӆэщӑтӑс. Щӑта Ай Юхан хонӑӊӑн вәӆ­ты хӑнтэт хурӑт вәсӑт.

Мўӊ газетаева ванкўтӆы мир пищма хӑнш­ӆӑт. Ин Урай вош эвӑӆт нєпек юхтӑс. Вуӆаӊ ӆаӆьн вәӆум хӑннєхуятӑт оӆӑӊӑн путӑр «Совет ветеранов» нємуп тӑхийн рәпитты ёх китсӑт. Мўӊ тӑм вўш эвӑӆт «Хӑнты ясӑӊ» нєпекев хущи щи пищмайт хӑншты питӆўв.

Конда ёхмӑӊ, ӆорӑӊ хурамӑӊ мўв. Тӑта хўв йистєӆн вухаӆь мир ӆовӑт ӆавӑӆман, сыр-сыр єпӆӑӊ ӆєтутӑт мўвн єнмӑӆман вәсӑт. Ӆыв вәншєӊ хӑр вәнтӑтн тулхӑт, арсыр вонь­щу­мутӑт ӑктыйӆсӑт. Вой-хўӆ веӆпӑсӆӑсӑт. Хўв йисн Конда мўв мух­ты тынєсты ӛш Ирбит, Свердловск вошӊӑ­на вәс. 

Йистєӆн хӑнтэт Увӑс мўвн хўӆ, вой веӆпӑсӆу­ман, вўӆы тащ ӆавӑӆман вәсӑт. Щи рәпатайт кєнӑт хән? Мирэв щи ӆавӑрт рәпатайт тўвман ванкўтӆы мәшитсӑт, тәп иса пурайн хоттєӆ ёх кўтн ёшн муй так ясӊӑт лупты хуятӑт вәсӑт, ӆыв лекщит­ты хошсӑт.

И щимӑщ ими оӆӑ­ӊӑн тӑмхӑтӆ хӑнш­ты ӆӑӊхаӆум. Щит хӑнты ими Федосья Васильев­на Валей. Вәйт ӆор ты­ӆӑщ 15-митн ӆўв 80 оӆа йис. Вәӆупсэӆ мӑр мир лекщитман вәс, щи ӆа­вӑрт рәпатайӆ мосман тӑйсӑӆэ. Хӑннєхә ма йиӆ ки, ӆўвеӆа амӑт.

Вәйт ӆор тыӆӑщ 9-мит хӑтӆӑн «Торум Маа» нємпи катра пурмӑсӑт ӆавӑӆты тӑхийн «Ма ай ми­рим» нємпи мӑӊ­хӑтӆ вәс. Щит, вантэ, Мўвтєӆ шуши мир хӑтӆа ӆэщӑтсы, мӑта ут 25 оӆ юхӆы ООН тӑхи ёх нємасыя пос­тупсыйн хӑншсӑт. Щи пура вўш эвӑӆт иса мўв хўваттыйн арсыр мирӑт щи хӑтӆ постӑӆӑт.
 

Мӑнум оӆн ма Сӑран мўва ӊхсум. Щи пурайн Ыб вош оӆӑӊӑн уша павӑтсум, щӑта рәпата щирн вәсум. Ин щи мӑӊ кәрт оӆӑӊӑн хӑншты ӆӑӊхаӆум.

Хӑнты мир эвӑӆт вәӆум хўр хӑншты хә Митрофан Алексеевич Тебетев шәӊӑт вәйт ӆор тыӆӑщ 8-мит хӑтӆӑн 95 оӆа ӆәӆн йис. Тӑм вуӆаӊ хә 1924-мит оӆн Манстӑр районӑн Лохтоткәр­тӑн сєма питӑс. Ӑӊкеӆ-ащеӆ Арина Фёдоровна па Алексей Михайлович Тебетевӊӑн Холопанты кәрт эвӑӆт вәсӊӑн.

Вәщ тыӆӑщ 18-21-мит хӑтӆӑтн Нуви сӑӊхум вош районӑн Паштӑр кәрта мойӊ ёх юхтыйӆсӑт. Ӆыв щӑта «Тәрум тўт» нємпи мӑӊхӑтӆ вєрӑнтсӑт. Щи вєр «Малая культурная мозаика Белоярского района» кӑсупсыйн нух питӑс. «Тәрум тўт» вєр әхтыйн кәща нєӊа «Россия народной мастер» нєм тӑйты нє Ирина Фирсова вәӆ.

Лыпӑт тыӆӑщн Муши вошн Ӆорвош район культура па айӆат ёх вєрӑт ӆэщӑтты тӑхи кәща нє Марина Викторовна Мартишина эвӑӆт арсыр  айкеӆӑт ӆўв рәпатайӆ оӆӑӊӑн уша павӑтсум. 

Кәща нє лупӑс, ху­ты тӑм тӑхийн ӆўв тәп оӆ муӆтас рәпитӆ. Сырыя ищи Югра мўв округев хущи арсыр культура вєрӑт әхтыйн 25 оӆ мӑр рәпитман вәс. Ӛхӑт па Ӆорвош район кәщаитн вохсы па ин ­тӑм йиӆуп тӑхийн рә­­па­та ӆўвеӆа мущатӑс.

Ёмвошн арӑӊ, моньщӑӊ хӑнты ими Ульяна Ни­колаевна Шульгина (Рандымова) вәӆ. Ӆўв Касум мўвн єнмӑс. Ар оӆ мӑр няврємӑт ёнтӑсты, сӑк кӑрӑтты вәнӆтуман рәпитӑс. Ульяна Николаевна — йинтпӑӊ ими, ар хӑннєхә ӆўв ёнтум рнасӆаӆн, щӑшкан сӑхӆаӆн шәшиӆӑӆӑт. Тӑм ванӑн «Хӑнты ясӑӊ» газетая ӆўв вєрум арӆӑӆ тәсӆэ.

Пєтра

Пєтра, Пєтра, Пєтра, Пєтӑр.
Оӆӑӊ хон воша ӊхум хәен,
Аӆ Тәпӑл воша ӊхум хәен.
Пєтра, Пєтра, Пєтра, Пєтӑр.

Ӑӊки – Мама 
Ащи – папа 
Пух – сын 
Эви – дочь 
Упи – сестра
Яй – брат 
Апалнє – сестрёнка
Апщи – братишка 
Вән упи – старшая сестра 
Вән яй – старший брат 
Ай эви – младшая дочь
Ай пух – младший сын 
Аӊкаӊки – бабушка по материнской линии
Аӊщащи – дедушка по материнской линии 
Щащи – бабушка по отцовской линии
Щатьщащи – дедушка по отцовской линии
Хиӆы – внук 
Хиӆнє – внучка
 

Хӑнты мир учёной ики Тимофей Молданов оӆӑӊ стихӆаӆ 1990-мит оӆӑтн хӑншсӑӆэ. Ин ӆўв вєрум йиӆуп арӆаӆа мўӊ амтӑтьӆяӆўв.

Ар йиӊк ӊхтэн кўтӑн, нӑӊ,
Ар мўв ӊхтэн кўтӑн,
Вормум мўвен ма нәмэ!
Єнмум мўвен ма нәмэ! 

Тӑӆ хӑтӆ вәӆтаӆ ӆўв,
Тӑӆэн щира, нӑӊ, па шәша, 
Ӆўӊ хӑтӆ ки, вєртаӆ йина,
Хӑтӆэн пєӆа ванта, нӑӊ!