Айкеԯӑт - Новости

Тӑта мосванӑн Ас потты тыӆӑщ 30-мит хӑтӑӆн Ёмвошн округев арсыр кәщайт нємасыя мирхот вєрсӑт. Щитэӆ мӑнум пурайн ӆыв вантсӑт па тўӊщирӑӊа артаӆӑсӑт, муй щирн 2023-мит оӆн Югра правительства хот хуща мєт мосты рәпатайт ӆэщӑтсыйт. Щи тумпийн лупсӑт, муйсӑр вєрӑт оӆӑӊӑн округ кәщаев Наталья Комарова ӑӆ хӑннєхуятӑт еӆпийн тӑм пўш вєрум ясӊӑӆн сыр-сыр айкеӆӑт ӆэщӑтӑс. 

Ас потты тыӆӑщ 21-мит хӑтӑӆн «Югра-Классик» нємуп хотн Ёмвошн Мўвтєӆ мирӑт мўвӑт-йиӊкӑт ӆавӑӆты «Спасти и сохранить» нємуп XX-мит вєр лӑп тәхӑрсы.  Округ арсыр кәщайт путӑртсӑт, хуты 20 оӆ мӑр рәпитсӑт, щӑӆта сыр-сыр ванӆтупсэтн муй кӑсупсэтн нух питум хәйт  па нєӊӑт Г.Ф. Бухтин нємуп вухӑӊ мойӆупсыйн кантсыйт.

Мєт оӆӑӊ ясӑӊ тӑм вән етнхотн округ кәща ӆӑӊкӑр нєӊа па «Спасти и сохранить» мўвӑт-йиӊкӑт ӆавӑӆты вєрӑт кәщая Ольга Литовая мӑсы. И­ха ӑктӑщум хӑннєхуятӑт еӆпийн ӆўв лупӑс: 

Ёмвошн Ас потты тыӆӑщн 10-11-мит хӑтӆӊӑнӑн «ЮграТур 2023» ванӆтупсы вәс. Щит «Югра-Экспо» хуща пўншса. Тӑмӑщ вєр Югра кәща ёх ӆэщӑтсӑт.

Ванӆтупсы кӑт нумӑс щирн вєрум ут. И ну­мӑс – щит муй вўрн па мўв ёх мўӊ мўвев вантты пӑта тыв хущты, кимӑт нумӑс – муй вўрн мўӊ мўв мирев па мўвӑт вантты хущты. Тӑмӑщ ванӆтупсы хўв мӑр эвӑӆт кашӑӊ оӆ мўӊ мўвевн вєрӑнтӆа, тыв сыр-сыр Россия мўв сўӊӑт эвӑӆт арсыр мир ӑктӑщӆӑт. 

Тӑм оӆ па хон пєлӑк мўвӑт хуща вәӆты ёх тыв юхтыйӆсӑт, щит Чехия, Болгария, Словакия па Китай мўвӑт эвӑӆт.

И.Ф. Пермяков нємпи Поӆнавӑт кәртӑӊ ӑш­кола вәнӆтӑты ёх па няврємӑт «Вўт ӑшколаен оӆӑӊӑн путӑрта!» нємпи Россия мўвтєӆ мир кӑсупсыйн кӑссӑт. 

Ёмвошн Ас потты тыӆӑщн 17-мит хӑтӆӑн «Центр молодёжных проектов» хуща ӑктупсы вәс. Щи ӑктупсы «Гражданские инициативы регионов 60-й параллели» вән мирхот пурайн ӆэщӑтса. Увӑс мир некоммерческой организацияйт ёх вәнӆтыйӆты хӑр хуща путӑртса, муй вўрн «Организация Объединенных Наций» (ООН) хуща экономической па социальной сове­та консультативный статус ёша павӑтты пӑта вохты нєпек хӑншты.

Тăм ванăн округ мир мӑӆты вєр тәты департамент кәща хә Алексей Добровольский пиӆа онлайн хўват вәйтантупсы вәс. Ӆўв айкеӆ тәс, хутыса округев ӆуваттыйн тăм оӆн мир мӑӆты вєр ӆэщӑтсы. Щи тумпийн кашăӊ хăннєхә вєритăс сыр-сыр нўшайт оӆăӊăн иньщăсты.

Щиты кәща хәев лу­пăс, тăм оӆ Россия мўв ӆуваттыйн Югра мўв пушхие сєма питты вєрн нивăӆмит тăхия питӆ, хăннєхә сурма йиты вєрн ветмит тăхийн. Яӊ тыӆăщ мăр Югра мўвн 15411 щурăс тёпие сєма питăс. Ӆыв эвăӆтэӆа 7891 – пухие па 7520 – эвие, 148 – нёмăсӊăн пушхие па 5 – имухты хәӆум няврє­мие питăс.

Нємуӆты вән мӑӊхӑтӆ ӑн пориӆӑсы муй вән кәщайт ӑн па юх­тыйӆсӑт, нємуӆты пурайн айкеӆӑт ӆэщӑтты газетайн щи вєр оӆӑӊӑн ӑн хӑншсы. Тәп Югра мўвевн Сәрханӆ вош травмбольница хотн рәпитты тохтурӑт хӑщум оӆн арсыр ӆавӑртӑӊ вєрӑт лекщиттэӆ пийн нємасыя щимӑщ тӑхи ӆыв хущеӆа пўншсӑт, хута хӑннєхә сыр-сыр мәш мӑӆты вєритӆ.

Тӑта мосванӑн Сәрханӆ вош пәӆьница хотн и 59 оӆа вум нєӊа вевтам мезотелиома нємуп хун мәш, мӑта ут ӑтмащ иса нухӆы пєӆы пўвӆӑс, тохтурӑтн мсыева артаӆӑсы па нух эвӑтсы. Щи операция шєӊк ӆавӑртӑӊа абдоминальной хирургия щирн тӑм йисн ӆўӊӑтӆы.

Щи пӑта хӑннєхә хун хуща нух пўв­ӆум тӑхи пиӆа тохтурӑт араттєӆн хәт муӆтаскєм щос арат вулкємӑсӑт па ищи­па тәса па мсыева щи­тэӆ айӆтыева нух эвӑтсӑт.

Тӑта мосванӑн Ёмвошн Ас потты тыӆӑщ оӆӑӊ хӑтӑӆн «Югра» нємуп айкеӆӑт ӑкӑтты тӑхийн «Центр профессиональной патологии» тӑхи вән тохтур хә Николай Ташланов пиӆа вәйтантупсы вәс. 

Ёмвошн Ас потты тыӆӑщ кимитмит хӑтӆӑн «Югра» нємпи айкеӆӑт ӑкӑтты тӑхийн Игорь Бозов пиӆа вәйтантупсы вәс. Ӆўв Югра хуща Россия МЧС надзорной па профилактической вєрӑт тәты тӑхи кәща ӆӑӊкӑр хәя вәӆ. Ӆўв путӑртӑс, муй вўрн тӑӆ тәрумн вәӆты, муйсӑр вєрӑт вєрты, муй щира ӆавӆӑсман вәӆты шәкӑӊ тўтӑт сурта ӑн хойты пӑта. Игорь Валерьевич лупӑс: