Шуши мирев культура - Культура обско-угорских народов

Александра Тарлина Ас-угорской институтн рәпитӆ, ӆўв Югорской государственной университет «Филология» нємуп щирн етшуптӑс. Ӆўв увӑс мир пиӆа иса пўш рәпитӆ, хӑнты ясӑӊ вәнӆтӑӆ па хӑнты ясӑӊ пиӆа рәпитӆ.

Ёмвошн лыпӑт хойты тыӆӑщ 6-20-мит хӑтӆӑтн «Галерея-мастерская художника Г.С. Райшева» хотн тӑм йис щирн хур хӑншты вєрӑт ванӆтӑты пӑта «Югорский авангард» нємуп ӑктупсы вәс. Тӑмӑщ «В со-творчестве с Райшевым» вєр хур хӑншты хӑннєхә Геннадий Степанович Райшев шәӊӑт 90 оӆа вмаӆ пӑта ӆэщӑтса.

Мегион вошн «Хӑтӆые» нємуп ӑктупсы пурайн «Экоцентр» хуща вәйт ӆор тыӆӑщ 23-мит хӑтӆӑн «Ӆємаӊ юхан, ма вәӆупсєм» ванӆтупсы пўншса. Тӑм ванӆтупсы пурмӑсӑт Ёмвош «Торум Маа» музей эвӑӆт тәсыйт. Щӑта ӆыв «История семьи в истории страны. След прожитой жизни» вән вєр тӑйӆӑт. Тӑм пўш щи ванӆтупсы Аграфена Семёновна Сопочина (Песикова) па ӆўв рәт ёхӆаӆ пӑта вєрса. 

Тӑм хӑннєхә – хӑнты мир филолог, линг­вист, сәрханӆ хӑнтэт ясӑӊӑн киникайт хӑншты ими, щи кўтн киника тӑйӆ, муй вўрн щи хӑнты ясӑӊ­ӑн пу­тӑрт­ты. 

Ёмвошн лыпӑт хойты тыӆӑщ 16-мит хӑтӆӑн «Торум Маа» музей хуща мирхот пўншсы. Щит хӑнты, вухаӆь па юрн мирӆўв йис вєрӑт, йис пурмӑсӑт вєрты пӑта. Тӑм пўш ӑктупсы рўщ ясӑӊӑн нємӆ «Традиционные инструменты и материалы обских угров: виды, технологии и использование».

Ӑктупсы кӑт щира мӑнӆ. Мєт оӆӑӊӑн учёнойт па музейн рәпит­ты ёх тӑм вєрӑт оӆӑӊӑн пут­рӑт тӑйсӑт, щӑӆта па вєрӑӊ ёх рәпитты вўянт­сӑт, сыр-сыр пурмӑсӑт вєрты питсӑт.

«Койвонгун» нємпи община ёх хўӆ веӆ­пӑсӆуман, воньщумутӑт, турнӑт ӑкӑтман рәпитӆӑт. Ӆыв Сахалинской область Ты­мовской район Чир-Унвд кәртӑн вәӆӆӑт. Община кәщая Татьяна Александровна Шкалыгина вәӆ. Мин тӑм оӆн товийн Москва вошн «Увӑс мир тащӑт» ванӆтупсы пурайн вәтаӊа йисмӑн. Щӑта ӆўв турн шайт оӆӑӊӑн мойӊ ёха путӑртӑс.

Йис пурайн хӑнтэт па вухаӆь ёх тӑм увӑс мўвевн тӑйты сыр-сыр утӑт эвӑӆт мєт хурамӑӊ пурмӑсӑт вєрӑнтыйӆсӑт. Тунты эвӑӆт вєрӑнтты арсыр хушапӑт, сәнӑт, йиӊӆӑт кашӑӊ хӑнты мўвн, кашӑӊ вухаӆь мўвн иса пўш ар хураспет. Щимӑщ хурамӑӊ ар хурасуп пурмӑсӑт – щит мўӊ тӑм йис тащев. Щит пӑта щи вєрӑт әхтыйн рәпитты ёх щи йис вєрӑт еӆӆы тәты пӑта сӑмӆаӆ хошиӆӑт. И вєр м, увӑс мирев тӑм хурасуп хурамӑӊ пурмӑсӑт хуӆна хотӆаӆн шавиман тӑйӆэӆ, ин па йиӆпа єнумты айӆат ёха щи вєрӑта муӆты вўрн катӆуптӑты мосӆ.

Ямал мўвн «Почётный гражданин» нєм тӑйты ими, Россия мўвев «Союз журналистов» тӑхия ӆуӊум нє, хӑнты моньщӑт, йис путрӑт ӑкӑтты па хӑншты ими Зинаида Викторовна Лонгортова хӑнты ясӑӊӑн ар кина вєрӑс. Тӑм оӆ товийн Москва хон вошн «Сокровища Севера» ванӆтупсы пурайн «Ими Хиӆы» нємпи ӆўв вєрум кина мира ванӆтӑсы. 

- Щит няврємӑт пӑта вєрум документальной кина, – Зинаида Викто­ровна лупӆ. – Ма ар оӆ мӑр айкеӆӑт ӑкӑтман па ӆэщӑтман рәпитсум, 30-кєм кина вєрсум. Тӑмхӑтӆ няврємӑт пӑта вєрум кина хон вошн ванӆтӑӆум. Щит хӑнты мир йис путрӑт, моньщӑт хўват ӆэщӑтсум. 

Няврємӑт кәрт – щит тӑм йисн няврємӑт пӑта вєрум тӑхи, щӑта ӆыв вәнт мўвн вәӆӆӑт па йис ёх вєрӑт уша вєрӆат. Ар оӆ кўш мӑнӑс, ищимурт тӑмӑщ няврємӑт кәртӑт хуӆна еӆӆы вәӆӆӑт.

30 оӆ тўмпийн Ясунт вош хонӑӊӑн тӑмӑщ пар­щин хотӑӊ кәрт тывӑс. Мєт оӆӑӊ няврємӑт – щит Саранпауль эвӑӆт юхтум вухаӆь пушхиет. Оӆӑӊ кәща ими тӑм хӑтӆ вәнта кәщая вәӆ, щит Любовь Павловна Стаканова. Йистєӆн Ясунт кәрт ӆавӑӆты ӆәӊх вурщӑк хурн вәӆ, щит пӑта ӆўв щи няврємӑт ӆавӑӆты ӆәӊха йис, ӆўв канӑӆа щирн вот сух ёнтса.

Ёмвошн «Торум Маа» этнографической музей хуща вәйт ӆор тыӆӑщн 2-мит хӑтӆӑн хур хӑншты хә ванӆтупсы пўншса, щит хӑнты хуят Митрофан Алексеевич Тебетев. Тӑм оӆн ӆўв сєма питум хӑтӆӑӆ эвӑӆт сот оӆ мӑнӑс. Щи киньща па и тӑм тыӆӑщн 8-мит хӑтӆӑн ӆўв нємӑсыя сєма питум хӑт­ӆӑӆн тӑта мӑӊхӑтӆ вєрӑнтса.

Вән кєр тыӆӑщ 12-мит хӑтӑӆн Сәрханӆ вошн шуши мирӑт тӑхийн иха ӑктӑщум хӑнтэт па вухаӆят «Вурӊа хӑтӆ» порыӆӑсӑт. Ищи хӑтӑӆн аӆаӊ вўш эвӑӆт ма нємасыя Сәрханӆ вошӑӊ айӆат ёх библиотека хота ӊхсум, хута ӑшкола арсыр айшӑк классӑтн вәнӆтыйӆты ай няврємӑт пиӆа хӑнты мирев хурасӑӊ моньщӑт моньщсум па әмӑщ путрӑт мўӊ вәӆупсы щирӆўв оӆӑӊӑн ӆывеӆа тәсум.