Шуши мирев культура - Культура обско-угорских народов

Унъюган нєпум ай вошн Манстӑр район Ёмвош округ хуща лыпӑт тыӆӑщ 26-28-мит хӑтӆӑтн «III Айпинские чтения» нємпи мирхот вәс, мӑта тӑхийн карты щўӊкӑт мухты па хон пєлӑк ёх ищи путӑр тӑйсӑт. Тӑм оӆн конференция Еремей Данилович Айпин 75 оӆа вмаӆ пӑта вєрса.

Ӆўв хӑнты хӑншты хӑннєхә. Еремей Айпин государства па мир пӑта рәпитты поли­тической деятель, «Союз писателей» тӑхия ӆуӊман вәӆ, политической наукайт кандидат, «Заслуженный деятель культуры Ханты-Мансийского автономного округа-Югры» нєм па тӑйӆ. 

Кашӑӊ оӆ лыпӑт тыӆӑщ 22-мит хӑтӆӑн Ём­вошн «Торум Маа» музей хущи «…Когда заря с зарёю сходится» нємпи мирхот вєрӑнтӆы. Щит вухаӆь мир поэт Юван Николаевич Шеста­лов шәӊӑт нәмӑӆмӑты щира вєрӆы. 

Юван Николаевич 1937-мит оӆн лы­пӑт тыӆӑщ 22-мит хӑтӆӑн Сўмӑтвош район Камрадка вухаӆь кәртӑн сєма питӑс. Ӆўв айтєӆн ӆавӑрт ӆаӆь пура оӆӑӊӑн ар путӑр хә­ӆӑнтӑс, щирн айӆат пу­раеӆн ӆаӆь оӆӑӊӑн сти­хотворенияйт хӑншты питӑс. «Языческая поэма» киникайн ӆўв нух питум ёх оӆӑӊӑн ар, «Салют над Невой» стих хӑншӑс. 

Увӑс мўвевн вәӆты шуши мирӑт тунты эвӑӆт анӑт-сәнӑт, арсыр пурмӑсӑт вєрӑнтӆӑт. Ин вәнты вәӆты хотӑтн тунты ӆыв пӑтэӆа мєт м па мосты ута вәӆ. Сыры хӑнтэт па вухаӆят тунты эвӑӆт хопӑт вєрӑнтсӑт, ин вәнты юрн хотӑт па онтупӑт вєрӆӑт. Оӆӊӑӆн тунты йиӊки турна пуныйӆсӑт, щи эвӑӆт воньщупӑт, сәнӑт, онтупӑт вєрсӑт.

Хутыса тунты ӆэщӑтты мосӆ, хутыса хӑншет пунты, муй пӑта щимӑщ пурмӑс веккєши тӑйты мосӆ, щи оӆӑӊӑн вәнӆтӑты хӑр пурайн Россия мўвев народной мастер Ирина Кузьминична Фирсова путӑртӑс:

Лыпӑт тыӆӑщ 9-11-мит хӑтӆӑтн Ямал мўвн Пуӆӊавӑт вошн округ шуши мирӑт культура хотн мўвтєӆ мирӑт «Нӛрум мўв ӆыӆ» мӑӊхӑтӆ хуя­тӑт пориӆӑсӑт. 

Щимӑщ вєр пӑта Ле­нинградской об­ласть, Коми, Югра, Ямал мў­вӑт арсыр районӑт эвӑӆт шушия вәӆты хӑннєхуятӑт иха юхтыйӆсӑт. Ӆыв кў­тэӆн хуӆыева путрємӑсӑт, якты-ариты хотӑт вєрсӑт, тынєсты муй ӆәтӑсты хӑрӑт тәса ӆэщӑтсӑт, сыр-сыр кӑсупсэт ма ванӆтӑсӑт. Юхи хӑщум кўтн нух пи­тум хӑннєхуятӑт мой­ӆупсэтн катӆуптӑсыйт. 

Сәрханӆ вошн вән вош хӑрн лыпӑт тыӆӑщ 4-мит хӑтӆӑн 24-мит пўш «Соцветие» нємпи кашӑӊ оӆ вєрты сыр-сыр мирӑт йис вәӆупсы ванӆтӑты фестиваль вәс. Тӑм оӆ щи етн хот «Мы в вас берём своё начало» нєм тӑйс, щит няврєм па айӆат ёх вәнӆтӑты ёх пӑта вєрум вәйтантупсы.

Ёмвош районӑн Ас нопӑтты тыӆӑщ 25-мит хӑтӆӑн кашӑӊ оӆ вєрты «Сад памяти» нємпи акция вәс. Тӑмӑщ вєр мўв иӆпи тащ вўты па мўвӑт-автӑт ӆавӑӆты вєрӑт тәты департамент ёх ӆэщӑтсӑт. Ӆывеӆа лесной хозяйства Федеральной агентства па «Министерство природных ресурсов» тӑхеӊӑн ёх нётсӑт. 

Ёмвошн «Торум Маа» музей хуща ка­шӑӊ оӆ лыпӑт тыӆӑщ оӆӑӊ хӑтӆӑн «Вур­щăк хӑтӆ» вєрӑнтӆа. Лыпӑт тыӆщен оӆӑӊ хӑтӆӑӆ – щит мўвев ӆуваттыйн няврємӑт ӆавӑӆты мӑӊхӑтӆа вєрман вәӆ. 
 
Вурщăк ай тухӆӑӊ войе хӑнтэт па вухаӆь миревн вєра вана тӑйӆа. Йис ёх щирн, вурщӑк имие – щит йис тәты вой, ӆўв мәш сурт, тарнӑӊ вєрӑт сурт эвӑӆт хӑннєхә ӆавӑӆман тӑйӆӑӆэ. Щи пӑта увӑс хӑнтэт тӑм ай войе хур ӆӑӊкӑр хонӑӊа явӑтман тӑйсэӆ. Тӑм йисн вурщăк хӑнши тӑйӆўв, щи хӑнши  иса пўш няврєм онтупа па йиӊкӆӑта па арсыр тунты эвӑӆт вєрты пурмӑсӑта хӑншӆа. 

Вән кєр тыӆӑщн 25-мит хӑтӆ вўш эвӑӆт па 27-мит хӑтӆ вәнта Ёмвошн няврємӑт кўтн кӑсупсэт мӑ­нӑс. Щи кӑсупсы «Юг­ра­МегаСпорт» тӑ­хи ёх ӆэщӑтыйӆсӑт, щит 78-мит оӆа Оте­чественной ӆаӆь пӑрум вўш эвӑӆт кантсы. Щи хӑтӆ 84 эви па пух юхтыйӆсӑт, кӑсупсыйн 11-13 оӆӑт, 14-15-мит оӆӑт, щӑӆ­та 16-17 оӆӑт ёх кўтн кӑссӑт. 

Оӆӑӊмит хӑтӆ хәӆум пўш и тӑхи эвӑӆт навӑрмӑты пӑта ёх кӑссӑт. Ищи хӑтӆ пухӑт па эвет ёшн х катӑӆман хәхӑӆсӑт па хуята мӑты пӑта. Хәӆмит хӑтӆ няврємӑт тыньщӑӊ тӑхсӑт. 
«Увӑс мўв кӑсты вєрăт хўват» оса тӑхи кәща хә Олег Хатанев ясӑӊ тәс:

1712-1727-мит оӆӑтн Тәпӑӆ вошӑӊ митрополит Филофей Лещинской мўӊ увӑс мўвев хўват ӊхман Тәрум хотӑт омсӑс. 

Ёмвошн вәӆты музей хотӑтн Ас нопӑтты тыӆӑщн 20-мит хӑтӆӑн «Музейт ат» вәс, щит Мўв ӆуват музейт хӑтӆ пӑта вєрум ат. Тӑмӑщ атӑт музей пурмӑсӑт, ӆыв вєрты вєрӆаӆ ванӆтӑты пӑта па айӆат ёх музей хотӑта хущты пӑта вєрӆайт. Мєт оӆӑӊ пўш тӑмӑщ вєр 1997-мит оӆн Германия мўвн Берлин вошн тывӑс.