Айкеԯӑт - Новости

Кашӑӊ оӆ округевн ӑшколайн вәнӆтыйӆты няврємӑт кўтн рәт ясӊӑт әхтыйн кӑсты щирӑт ӆэщӑтыйӆӆыйт. Тӑм пўш щимӑщ кӑсупсы кол­леджӑтн вәнӆтыйӆты айӆат ёх кўтн вєрӑнтсы. 

Ас потты тыӑщ 11-митн «Югра» нємпи ай­кеӑт ӑкӑтты тӑхийн вәйтантупсы вәс. Тӑм хӑт Югра мўв ыв саттэа вєр тӑйты ёх нётупсэт мӑты тӑхи ёх кәща Сергей Стручков, Москва хон вошӑң «Синергия» нємпи университет кәща ӑңкӑр хә Арсен Касумян па Югра мўв ўв саттэа вєр тӑй­ты айат хә Сергей Полыгалов айт тәсӑт.

Россия мўвн рәпитты Франция Посол ими Сильвия Берманн Ёмвошн «Торум Маа» йис пурмӑсӑт шавиман тӑйты тӑхийн оса вєрӑт тәты шуши мир пиӆа вәйтантыӆӑс. 

«Торум Маа» йис пурмӑсӑт шавиман тӑйты тӑхи, «Югра ӆыӆ­ӊуптӑты» оса тӑхи кә­ща нє Людмила Ал­фё­рова путӑртсӑӆэ, муй­сӑр рәт ясӊӑт әхтыйн вәйтантупсэт вә­­сӑт. Щӑӆта «Югра ӆыӆ­ӊуп­тӑты» тӑхийн кӑпӑртты мир ар оӆ мӑр Ёмвош округ правительства хуща рәпитты хуятӑт пиӆа кӑпӑртӆӑт. Тӑм о мӑр тәп оса тӑхи ёх унтасн 30 мутас вән вәйтантупсы, мирхо­тӑт, вәнтӑты хӑрӑт па мӑңхӑтӑт вєрсӑт. 

Кашӑӊ оӆ етшӑты еӆпийн Югра мўв губернатор ими Наталья Комарова округ хўваттыйн айкеӑт эщӑтты ёх пиӆа вәйтантыйӆ, ән мўӊ иньщӑсты ясӑӊӆўв юхы лупты. Тӑм оӆн ищиты Ас потты тыӑщ 12-мит хӑтӑн «Югра» нємуп телерадиокомпания хотн Ёмвошӑӊ мўвевн вәӆты газета, телевидения, радива па интернет хўват айт ӆэщӑтты 50 муӆтас тӑхи ёх вәйтантупсыя ӑктӑщийсӑт. Иха ӆўӊӑтты ки, тӑта соткєм хӑннєхә вәс.

Васы мӑнты тыӆӑщ юхи хӑщум хӑтӑӆн Югорской государственной университет хуща округев полиция кәща Василий Романица па административной правонарушения вєрӑт йира вўты оса тӑхи ёх йиӆуп щирн мирхота ӑктӑщийӆсӑт. 

Югра мўв ӆуваттыйн атум вєрӑт йира вўты щира па щи оӆӑӊӑн путӑртты кєша нєма­сыя вет тӑхи ёх вохсы. Щит Югра мўв па округ хўваттыйн вош кәщайт, ЮГУ эвӑӆт ёх, полиция имет-икет, прокуратура хуятӑт па атум, пӑӆтап вєрӑт оӆӑӊӑн ӆєрамтты ёх вәсӑт.

Вәйт ор тыӑщн Ёмвошн округ ӆуваттыйн няврємӑт вәнтӑты ёх па щи вєрӑт әхтыйн рәпатнекӑт, щи тумпи па хон пєлӑк Финляндия, Казахстан, Армения, Россия мўвӑт па Югра ӆуваттыйн вошӑт, кәртӑт эвӑӆт няврємӑт вәнӆтӑты ёх, киникайт єсӑты тӑхет кәщайт, оса вєрӑт тәты па компьютерной щирӑт тәса вәты хуятӑт вән мирхота ӑктӑщийӆсӑт. ыв путӑртсӑт, хутыса йиӆуп щирн Россия па округ уваттыйн вәнтӑты вєрӑт эщӑтты, ән няврємӑт па айат ёх рәт па па ясңӑта, литературая, йис вәупсыя, искусства вєрӑта мєт ма ванємӑты.

Васы мӑнты тыӑщ 22-мит хӑтӑн Ёмвошн вантупсыйн Алла Иш­тимирова-Посоховайн хӑншум «Ёш пӑтєм пєа ӑңкӑрма» нємпи киника оӑңӑн уша вєрсўв. Щӑта Аллайн хӑншум «Ёш пӑтєм пєа ӑңкӑрма» нємпи ўңӑтты ар 16 финно-угорской ясӑңа тул­мащтуман вә. 

Тӑм ванӑн Ёмвошн лекщитты нєӊӑт пӑта мирхот мӑнӑс. Ӆыв рәпатаеӆ әхтыйн еӆӆы вәнӆтыйӆсӑт. Тыв округевн вәӆты 80 пәӆьница эвӑӆт кӑтсот муӆтас лекщитты хуят юхтыйӆсӑт. Вән мирхот вєрсы кӑт вуӆаӊ хӑтӆ вўраӊӑн: Ёмвош медицинской академия 25 оӆа йис, 85-оӆ юхӆы Югра мўвевн оӆӑӊмит фельдшерско-акушерской ӑшкола пўншсы.

Васы мӑнты тыӑщ 29-митн «Югра» нємпи айкеӑт ӑкӑтты хотн Ёмвошӑң «Центр профессиональной патологии» нємпи леккар хот вән тохтур Николай Ташланов па «Николай Пирогов» нємпи леккар тўтӑң хоп вән тохтур Владимир Слабко пиа вәйтантупсы вәс. ын ай тәсңӑн, хуты тӑм ванӑн «Николай Пирогов» леккар тўтӑң хоп юхы кєрӑс.

Николай Ташланов лу­пӑс, лыпӑт єнумты ты­ӑщ 1-мит хӑт вўш эвӑт васы мӑнты ты­ӑщ 20-мит хӑт вәнты «Николай Пирогов» нєм­пи леккар тўтӑң хоп округ 45 кәрт хуща ң­хӑс. Щӑта рәпитум 19 тохтур 6 024 хуят нух вантсӑт.

Ас потты тыӆӑщ оӆӑӊмит хӑтӑӆн иса Россия мўв ӆуваттыйн па 30 па хон пєлӑк мўвӑтн арсыр мирӑт «Большой этнографический диктант» нємуп ут хӑншсӑт. Ёмвошн тӑмӑщ әмӑщ вєр сыр-сыр хотӑтн ӆэщӑтса. Ма айӆат ёх вәнӆтыйӆты Технолого-педагогической колледжа ӊхсум. Тыв оса вєрӑт пиӆа кӑпӑрты хуятӑт, няврєм вәнӆтӑты ёх, кәщайт па студентӑт юхтыйӆсӑт.