Айкеԯӑт - Новости

Рәпитты ёх емӑӊхӑтӆ Ёмвошн хӑтӆ кўтупн оӆӊитса. 

Арсыр тӑхетн рәпит­ты айӆат ёх, ӑшкола няврємӑт, «Открытие» нємуп тӑхийн рәпитты хуятӑт, пәӆьницайн кӑ­пӑртты ёх, вән нєпека вәнӆтыйӆты эвет, пухӑт па кӑсты вєрӑтн нух пи­тыӆум ветеранӑт вош хулэт хўват хәхӑӆсӑт. Иса 24 команда кӑсты щира ӑктӑщсӑт. Кашӑӊ хӑннєхә хәтсот мєтра кўт хәх­ӆӑс. Щӑӆта еӆӆы па хуят хәхӑӆмӑс, щиты кӑсум ёх хәӆум километра па няӆсот мєтра хәхӑӆсӑт. 

Вән кєр тыӆӑщ 25-мит хӑтӑӆн Ёмвош недропользования департамент хот йитн айкеӆӑт ӑкӑтты ёх Югра мўв вәнтӑтн тўт хәрӑтты тӑхет вантты кәща нє Виктория Четина па округев вой веӆпӑс вєрӑт артаӆӑты тӑхи кәща ӆӑӊкӑр хә Алексей Залибеков пиӆа вәйтантыйӆсӑт.

Вән кєр тыӆӑщ 17-18-мит хӑтӆӊӑнӑн Ёмвошн 13-мит пўш «Информационный мир Югры» нємпи вән мирхот вәс. Тыв айкеӆӑт ӑкӑтты 300 муӆтас хуят юхтыйӆсӑт. Тӑм оӆн мирхот «Цифра близко» нєм тӑйс.

Вән кєр тыӆӑщ 24-мит хӑтӑӆн Ёмвошн «Народный фронт за Россию» нємуп тӑхийн, мӑта ут округев хущи вәӆ па рәпитӆ, нємасыя мирхот вәс. Ияха ӑктӑщум хӑннєхуятӑт арсыр айкеӆӑт вєрсӑт, муй щирн тӑм юхи хӑщум оӆн Югра мўвн мәш ямӑӆты вєрӑт мӑнӆӑт. 

Вән кєр тыӆӑщ 26-митн «Торум Маа» нємпи катра пурмӑсӑт ӆавӑӆты хотн вәӆты вухаӆь мир вуӆаӊ писатель хә Юван Шесталов хот йитн «Ты, струна моя, звени!» нємпи етнхот вәс. Щит вухаӆь мир нарӑсты сыйт хӑншум оӆӑӊ хә Владимир Шесталов шәӊӑт нәмӑӆмӑты пӑта ӆэщӑтсы, вантэ, 28-митн ӆўв ӆәӆн 55 оӆа йис.

Ванӆтупсыя Ёмвош техно­лого-педагогической кол­леджӑн вәнӆтыйӆты айӆат ёх юхтыйӆсӑт. Ӆывеӆа шєӊк әмӑщ вәс Владимир Шесталов оӆӑӊӑн уша вєрты.

Россия мўвн вәты кашӑң хоттє ёх Вуаң Отечественной аь пӑта тарма рәпитсӑт, ар пєлӑк мир ая яңхсӑт, ар мир аь хӑрн уха пунсӑа. Увӑс мирўв – хӑнтэт, вухаят па юрнӑт – ищи мўвев пӑта вуракӑт вошитты мӑнсӑт. Вантэ, мўң хуятўв кўш рўщ ясӑң ӑн тӑйсӑт, тәп ям вепӑс хуятӑта вәсӑт, щирн пушкан эвӑт мєт яма єсӑты па вәнт шушийн вәты иса хошсӑт. Нємӑт пӑтап вєр ыв пӑтэа ӑнтәм вәс.

Ёмвошн ай кєр тыӆӑщн Ас-угорской институтн рәпитты хуятӑт «Этнокультурное пространство Югры: опыт реализации проектов и перспективы развития» нємпи мирхот вєрӑнтсӑт.

Мирхотн филология, культурология, педагогика, история щирн наукайн рәпитты хуятӑт, няврємӑт вәнӆтӑты, культура вєрӑт тәты, оса тӑхетн кӑпӑртты ёх вәсӑт. Щи тумпи видеоконференция щирн 17 вәнӆтӑты тӑхи ёх арсыр районӑт эвӑӆт путрӑт хәӆӑнтсӑт. 

«Устойчивое развитие коренных малочисленных народов Севера» поступсы щирн 2020-мит о вәнты шуши айӆат вәнӆтыйӆты ёха нётупсы вух ёша павӑтты рӑхӆ. 

Вән кєр тыӆӑщ няӆмит хӑтӑӆн Югра мўв ӆуваттыйн «Русское географическое общество»  нємуп всероссийской тӑхийн рәпитты ёх вошӑӊ мир пӑта әмӑщ ванӆтупсы пўншсӑт. Вантэ, кашӑӊ оӆ вән кєр тыӆӑщн иса мўвӑтн география, экология вєрӑт ԯєрамтты ёх «Марш парков» нємпи вєр ӆэщӑтӆӑт. Ӆәӆн мира география вєрӑт оԯӑңӑн ай павӑтты па научной вєрӑт ԯєрамтман мўв хўват яңхты вєр оӆӑӊӑн ищи путӑртты. 

Вән кєр тыӑщ 9-мит хӑтӑн Ёмвошн РИЦ «Югра» нємуп тӑхийн айкеӆӑт ӑкӑтты хӑннєхуятӑт округев Пенсионной тӑхи кәща нє Татьяна Зайцева, ўв ӑңкӑр ёха Ольга Турнаева па Александр Сучков, рәпатайт мӑты тӑхи кәща Алексей Варлаков пиа вәйтантыйсӑт. Ияха юхтум па арсыр тӑхетн рәпитты кәщайт айкеӑт тәсӑт, муй щирн пенсияя ванамӑты па вәната ювум хәйт па нєңӑт пӑта тӑм юхи хӑщум оӑтн йиуп поступсэт єтсӑт.