Тӑм хурн украинка Людмила Константиновна Муравицкая, ўв хәумъяңкєм о Лянторн вә. Тәня щи ими Ёмвоша юхтыӑс, хута округ ремёслайт хотн нєңӑт сэвӑң вей тыйты вәнтӑс. Әмща уша павӑтты йис, муй пӑты нyм мўв нє хӑнты пурмӑсӑт вєрты вўянтӑс па щи оӑңӑн ўв пиӑа путӑртсум.

– Сыры мўң тәп рўщ щирн тыйты хошсўв, хән Увӑс мўва касӑсўв, хӑнты пурмӑсӑт вєрты ищи вәнсўв. Вошевн яңкєм о «Мастерица» нємуп вєртутӑң тӑхи вә, щӑта Надежда Харчевникова ух нєңа рәпит. Арӑ пєлӑк вєртутӑң ёх щӑта – щит вәнӑт мир. Вантэ, рўтьщӑты хӑннєхәйт ӑ вәты каша юн омӑсты ӑн ӑңхаӑт, щит пӑты пурмӑс вєрты пиньщӑсӑт. Ма ищи рўтьщӑум, ар о «Мастерица» тӑхия яңхум па щӑта хӑнты щирн тыйты, сӑк кӑрӑтты па вой сух эвӑт арсыр пурмӑс вєрты вәнсум. Тәня вошевн вәнтупсы вәс, щӑта сэвӑң вей тыйты вәнтӑсыюв. Интум щит вєрты хошум па па хуятӑт вәнтӑты вєритум. Щит пӑты интум тӑм мирхота имет вәнтӑты вохсыюм. Мирхотӑң ёх эвӑт тӑта уша йис, хуйтӑт вух ёша павӑтты ӑңхаӑт, ыв Ёмвош ремёслайт хота пурмӑса мӑты щир тӑйӑт. Тӑм пура вәнты пурмӑсам нємхәнты е ӑн тынысум, щитӑт мӑнєма па мойӑты щира вєрӑнтсум. Мосаң, интум итәх утам ищи тыныты питум.
Лянтор эвӑт мўң ня хуят юхӑтсўв, хурамӑңа кӑты пӑты нємӑсыя рәт мирўв әмӑтсухӑт нух әмӑтсўв. Ма ӑңкємн ёнтум украинской eрнасн юхӑтсум. Щит тухапи юн рәт мирєм юпкайт, ӑнтуп кеӑт па па утӑт тӑйум. Щитӑт ищи ӑңкєм вєрӑс, пирща ювман йис әмтутӑт хуыева мӑнєма мӑсэ. Ма хән иса пирщамӑыюм, ищи щитӑт няврємама мӑам, ән юн украинцат әмӑтсух aт тӑйсӑт.
Ма итєма ыв щит ёнтты ӑн хошӑт. Вантэ, сыры нумӑсн ӑн юхтыйсыюм, хуты вәнтыйты мос щимӑщ єсух ёнтты.
Вошевн емӑңхӑтӑта рәт мирўв әмӑтсухн яңхўв. Ипўш «Мы –россияне» нємуп каш хӑрн арсыр ясңуп мирӑт ыв щирен вареникӑт кавӑртсӑт. Ма щи єтут украинцӑт щирн вєрсум, єпаңа тывмӑ пӑты «Народной вареник» нємуп ишӑкты нєпекн катуптӑсыюм. Тӑмиты пурмӑс вєрман па емӑңхӑтӑта яңхман щи вәум.