Шуши мирев культура - Культура обско-угорских народов

Тӑм ванӑн Касум мўвн 79-мит пўш вўєң емӑңхӑт вєрӑнтсы. Щи вән па әмӑщ емӑңхӑта вўы тӑйты ёх ӑктӑщсӑт, ән вўыа вантӑты, кӑсупсыйн нух питты па арсыр мойупсэт ёша павӑтты.

1999-мит о Ас потты тыӑщ 17-мит хӑтӑн генеральной ЮНЕСКО нємпи ўңтупсыйн рәпитты ёх нумса юхӑтсӑт мўвтє рәт ясӑң емӑңхӑт вєрты. Щи пура вўш эвӑт кашӑң о тәнуп тыӑщ 21-мит хӑтӑн щи емӑңхӑт постӑўв. Тӑм он ищиты мўвтє рәт ясӑң емӑңхӑт постӑты пӑты «Югра ыңуптӑты» оса тӑхи хотн вошӑң шуши мир ӑктӑщийсӑт. Тӑм вәйтантупсы «Рәт ясңємн ариум» нємн аьсы. Тәня о мєт оӑң пўш щимӑщ ўңтупсы вєрсы. Щи пурайн тӑта ай пушхӑт па ӑшколайн вәнтыйты эвет па пухӑт хӑнты па вухаь ясӑңңӑнӑн стихӑт путӑртсӑт.

Тәня о Нижневартовской район арсыр вошӑтн па кәртӑтн айат ёх пӑта киникайт ўңӑтты X-мит вәйтантупсэт мӑнсӑт. Щи пурайн Югра мўвев поэтӑт па писателят Нижневартовск, Излучинск, Радужной вошӑтн па Варьёган кәртӑн няврємӑт пиа вәйтантыйсӑт па айкеӑт вәупсы хўватн хӑншум стиха оӑңӑн путӑртсӑт.

Вет щурӑс арат километра Сахалин пәхӑр эвӑт Ёмвош округ-Югра вәнты. Щи пәхӑр увӑс пєлӑкн Поронай нємуп юханӑн (Охотской щорӑса увӑ) Поронайск вош омӑс. Щӑта 15-кєм щурӑс хуят вә, щи мир кўтн нивхӑт — щит шуши мир. «Ма Поронайск вошн вәум. Хәум хӑт па хәум ат тыв йисум. Хәум тухӑң хопн мӑнсум. Мєт сыры поездӑн нивкєм щос областев вуаң воша мӑнсум. Ӛхӑт Южно-Сахалинск эвӑт Хабаровск вәнты и щос мутас йисум.

Тәнуп тыӑщ 21-мит хӑтӑн Ёмвошн «Торум Маа» тӑхийн мир «Тыӑщ поры» емӑңхӑт постӑты ӑктӑщсӑт. Тӑм емӑңхӑт нивӑмиткєм пўш щи постӑы.

«Лєпк» шуши мир община ёх тӑм о Россия президент грант ёша павӑтсӑт. Щит павӑтты ыв «Торум Маа» пурмӑсӑт вантӑты па шавиты тӑхийн па хӑнты па вухаь ясӑңңӑнӑн этты газетайңӑн нётсыйңӑн. 

Ас потты тыӑщн Ёмвошн КТЦ «Югра-Классик» нємуп хот йитн округ Союз писателят тӑхи 20-мит оа питум емӑңхӑт постӑсы. Щи кӑт хӑт мӑр 50 арсыр нєпекӑт хӑншты хӑннєхуятӑт Югра мўв эвӑт ияха юхтыйсӑт па ыв кўтэн мирхот вєрсӑт.

Г.С. Райшев хотн тәнуп тыӑщ 8-мит хӑтӑн «Легенда о Тонье» нємуп вантупсы пўншсы. Щӑта нух эхтум хурӑт Геннадий Степанович хӑнты моньщӑт посн хӑншӑс. Щитӑт ӛхӑт «Най Аңки» хӑрн «Тонья. В поисках легенды» нємуп кинайн вантӑты питыйт. Щи ут айкеӑт ӑкӑтты па кинайт вєрты нє Ольга Корниенко эщатӑс. ўв Вән па Ай Юхана яңхман шуши ёх эвӑт арсыр путрӑт хӑншӑс, щи ёх Тонья похатўр оӑңӑн ищи моньщӑт моньщсӑт.

Тәнԯуп тыԯӑщ яңмит хӑтӑԯн Ёмвошн А.В. Филипенко нємуп тӑԯ кӑсупсэт ԯэщӑтты хӑрн «Лыжня России – 2018» нємпи ԯўхӑң кӑсупсы мӑнӑс. Тӑта тәня о иты 500 муԯтас вошӑң мир кўтэԯн кӑсты вєритсӑт.

Щимӑщ нєм тӑюм етнхот Ас хӑты тыӑщ 13-митн Ёмвошн Краснопартизанской вош хулыйн вәты няврємӑт пӑты киникайт ўңӑтты хотн вәс. Щит щӑта рәпитты кӑтңӑн эщӑтсӑңӑн — Алла Иштимирова-Посохова па Надежда Постика.