Айкеԯӑт - Новости

Тӑм ванӑн Ёмвошн Югра Общественной палата кәща нє И. Максимова  па Общественной па внешней связят департамент кәща юкана вәты хә К. Репин айке ӑкӑтты ёх пиа мирхот вєрсӑңӑн. 

Югра мўвн итәх вәнтӑт, орӑт па юханӑт нємасыя авӑман тӑйайт. Щиты «Сибирские увалы» нємуп ут ай тӑхет потты тыӑщ 15-мит хӑтӑн 1998-мит он Нижневартовcкой мўвн вєрса. Тӑм ут нємасыя така сӑра авӑман тӑйа 20 о. Иса хәум щурӑс мутас километра кєма вәнььман тӑйты мўв вєрман вә. 

Россия мўвев правительства кәщайт тӑм йисн якты-ариты, тәса арсыр пурмӑсӑт вєрты,  хурамӑң әмӑтсухӑт ёнтты па айат хӑннєхуятӑт ямсыева щимӑщ вєрӑта еы вәнтӑты ёхўва муй нєңўва сыр-сыр мойупсэт нємасыя эщӑтсӑт. Кашӑң атэт мир эвӑт щи ёх ўв єпӑн вәты хуятӑтн шєңк сӑмӑңа па мосман тӑйыйт.

Щимӑщ нємуп мирхот Ёмвошн ай тӑхет потты тыӑщ 19-21-мит хӑтӑтн мӑнӑс. Щӑта апӑтсот мутас хуят вәс па арсыр мирхотӑт, еңта пӑсанӑт, вантупсэт, якты-ариты хӑрӑт вєрӑнтсыйт. Щи ут эщӑтсы, ән Россияйн арсыр ясңуп мирӑт кўтэн әхсӑңа ат вәӑт. Щи вєр кәща хотӑтн рәпитты ёх, нўм мўв мир тӑхетн, әңха эвӑты хотӑтн па каш вєрты тӑхетн рәпитты мир нух тўңматӑт. Щи ёх мирхотн ияха ӑкумсӑт па әхсӑңа вәты вєр оӑңӑн путӑртсӑт. Мос лупты, вошӑң па кәртӑң кәщайт, ӑ рәпатнекӑт пӑты нємасыя кӑсупсы вєрсы, ән уша павӑтты, хуйтат әхсӑңа вәты вєр мєт яма эщӑтӑт. 

Советской Союз Коммунистической партия айат ёх комсомол тӑхи васы мӑнты тыӑщ 29-мит хӑтӑн 1918-мит он вєрса. Щӑта 1924-мит он тӑм ут В.И. Ленин нємн пунса. Ӛхӑт ай кєр тыӑщн 1926-мит он тӑм ут нємӑтса Всесоюзной Ленинской Коммунистической айат ёх тӑхия. Щи пӑта тӑм тӑхи 100 оа ювум емӑңхӑт єпн Ёмвошн шуши мир Ассамблея кәща ики Еремей Айпин Комсомол ёх мирхот вєрӑс. Тыв ӑктӑщум хуятӑт нәмӑмӑсэ, муй иты ыв айата вәмен вуаң комсомолец нєм тӑйсэ. 

Ёмвошн арсыр ёх вәйтантупсы вәум пурайн Югра мўв оса тӑхи  «Ассамблея народов России» нємасыя мирхот вєрӑнтӑс.
Щи ут кәща нє Елена Исламуратова ай павтӑс:
– Югра мўвн арсыр хӑннєхәйт кєша пўншум оса тӑхев хуна оа ӑн йис, тәп сыр-сыр вєрӑт эщӑтсўв. Мўң арсыр оса тӑхет ёх пиа ияха рәпитўв. Мєт шопӑң мос, арсыр мир кўтэн яма па әхсӑңа ат вәӑт. Щӑта Ёмвошн па Сәрхан вошн оса вєрӑт тәты хуятӑта нётты утӑт эщӑтты рӑх. Щив арсыр мир яңхты питӑт. Щӑта, вантэ, сыр-сыр айке уша вєрты рӑх. 

Васы мӑнты тыӑщ 17-митн «Югра» нємпи айкеӑт ӑкӑтты хотн мир ямӑты вєрӑт оӑңӑн путӑр мӑнӑс.

Ас потты тыӑщ 2-мит хӑтӑн Югра мўвев уваттыйн 53 тӑхийн мир Вән этнографической диктант хӑншсӑт.
Ёмвошн щи мирхот Хӑннєхә па Мўв-авӑт музей хотн вәс. Тӑта округ культура вєрӑт тәты департамент кәща нє Н. Казначеева па вәнтӑты вєр хўват заслуженной рәпатнек, хӑнты мир учёной ими Е. Нёмысова ям ясңӑт лупсӑңӑн. ын путӑртсӑңӑн, щи хӑншты вєр – шєңк мосты вєр, вантэ, уша йи, муй округ хӑннєхуятӑт Россияйн вәты арсыр мирӑт оӑңӑн вәӑт.

Башкортостан мўв Уфа хон вошн кимит пўш йис путрӑт, моньщӑт моньщты ёх кўтн Россия мўвтє фестиваль вәс.  Щив арсыр вошӑт, кәртӑт эвӑт 60 хуят юхтыӑс. Мўң округев эвӑт щив Тимофей Молданов яңхӑс. Тӑм мирхотн мєт вән 85 о уват ими Раиль Кулмурзина, мєт ай – вет о уват пух Асман Рахманулов вәсңӑн.

Ай тӑхет потты тылащ 19-21-мит хӑтӑтн Ёмвошн «Югра многонациональная» нємуп вән мирхот пит. Тәня щимӑщ мирхотн 700-кєм хуят вәс, тӑм пўш 725 хӑннєхә щӑта ияха ӑктӑщӑт. Щи вєр арсыр департаментӑт хущи рәпитты мир эщӑтӑт.