Айкеԯӑт - Новости

Ван хӑтуп тыӑщн округ оса тӑхет департамент хуща мирхот вәс, щӑта арсыр кәщайт, депутатӑт, айкеӑт ӑкӑтты ёх, учёныйт ӑктӑщийсӑт. Мос лупты, 2019-мит о – щит ООН генеральной ассамблея ёх щирн Мўвтє мир шуши мир ясңӑт о. Щирн мирхотн ӑкмум ёх путӑртсӑт, муй ыв па он рәт ясӑң авӑты пӑта вєрты питӑт.

«Хӑнты ясӑң» па «Луима сэрипос» газетайңӑн юкан кәща нє Галина Кондина путӑртӑс, хутыса интӑм газетайңӑўв интернет хуща арсыр тӑхетн ўңӑтты рӑх.

Хӑнты эви Елена Шуганова тӑм он «Мисс студенчества Финно-Угрии – 2019» кӑсупсыя мӑн. Щи оӑңӑн уша йис, хән Югорской государственной университетн округ мир эвет кўтн кӑсупсы вәс.

Ван хӑтуп тыӑщ 7-митн Ёмвошн 12-мит пўш Ищки икет, оньщӑң эвет па моньщӑң ёх ӑктӑщийсӑт. Интӑм 21 команда Манстӑр, Нуви сӑңхум, Нефтеюганской районӑт, Ёмвош, Нижневартовск, Сәрхан, Когалым, Нефтеюганск, Урай, Северодвинск, Миасс, Оренбург, Нарьян-Мар вошӑт, Татарстан мўв эвӑт вәсӑт. Щи тумпи па хон пєлӑк Белоруссия, Китай, Сирия мўвӑт эвӑт мойң ёх юхтыйсӑт.
Щи вән емӑңхӑта Ёмвошӑң ёх па мойң хуятӑт няврєма пиа юхӑтсӑт. Великий Устюг вош эвӑт юхтум вуаң Ищки Ики вўща вєрӑс:

Ван хӑтуп тыӑщ 14-16-мит хӑтӑтн Сытомино пўңӑн Любовь Николаевна, Иван Игоревич Кузнецовңӑн па Константин Ефимович Сенгепов вәнт шуши кәртӑтн Пўпи якты хот вєрӑнтсы. Щив 50 мутас хуят ӑктӑщийӑс. 

Хӑннєхә правайт вәнььты емӑңхӑт епийн ван хӑтуп тыӑщ хәтмит хӑтӑн «Югра» нємпи айкеӑт ӑкӑтты хотн округев уваттыйн хӑннєхә правайт хўват уполномоченной ими Н. Стребкова, няврємӑт правайт вантман тӑйты нє Т. Моховикова па ыв саттэа вєр тәты ёх правайт хўват уполномоченной вухаь хә Н. Евлахов пиа вәйтантупсы вәс. Кәщайўв айке тәсӑт, хутыса тӑм он округ мир правайт вантман тӑйсӑт па муйсӑр нўшайт тўңматты щир вәс.

Ас потты тыӑщ 30-митн округ шуши мир ассамблея хуща вәйтантупсы вәс. Щӑта «2019-мит о – щит Мўвтє шуши мир ясңӑт о» нємпи вєр оӑңӑн путӑр мӑнӑс.

Нижневартовской район Варьёган кәрт шуши мир пурмӑсӑт шавиты хотн методиста рәпитты нє Зоя Спиридоновна Казамкина:

 – Ма хӑнты мир кўтн сєма питсум, єнумсум, Ёмвошн ыв пиӑа институтн вәнтыйсум, ин па ыв пиӑа рәпитум. Йиуп о емӑңхӑт вўраңӑн ма пиӑма вәнтыум эвета, пухӑта, Варьёган кәртӑң мира па иса хӑнты хуятӑта ям па хошум ясңӑт лупты ӑңхаум.

Сўмӑтвошн няврємӑт хӑт мӑр авӑты хотн лекщитты нєңа рәпитты ими Ксения Ивановна Юрьева:
– Тӑм ванӑн Сўмӑтвош районэв 95 оа йис, щирн Сўмӑтвошн вәты хуятӑта вўща ясӑң китум. Щи тумпи ывеа, Нуви сӑңхум район Ваньщавӑт кәртӑн па округ уваттыйн вәты хӑнты мирева Йиуп 2019-мит о емӑңхӑт пиа ям па хошум ясӑң лупты ӑңхаум, ән йиуп о ывеа ар амӑт ат тәс. Кашӑң хота уй ат уңӑ. Иса хуятӑт уяңа, тӑаңа, яма ат вәӑт! 

Ирина Кузьминична Фирсова, Нуви сӑңхум вош, Россия мўв народной мастер:
– Нуви сӑңхум районӑн вәты шўкщӑты имиета Йиуп 2019-мит о пиа хошум вўща ясңӑт китум! Тӑаңа-уяңа вәаты, ән йиуп он аршӑк ям па хурамӑң пурмӑс ат вєрсӑты. Вєрӑнтты вєрӑн сӑм вўш эвӑт ат йи. ән тыйты, ёнтӑсты йинтпӑн унтасн арсыр хурамӑң па әмӑщ пурмӑсӑт ат тывӑт. ән нын вәупсӑн мосты щирн ат мӑнӑс. Нын тыюм, ёнтум, вєрум хурамӑң пурмӑсӑн рәт ёхӑна, әхӑсӑна амӑт па уй ат тәӑт.
 

Светлана Ивановна Рандымова, Касум кәрт, киникайт ўңӑтты хотн рәпитты нє: 

– Вўща вәаты, «Хӑнты ясӑң» газетайн  рәпитты ёх! Мос лупты, газетайн  рәпитты мир, хӑншты ёх вән вєр вєрӑт, мўң хӑнты ясңев сӑмӑңа тӑйэ, рәт ясңев еы тәэ. Шуши мирев вәупсы олӑңӑн айкеӑт хӑншӑт.