Айкеԯӑт - Новости

Зоя Ильинична Сандрина (Ребась), Ямал мўв, орвош район, Муши вошӑң буркайт ёнтӑсты нє:
– Мўң, хӑнтэт, йистєн хў, вой вепӑсуман, вўы тащ авӑман вәўв, щирн ӑңхаум, ән йиуп он аршӑк хў, вой ат вәс, вўы тащӑтн ар пєши сєма ат пит. 
Ма – ёнтӑсты нє, вўы кєп эвӑт хошум хӑншӑң буркайт ёнтум. Хӑнты хӑншет – щит йис вәупсэв вўш эвӑт хӑщум хурамӑң хурӑт. Вўєң ёх эвӑт кєпӑт әтум, щирн шєңк ӑңхаум, ән вўы тащӑт вәншӑка ат йисӑт. 

Вера Николаевна Айваседа, Покачи вош пўңӑн вўт кәртӑн вәты па ёнтӑсты нє:

– Ма Покачи вош пўңӑн вўт кәртӑн вўы тащєм авӑман вәум. Ма – вўєң нє, щирн шєңк ӑңхаум, ән вўєң ёх тащӑт вәна ат йиӑт.

Понавӑт вошн вәты нє Альбина Матвеевна Фирсова: 
– Вўща вәаты, «Хӑнты ясӑң» газетайн рәпитты ёх! Йиуп 2019-мит о емӑңхӑт епийн ма ӑңхаум нынана, әхсӑңа вәты хуятӑта, ям ясңӑт лупты. Ма ӑңхаум нынана тӑаңа вәты, таксара рәпитты! Нєпекӑн мўң иса пурайн авӑўв па ўңӑтўв. Нын газетайн мухты Югра мўвев иса мира ищи хошум ясңӑт лупум. Мўң – хӑнты мир – округев арсыр вошӑтн, кәртӑтн рәт ёх, вәтаң ёх тӑйўв. Мўң – и вән семья! Иса хуятӑта тӑаңа, уяңа, яма вәты ӑңхаум!  Кашӑң югорской семья уяңа-пищӑңа ат вә!

«Почётный житель города Нефтеюганска» нєм тӑйты хӑнты ими Ольга Ефимовна Скакунова: 
– Хӑнты ясӑң» газетайн рәпитты хуятӑта, Ёмвош, Ваньщавӑт, Понавӑт, Касум вошӑтн вәты рәт ёхама па әйңӑама Йиуп о емӑңхӑт пиа ям вўща ясӑң китум. Тынӑң хӑнты ёх, йиуп о нынана уй, амӑт ат тә. Муй нын ӑңхаты, иса ат тыв. Хўв нәпӑтн вәаты! Тӑаң ёш, тӑаң кўр!

Сәрхан мўвн Им лор пўңӑн вәнт кәртӑн юкан вўыеа авӑман Сергей Васильевич Кечимов вә. ўв йис щирн юх анӑт, ыйт, әхӑт, нарӑсъюхӑт, торсапъюхӑт па па утӑт тәса вєрты хош. Щи тумпи тӑм ики Пўпи якты хот арӑт, ўңӑтупӑт, моньщӑт, йис путрӑт вәэ. ўв айат ёх пиа ванкўты вәйтантый. Ин йиуп 2019-мит о юхтум хӑтӑтн нынана вўщайң ясңӑт сәрхан хӑнты ики Сергей Васильевич Кечимов китӑс:
– Ешӑк хӑнты мирєм, йиуп о пиа нынты!
Вой тӑйты, вўы авӑты ёхам 
Хорӑң тащӑн, войң тащӑн ат єнумӑт,

 «Хӑнты ясӑң» газета ўңӑтты тынӑң ёх! Ин округ мирев Йиуп о емӑңхӑт епийн ям па хошум ясңӑт мўңева китсӑт па иса хӑнты мирева 2019-мит он тӑаң, ям, уяң, тащӑң вәупсы ӑңхаӑт. Ин щитӑт ўңтаты.
Округ Дума депутат, шуши мирӑт Ассамблея кәща хә Еремей Данилович Айпин: 
– Рәт мўвн вәты тынӑң мир!  Йиуп 2019-мит о па Рождество емӑңхӑтӊӑн пӑта сӑм вўш эвӑт йиты хошум ясңӑт китум!
Тӑм мӑнум он арсыр әмӑщ вєрӑт па йиуп щирӑт тывийсӑт. 
Йиуп о нынана уй ат тә, Рождество хӑтӑтн рәт ёхӑн пиа сӑмӑңа вәаты. 

Ешӑк хӑнты мир, йиуп о пиа! 

Сәрхан мўвн Оңар юхан пўңӑн юкан авиеа авӑман Надежда Ивановна Покачева вә. Тӑм хӑнты ими вәнт кәртӑн вә. Ин ищки тӑ хӑтӑтн вўыеа пиа кәртыеӑн ёнтӑсман омӑс. ўв аще щирн мущаң рәт ёх эвӑт вәӆ.

Тӑм ванӑн «Югра мўв йис путрӑт» нємпи округ шуши мир йис путрӑт, моньщӑт пӑта хурӑт хӑншты па хӑнты, вухаь па рўщ ясңӑтн ущхуь путрӑт хӑншты кӑсупсы сухнӑс. 

Ван хӑтуп тыӑщ 7-9-митн Ёмвошн «Товары земли Югорской» нємпи вантупсы вәс. Тыв округев эвӑт 219 тӑхи ёх юхтыйсӑт, щи тумпи Якутия мўв эвӑт єтут-пурмӑс вєрты па тыныты вєр тәты кәщайт вәсӑт.

Ван хӑтуп тыӑщ 12-мит хӑтӑн Ёмвошн округ правительствайн мирхот вәс. Щит округ социальной развития департамент кәща ӑңкӑр нє, опека управления кәща Елена Немчинова тәс. Щӑта кӑши-мәш тӑйты няврємӑт оӑңӑн путӑртсӑт.  
Е. Немчинова лупӑс, еы питты 2019-мит он ыв «Демография» проект щирн, «Десятилетие детства» па «Год семьи в Югре» поступсэт щирн рәпитты питӑт, щирн иса хуятӑта партӑс щи вєрӑт әхтыйн йиуп оа план вєрты.