Айкеԯӑт - Новости

Айӆат ёх пӑта вєрум «Йис кәртӑт вәӆупсы» кӑсупсыя, мӑта ут хӑнты, вухаӆь, юрн ясӊӑтн ӆэщӑтӆы, няврємӑт хӑншум путӑрӆаӆ китты питсӑт. Щит Сўмӑтвош, Нуви сӑӊхум районӊӑн па Ёмвош эвӑӆт пушхӑт хӑншсӑт. 

Тӑм кӑсупсы 2021-мит оӆ ай тӑхет потты тыӆӑщ оӆӑӊ хӑтӆ вәнты мӑнты питӆ. Округевн вәӆты няврємӑт хӑншум путӑрӆаӆ щив китты вє­ритӆӑт. Щит кӑт щирн ӆўӊӑтты питӆы: 7-12 тӑӆ ӆуват па 13-18 тӑӆ ӆуват айӆат ёх.

Вәщ тыӆӑщ 30-мит хӑтӆӑн Наталья Комарова Советской районӑн мирхот вєрӑс. Щит тәсӑт «Содействие» нємпи социальной па благотворительной вєрӑт тәты тӑхи кәща нє Татьяна Байкарова, блогер Индира Шибанова па оса вєрӑт тәты нє Вера Богдан. 

Мирхотн онлайн щирн мӑнӑс. Щӑ­та путӑртсӑт, хутыса Со­ветской район хўваттыйн национальной проектӑт рәпитӆӑт, районӑн вәӆты мир кәща нє мосты вєрӑт оӆӑӊӑн иньщӑссӑт. 
Округ кәща нє лупӑс: 

Тӑм ванӑн Радужной вошн округ кәща нєӊа Н. Комаровая Вуӆаӊ Отечественной ӆаӆь оӆӑӊӑн архив нєпекӑт ванӆтӑсыйт. Щит «Без срока давности» нємпи ванӆтупсыйн, хута вуӆаӊ ӆаӆь оӆӑӊӑн Россия мўв архивной нєпекӑт шиваӆӑты рӑхӆ.  

Вәщ тыӆӑщн 8-мит хӑтӆӑн Ёмвошн «Семейный совет» нємуп мирхот вәс. Тӑм мирхот кӑт щира вєрантыйӆса: и щирн ёх ха ӑктӑщсӑт па омӑссӑт, кимӑт щирн карты щўӊкӑт мухты путӑртсӑт. Тӑмӑщ мирхот хотӑӊ ёх ёмӑӊхӑтӆ пӑта ӑкӑтсы, рўщ ясӑӊӑн «День семьи, любви и верности».

Вәщ тыӆӑщн оӆӑӊ хӑтӆӑн йиӆуп поступсы єтӑс, муйсӑр йиӆуп нётты вухӑт сухуптӑты питӆайт. Тӑм вухӑт сухуптӑӆайт няврєм атэӆт єнмӑӆтӑты ёха па ӆавӑрта вум имета, щиты хӑнты щирн лупӆа няврємӑӊа йиты вўтьщӑты имета. 

Югра мўвн шуши мир оса па вой-хўӆ веӆпӑсӆӑты нӆ тӑхи грант вух ёша павӑтсӑт. Тӑм кӑсупсы мўв иӆпи питы вуй вўты па мўв-авӑт вантман тӑйты департамент ёх ӆэщӑтсӑт. 

Нуви сӑӊхум район «Люкан» нємпи оса тӑхи хуятӑт «Вўӆы тӑйты вєр нух аӆумты» щирн «Вўӆы сухӑт, ӆўвӑт, оӊтӑт эвӑӆт вєрум пурмӑсӑт» нєм хўват и миллион шойт нётупсы вух ёша павӑтсӑт.

Кашӑӊ хӑннєхәя вәӆтаӆ пӑта, вух ёша павӑтты пӑта рәпитты мосӆ, рәпата тӑхи вәйтты мосӆ. Щи вєрӑтн рәпата кӑншты хотн рәпитты ёх нётӆӑт.

Хӑннєхәя мостӑты рәпата вәйтты нётты, щит и вєр, щи киньща тӑм рәпата кӑн­шты хотӑт па сыр-сыр вєрӑт вєрӆӑт. 

Щи оӆӑӊӑн ванкўтӆы йис вәӆупсэв, шуши мир рәт ясӊӑт ӆавӑӆты щира нємасыя экспертной совет мирхот пурайн путӑртсы. Щит лыпӑт єнумты тыӆӑщ 30-мит хӑтӆӑн вәс. Щи мирхот округ общественной па внешней связят вєрӑт тәты департамент кәща нє Елена Шумакова тәс.

«Хӑнты ясӑӊ» па «Луима сэрипос» газе­тайӊӑн кәща ӆӑӊкӑр нє Н. Вах мўӊ рәпа­таев оӆӑӊӑн ай тәс:

Лыпӑт єнумты тыӆӑщ 24-мит хӑтӆӑн «Югра» нємпи айкеӆӑт ӑкӑтты хотн округ мир мӑӆты вєрӑт тәты департамент кәща хә Алексей Добровольский, щи департамент нємасыя совет тӑхия ӆуӊум хә Александр Громут па округ инфекционист нє Людмила Катанахова пиӆа вәйтантупсы вәс. Тӑм хӑтӆӑн коронавирус мәш эвӑӆт прививка ӆоньщты вєр оӆӑӊӑн путӑр вәс.

Кашӑӊ оӆ рәт ясӊӑт, шуши мир культура, йис вєрӑт әхтыйн тўӊщирӑӊа кӑпӑртты хуятӑт Юван Шесталов нємпи мойӆупсыйн кӑсӆӑт. Мосӆ лупты, хуты тӑм вухӑӊ кӑсупсы 2013-мит оӆ вўш эвӑӆт тәты питсы. 

2021-мит оӆн 20 тӑхи эвӑӆт хуятӑт щив нєпек китыйӆсӑт, щит нивӑӆ рәпитты па оса тӑхи па 12 – хӑннєхә.