Айкеԯӑт - Новости

Лыпӑт єнумты ты­ӆӑщ 14-мит хӑтӆӑн Мўвтєӆ мир кӑӆы мӑты ёх хӑтӆ. Тӑм оӆ щи хӑтӆ постӑты щира так ясӑӊ «Кӑӆы мияты! Иса мир вәӆупсы еӆӆы ат мӑнӆ» пунсы.

Кӑӆы мӑты ёх вән унтас тәӆӑт. Тӑм оӆ щи ёх кўтн ар айӆат хуят вәс. Тӑм хӑтӆӑн округ пәӆьницая ар хуят кӑӆы мӑты юхтыйӆ­сӑт. Округ пәӆьница кӑӆы мӑты вєр тәты тохтур А. Сухарева лупӑс, Ёмвошн хәӆум щурӑс муӆтас хӑннєхә кӑӆы мӑӆ. Ӆыв унтасэӆн мўӊ вошевн иса пурайн кӑӆы тӑрмӑӆ. Оӆ мӑр вет щурӑс литра вўр ӆэщӑтӆы.

Тӑм оӆ лыпӑт тыӆӑщ 11-мит хӑтӑӆн шуши мир Ассамблея мирхотн депутӑт па тумпийн Югра мўв ыв саттэа вєр тәты ёх правайт вәньӆьты вухаь хә Н. Евлахов, мўвӑт-авӑт вантман тӑйты тӑхи кәща ӆӑӊкӑр хә А. Бирюков, мўв иӆпи питы вуй па газ вўты вєрӑт па природной ресурсӑт әхтыйн департамент хуща шуши мир вәӆупсы вантман тӑйты кәща Е. Лавров, мўв-авӑт вєрӑтн коррупция эвӑӆт ӆавӑӆты тӑхи хә А. Сирук вәсӑт.

Лыпӑт тыӆӑщ 16-митн округ дума вән 53-мит мирхот вәс. Щи пурайн депутатӑт 43 вєр нух вантсӑт.

Щи мирхот пийн округ дума кәща хә Б. Хохряков айкеӆӑт ӑкӑт­ты ёх пиӆа вәйтантыӆӑс: 

 Тӑмхӑтӆ мўӊ ар иньщӑсупсэт нух вантсўв, щи кўтн федеральной кәща ёх рәпата оӆӑӊӑн ищи путӑртсўв.

«О бесплатной юриди­ческой помощи в Ханты-Мансийском автономном округе – Югре» оӆӑӊӑн Б.С. Хохряков лупӑс: 

Ёмвош округн вәӆты шуши мирӑт грант щирн нётты оӆӑӊӑн нємасыя нєпек ӆэщӑтсы. Хута хӑншман вәӆ, муйсӑр вухӑӊ нётупсэт вәӆӆӑт, муй щирн щи нётупсэт ӑӆ хӑннєхәя ёша павӑтты рӑхӆ. Щи нєпек округев внутренней политика департамент ёхн хӑншсы. 

Щи нєпек щирн увӑс мир пӑта нємасыя нивӑӆ вухӑӊ нётупсы вәӆ, щит: 

- вухӑӊ нётупсы йис путрӑт, культура вєрӑт, рәт ясӊӑт ӆавӑӆты щирӑт, шўкщӑты па вєрӑнтты вєрӑт ӆэщӑтты пӑта (щит «Устойчивое развитие коренных малочисленных народов Севера» госу­дарствен­ной программа щирн округев культура вєрӑт департамент ёхн ӆэ­щӑтӆы);

Округ кәща нє Наталья Комарова Ёмвошн Россия хӑтӆ еӆпийн айӆат ёха паспорт нєм нєпек ёша мӑс. 

 Россия мўв паспорт нєм нєпек ёша хоӆумтты – вуӆаӊ вєр. Тӑмхӑтӆ нын пиӆана хотӑӊ ёхӆан тыв юхӑтсӑт. Ӆыв пӑтэӆа щит ищи вән вєра вәӆ,  – лупӑс округ кәща нє. 

Иса щи хӑтӆ хәс пас­порт нєм нєпек ёша мӑсы. Щит Ёмвош ӑш­колайт па гимназия тӑ­хийн вәнӆ­тыйӆты няврємӑт, мӑта хуятӑт 14 оӆа йисӑт. Ӆыв вәнӆ­тыйӆты па па вощӑӊ хотӑт хущи арсыр кӑсупсэтн кӑсӆӑт па ар мосты вєрӑт ӆэщӑт­ӆӑт.

Хӑнты ясӑңа тулмащтӑс: 
Надежда Вах

Мосӑӊ, Россия мўвевн мєт сыры «Катра машинайт па мотоциклӑт Ломаковской музей» кәща хә Дмитрий Александрович Ломаков катра пурмӑсӑт ӆавӑӆты хот етн па атн рәпитты хӑтӆ вєрӑс. Вантэ, щи тӑхи ӆўв вухӆаԯ унтасн вәс. 1991-мит оӆн Д. Ломаков музейӆа етн па ат пєлкӑн мойӊ ёх вохӑс, 1998-мит оӆн щи вєр оӆӑӊӑн сайт хуща хӑншӑс.

Тӑм пўш Ёмвошн айкеӆӑт ӑкӑтты па хӑншты ёх пиӆа ар хот йитуп хотӑт капитальной ремонт Югорской фонд хуща кәща кана рәпитты хә Андрей Бойко вәйтантӑс.

Кәща хә тӑм мӑнум оӆ вєрум вєреӆ оӆӑӊӑн путӑртӑс па лупӑс, муй вўрн тӑм оӆ рәпатаеӆ еӆӆы мӑнты питӆ.

Муй щирн па хуты тӑм йисн ма тӑйты рәпата па сӑмӑӊа ӆэщӑтты вєр кашӑӊ хәя муй нєӊа мущатты рӑхӆ? Щимӑщ вєрӑт оӆӑӊӑн тӑта мосванӑн Ёмвош Центр занятости тӑхи ёх округев «Хӑнты ясӑӊ» газетаева айкеӆ китсӑт. 

Йис пураитн вәӆум учёной Сенека щи­мӑщ вєрӑт оӆӑӊӑн тӑмиты лупӑс: 

- Нӑӊ ин ӑн ки вәӆэн, муйсӑр тӑхия мӑнты па хута иӆ вуӆыты ӆӑӊхаӆӑн, щит нємуӆты вот рўвн еӆӆы ӑн тәӆыйн па тўӊщирӑӊа ӑн нётӆыйн.

Ас нопӑтты тыӆӑщ 24-мит хӑтӑӆн Ёмвошн РИЦ «Югра» нємуп айкеӆӑт ӑкӑтты тӑхийн мўӊ округев оӆӑӊ кәща ӆӑӊкӑр хә Алексей Охлопков, Югра мўв профсоюзӑт кәща хә Фёдор Сиваш, Негосударственной пенсияйт ӑкӑтты тӑхи кәща Мария Стулова, страховой тӑхи «Югория» кәща хә Роман Белкин па па кәщайт нємасыя айкеӆ ӑкӑтты хӑннєхуятӑт пиӆа вәйтантыйӆсӑт.

Ас нопӑтты тыӆӑщ 18-митн «Югра» нємпи айкеӆӑт ӑкӑтты хотн мўв-авӑт вантман тӑйты тӑхи кәща хә Сергей Пикунов пиӆа вәйтантупсы вәс. Ӆўв ай тәс, хутыса тӑм оӆ «Мўв-авӑт ӆавӑӆты» XVIII-мит акция ӆэщӑтсы.

Ӆўв ясӊӑӆ щирн, щи вән акция Ас но­пӑтты тыӆӑщ 19-мит хӑтӆ вўш эвӑӆт лыпӑт хой­ты тыӆӑщ 11-мит хӑтӆ вән­ты ӆэщӑтӆы. Ас пот­ты тыӆӑщн уша йиӆ, мўв-авӑт ӆавӑӆты щира муй­сӑр вєрӑт ӆэщӑтсыйт па хуйтат арсыр кӑсупсэтн нух питсӑт.