Айкеԯӑт - Новости

Вәйт ӆор тыӆӑщ 24-мит хӑтӆӑн «Югра» нємпи айкеӆӑт ӑкӑтты хотн вәйтантупсы вәс. Щӑта путӑр мӑнӑс, хутыса еӆӆы Югра мўвева юхăтты мойӊ ёх пӑта әмӑщ рўтьщӑты вєрӑт ӆэщӑтты щирăта вәнӆтăты питӆыйт. 

Тӑта мосванӑн Юг­ра мўв кәщайт мирхот вєрсӑт, хута путӑртсӑт, муй щирн шуши мирӑт нух хӑншты мосӆ, ӆәӆн арсыр вєрн ӆывеӆа нётты.

Щи пӑта округ кәща Н. Комарова лупӑс: 

- Кашӑӊ хӑннєхә шуши мир эвӑӆт мўӊева нух хӑншты мосӆ, ӆәӆн м­сыева вәйтты, мӑта хуят па муйсӑр тӑхийн вәӆ па рәпитӆ. Щи пурайн веӆщи уша вєрӆўв, муй щирн сыр-сыр вәӆты-хоӆты щирӑт ӆыв хущеӆа мӑнӆӑт па муй щирн ӆывеӆа нётты вєритӆўв.

Россия мўв президент поступсы щирн лыпӑт хойты тыӆӑщ оӆӑӊмит хӑтӆ вўш эвӑӆт нивӆ тӑӆ вәнты кӑшаӊ няврємӑт пиӆа юӆн омӑсты ӑӊкета муй па ащета йиӆуп щирн больничной вухӑт сухуптӑты питӆыйт.

Щит 100% тыӆӑщ мӑр вўты вух эвӑӆт па интӑм ӑн вантӆы, муй арат оӆ ӑӊки муй ащи рәпитӑс, муй щирн па муй арат мӑр няврєм ӆекщитӆы. Тӑмӑщ сухуптӑты вєр айӆат ӑӊкет-ащет пӑта вән нётупсыя питӆ. 

Югра мўвевн «Развитие жилищной сферы» поступсы щирн шуши ёх вәӆты хотӑт омӑсты муй ӆәтты щир тӑйӆӑт, щи вєр пӑта ӆыв нётупсы вухӑтн мӑӆыйт. Щи оӆӑӊӑн хотӑт омӑсты департамент ёх мўӊева лупсӑт. 

2021-мит оӆн щи вєр пӑта 890-кєм миллион шойт вух мӑсы. Тӑмхӑтӆ субсидия вохты щира 1945 хуят нєпека хӑнш­ман вәӆӆӑт. Щи кўтн 1776 хуят 2013-мит оӆ ван хӑт­ӆуп тыӆӑщ вәнты вохты нєпекӑт хӑншсӑт, 169 хуят – 2014-мит оӆн. 

Вәйт ӆор тыӆӑщ 26-мит хӑтӆӑн округ кәща нє Наталья Комарова онлайн щирн «Обратная связь» нємпи мирхот вєрӑс. Щӑта путӑртсӑт, хутыса кәщайн партум вєрӑт мӑнӆӑт, хутыса тўӊматӆыйт. Щи партупсэт ӆўв департаментӑт па районӑт, вошӑт кәщаята мӑс, хән округ мир пиӆа онлайн щирн вәйтантыӆӑс па арсыр нўшайт оӆӑӊӑн уша павтӑс.

Лыпӑт хойты тыӆӑщ 1-мит хӑтӆ – щит ву­ӆаӊ хӑтӆ. Щи вўш эвӑӆт няврємӑт, ӑӊкиӆаӆ-ащи­ӆаӆ, вәнӆтӑты хуятӆаӆ пӑта йиӆуп пура оӆӊитӆы. 

Мўӊ мўвевн иса муй вєрӆы, ӆәӆн няврємӑт ма ат вәнӆтыйӆсӑт. Россияевн арсыр тӑхетн йиӆуп м ӑшколайт омӑсӆыйт. Няв­рємӑт па айӆат ёх вуӆаӊ кӑсупсэтн кӑсӆӑт па нух питӆӑт, щирн ӆыв ма вәнӆтӑӆыйт. 

Щи пӑта вән пәмащи­па мосӆ лупты няврємӑт вәнӆ­тӑты хуятӑта. Ӆыв иса муй вєрӆӑт, ӆәӆн няврєм м, нумсӑӊ хуята ат йис. 

Вәйт ӆор тыӆӑщ 9-митн Ёмвошн Ас-угорской институт хотн «Невероятные ис­тории из жизни казымских ханты» нєм­пи киника мира ванӆтӑсы. 

Щи путрӑтн хӑншман вәӆ, хутыса хӑн­нє­хә вәнт утӑт пиӆа вәнтӑн вәйтантыйӆ. Щимӑщ вє­рӑт Касум мўв хӑнтэт хуща вәсӑт. Тӑм киника Нуви сӑӊхум район Касум вошн вәӆты, Ас-угорской институтн Белоярской фи­лиалн рәпитты хӑнты нє Евдокия Каксина ӆэщӑтӑс. 

Тәняӆ оӆ ван хӑтӆуп тыӆӑщн Венгрия хон пєлӑк учёной нє Марта Чепреги 70 оӆа йис. Щи пӑта ӆўв пиӆэӆа рәпитты хӑннєхуятӑт нємасыя хӑнтэт па вухаӆят оӆӑӊӑн киника хӑншсӑт па щиты нємӑтсӑт «Хӑнты вәӆупсы па вухаӆь моньщӑт».

Ай кәртӑтн вәӆты мир тўт х такӆы вәӆты щир ӑн тӑйӆӑт. Тӑӆн ищки пурайн кәр ӑӆӆяты мосӆ. Щирн ӆыв ӆўӊ пурайн тўт х ӆэщӑтӆӑт. Интӑм ӆўӊтаты, хутыса вәнтӑн иӆ рӑкнум сорум х пайт ӆэщӑтты, муй рӑхӆ вєрты вәнтӑн, муй ӑнтә.

Федеральной пос­туп­сы хўват иӆ рӑк­нум сорум хӑт ищи тўӊ­щирӑӊа ӆэ­щӑтты мосӆ. Ка­шӑӊ хӑн­нє­хә кәр ӑӆӆяты щира щи утӑт ӆэщӑтты щир тӑйӆ. 

Кашӑӊ оӆ округев ӆуватн айӆат ёх пӑта ван мӑр рәпитты вєрӑт ӆэщӑтӆыйт. Щи пурайн 14-18 оӆ ӆуват няврємӑт ӑн вәнӆтыйӆты мӑр рәпитты па ёша вух павӑтты вєритӆӑт. Мосӆ, ӆәӆн айӆат хуятӑт кєншӑк рәпатайн ат рәпитсӑт па муӆты атум ут ӆыв пиӆэӆа щи пурайн аӆ тывӑс. Россия мўв Трудовой кодекс щирн айӆат ёх 14 тӑӆ вўш эвӑԯт рәпитты щир тӑйӆӑт. 

Муй щирн айӆат ёха рәпитты вєр су­хуптӑӆы?