Кєв вошн, карты вошн ма вәӆӆум. Кӑрӑщ хотн, вән хотн омӑсум. Ма нємєм Петя, хӑнты щирн ки, Пєтр. Путӑр ма тӑйӆум. Путрєм йис путӑр ӑнтә. Путрєм тӑм нуви хӑтӆӑн вәӆты вәӆупсєм оӆӑңӑн. Ма тӑм йис няврєм. Ёмвошн вәум, хәтмит ӑшколайн 11-мит классӑн вәнтыйум. Тәп ма сыр вәӆы пищ тӑйӆум. Атӑӆӑн вәӆум вәӆмиты юкана па мўвӑта, па йиңкӑта рӑкӑнӆум. Йис вєрӑт вантыйум, моньщ вєрӑт вантыйум. Муй па йина щӑта яңхийӆум, муй па вәӆумӆам  щимщӑт, ӑн па вәӆєм. Нынана путӑртӆӑӆам. Нын щи ма киньщама нумсӑң ёх, ма киньщама сащӑң ёх. Нын щи уша вєрӆӑты ма путрєм, нємасыя вантум вєр, муй па вәӆум, муй па моньщ.

Ипўш сємиеӆам муй щиты мӑнсӑңӑн, муй па вуюмсаюм. Тәп вәӆты тӑхием эвӑӆт нюр па тӑхия рӑкӑнсум. Хотєм ӑнтә, нурєм ӑнтә. Кєв вошєм ӑнтә, карты вошєм ӑнтә.
Вәнт кўтн ма шәшум. Хӑтӆ имиен похӑнман вәӆ. Тӑӆ тәрум. Мухӑӆая юхиет ӆоӆьӆӑт, нўвиеӆаӆ-ӆєпсыеӆаӆ ӆоньщӑн лӑп пуӆсайт, лӑп кивартумӑт. Нуви ӆоньщие, єтӑр хӑри тәр-мие!  Ма па мутсӑр ӛш кўтупн ӆоӆьӆум. Нумсыема-сӑмиема әмӑщ! Щи мурт сорнєң нуви хӑтӆые!
Ӛш хўват щи шәшумсум. Хўв муй ван шәшсум. Сыр-сыр тухӆӑң воиет пєӆа вантыйӆум, ӆаңкиет пєӆа вантыйӆум. Имуӆтыйн шиваӑсєм: «Тьа! Ма ӆуваттєм, ма пӑӆаттєм еңк порхайң ай икилєңки рєп эвӑӆт ай әхӆыевн хӑтӑтьӆяӆ».
Ма щивеӆт пєӆа щи шәшумсум. Ӆўв мӑнты ищи шиваӆӑсэ. Әхӆыеӆ хӑйсӑӆэ, ма хущєма щи хәхӑӆмӑс: «Вўща, вўща, ай Пєтр! Ма хуты нӑңты щи ӆавӑӆӆєм! – Шӑңкап нёхмӑс тӑм ай ики. — Кашӑң хӑтӆ атэӆт хӑтӑтьӆяты катлы йисум. Мӑнӆумн, мӑнӆумн әхӑӆн хӑтӑтьӆяты!» Щитӑӆн мӑнты ёшєм эвӑӆт катӑӆсӑӆэ па таӆты питсӑӆэ. 
Ма пакнум рўвємн иньщӑссєм:
—  Нӑң па муй вўрн ма нємєм вәӆєн?
— Ӑн хән вәӆєм. Нӑң кашӑң етн, уӆтєн еӆпийн, мӑнты моньща моньщӆэн.
— Нєш щиты… Щирн ки, нӑң муйсӑр хә?
— Ма Ими-хиӆы.
— Ими-хиӆы?
Щиты нёхуммємӑн ма тӑңха сєм вўсңӑӆам вәна таӆсӑӆам, муй па ўңӑӆ вўсєм вәна таӆсум. Ими хиӆы ма пєӆама ӑңкӑрмӑс па няхӑн юхӑтса. Щӑӆта нёхмӑс: «Нӑң хуты ӑӆ пӑӆа. Мўң, моньщ ёх, щимщӑт. Мӑта няврємӑн вана тӑйӆаюв, щи хуят пиӆа вәйтантыйӆты вєр тӑйӆўв. Мўң хуты моньщ ёх, йис ёх, мӑта митра, мӑта пищ ӑн тӑйӆўв».
Щи ясӑң хәӆмєм юпийн ма па щир нумӑсн, па щир сємӑн мухӑая вантыйӆты питсум. Нәмӑсӆум: «Мўв па мўвие щи, юхиет па юхиет щи». Щирн ӆоньщ пўлые ёша вўсєм, ёшӑн тӑңӑрсєм. Ӆоньщєм ӆуӆаты питӑс. Нәмӑсыйӆум: «Ӑнтә, тӑм вәӆум ӑнтә. Ай икие па, аӆпа, муӆтсӑр хӑнты пухие. Нєман мӑнты няхӆӑӆэ. Ими-хиӆыя лўвты ӑӆьщӑӆэ».
Щитємн йиӆуп ӆәхсєм пиӆа рєп эвӑӆт хӑтӑтьӆяты мӑнсумн. Еша вәӆман няхман ӆәхсєм иньщӑссєм:
— Нӑң, Ими-хиӆы, аӆпа, Имен-ими ясӑңа хәӆӑнтты вєр ӑн тӑйӑн? Па щи ат вәнта хӑтӑтьӆяты питӆӑн. Кар именӑн тӑм хӑтӆ па щи хинта пунӆайн.
— Ӑнтә. Тӑм хӑтӆ Кар имєн юӆн омӑсӆ, муӆты вєрӑт тӑйӆ, ӑнт етшӑӆ. Тыв ӑн юхӑтӆ.
— Нӑң па муй вўрн вәӆӑн?
— Ӆўв мӑнєма ай павтӑс.
— Нєш щиты. Муй вўрн ӆўв ай павтыйӆ? Нын муй сотовый телефонӑт тӑйӆӑты?
— Сот телефонӑт – щит па муйсӑр путалэт?
— Сот хән, сотовый, щит рўщ ясӑң. Сотовый телефон — щит  карты пун такӆы путӑртты утӑт.
— Муй карты пунӑт путӑртты вєр тӑйӆӑт?
— Ӑнтә. Тӑм, вантэ!
Щит лупмєм сӑхӑт щєпєм эвӑӆт телефонєм нух сәхтӑсєм. Ими-хиӆыя мєшумсєм.
Нәмӑсыйӆум: «Тӑм вәнт кәртӑн єнумты ай икие, аӆпа, тӑмӑщ телефон ӑн вантыӆӑс». Ими-хиӆы телефон ёша вўсӆэ, тывеӆт-тухеӆт кєртыйӆсӑӆэ, муӆты пӑта тӑңӑрсӑӆӆэ па нёхмӑс: «Муй вўрн тӑм путалы мухты путӑртӆа? Ма щирємн, щимӑщ пищ ӑнтә». 
Щи юпийн ӆўв митраӆӑӆ оӆӑңӑн путӑртты питӑс: «Нӑң хуты вантэ. Кар ими пиӆа путӑртты ки мосӆ, ма кӑрӑщ тӑхияшӑк нух хәңхӆум па ӆўв вәӆты тӑхеӆ пєӆа ўвӑтмӑӆум: «Кар имие, Кар имие, нӑң муй вєрман омӑсӆӑн, мӑнєма ай павта».
— Муй Кар имєн ванӑн вәӆ? Муй па нӑң щи мурт сыяң тўр сый тӑйӆӑн?
— Ӑнтә. Щи ясңєм Вот пухӑн аӆумӆа, па щив щи тәӆы. Щӑӆта па Кар ими лупты ясӑң юхӆы тәӆы.
Щирн ма ӆәхсєм иньщӑссєм. 
— Кар ими муй йина щимӑщ, ӆўв муй йина хӑннєхә неӆты вєр тӑйӆ?
— Ӑнтә. Щит ӑӆ моньщӑн моньщӆа. Улы-мулы няврємӑт пӑта, ясӑң ӑн хәӆӑнтты няврємӑт пӑта. Кар имие хуты ям имие. Нємӑӆт атум ӑн тӑйӆ. Тәп хән муӆты улы-мулы ай ики єӆты тарма йиӆ, ўвты-навӑрты нармаӆ, щи ай ики митрӑӆуман мухты тыв сәхтӑӆємн, па йис моньщ вєр ванӆтӑӆумн. Мин хуты юнтӆумн. Ма мӑтты Имєм-ими ясӑң ӑн хәӆӑнтӆум, пӑтламӑты вўша хӑтӑтьӆяӆум. Щирн Кар имиен хинтӑӆ-муяӆн щи єтӑӆ. Ма па ӆўв хинтӑӆа хӑтумӑӆум, ӆўв мӑтты мӑнты неӆты щи тәӆӆэ. Улы-мулы няврємӑт тӑмӑщ вєр сємн вантӆӑт, еӆӆы па хотӑң ёхӆаӆӑн пакнӑӆайт. Щи моньщӑн Кар имен мӑнты ӆєты-ворты вўтьщӑӆӆэ,  ма па ӆўвты вәӆєм. Нӑң хуты нәмӑсыӆа и пўш вәӆум юпийн па хән ӆыӆӑңа йиӆ. Нємӑсыя вєрн ӆўв мӑнты хинтӑӆн тухишӑк тәӆы па щи єсӑӆӑӆэ, тәх щос па ӆўв хущаӆа шай яньщты яңхӆум.
— Йина муй щиты? 
— Йина щи.
— Ма па иньщӑсты вєр тӑйӆум. Вот пухие щит па хуй?
— Вот пухие — щит хуты мєт ван ӆәхсєм.
Щи ясңӑӆ нёхмум юпийн Ими-хиӆєм ўвӑтмӑс: «Вот пухие, Вот пухие, тыв юва, тыв юва! Ма Пєтр ӆәхсєм тыв юхтӑс». 
Тәп щи ясӑң сый хәрӆӑс. Ӆоньщ нух аӆумман, лоньщ пәсӑң каврӑӆтуман муӆты щи юхтӑс. Кӑӆты ӑн кӑӆ, тәп ясңӑӆ сащӆ:
— Вўщӑтңӑн, вўщӑтңӑн! Нӑң Пєтр нєш тӑмӑщ пухие. Ими-хиӆы мӑнєма щи лупийӆ, мӑтты ӆўв митрайӆ мухты  сємӑн кӑӆ, мӑта няврєм ӆўв оӆңӑӆн моньщ моньщӑӆ. Нӑң па ӆўвєӆа щи кӑӆсӑн. Ар моньщ тӑйты няврємӑт тәх щос па тыв щи єтыйӆӑт. Ма нәмтємӑн, ӑңкен, ащен ищи тӑта вәӑңӑн. Ӆын щи вєр путӑртыйӆсӑңӑн?
— Ӑнтә.
— Мосӑң вәна йисңӑн па щи йис вєр юрємӑсӑн. Щирн хуты айңӑн вәсңӑн.
Тӑм путрєв хуӆаты юпийн Ими-хиӆы Вот пухие пєӆа лупӑс: «Нӑң яңха, Имєм-имия ай павта ӆәхсєм юхтум вєр оӆӑңӑн».
Щӑӆта ўвӑтмӑс: «Имєм-имия, имєм-имия, ма Пєтр ӆәхсєм юхтӑс!»
Тәп щи ясӑң нёхмӑс, оньщ нух аӆумман, пәсӑң каврӑӆтуман муӆтєв щи мӑнӑс.
Щитємӑн әхӆємӑн вўсємӑн па рєп пєӆа шәшумсумн. Кӑт-хәӆум сәхум тәп вєрсумн па щи оньщ нух аумман, пәсӑң каврӑӆтуман муӆтэв щи юхтӑс па сый сатьӆ: «Хиӆые, хиӆые, ям щи ӆәхсӑңа йисӑн. Тәп ӆўв ищи вєра хўв мӑр ӑӆ хӑтӑтьӆяӆ. Ӑңкеӆӑн-ащеӆӑн вәтшӑӆы».
Щи вєрӑт юпийн Ими-хиӆы ма пєӆӑма вантыйӆ па ишкащман нёхмӑс: «Тӑм щи мўң митраӆўв, мўң пищӆўв. Нӑң тӑйты путалэн па муя пӑкӆ?»
Щирн ма сотовый телефонєм нух таӆсєм. Ӑңкєма сый китсум. «Ал-ло» ясӑң лупмєм юпийн Ими-хиӆы пєӆа вантман, телефонєм сыяңа вєрсум па нёхумсум:
— Ӑңка, ма еша вәӆ юхӑтӆум. Ма ӆәхсєм пиӆа юнтӆум.
— Юнта, юнта, тәп сырышӑк юхи юхта, урокӆӑн вєрты мосӆ, – сыяңа нёхмӑс ӑңкєм.
Ӑңкєм тўр сый хәӆмаӆ юпийн Ими-хиӆы ӆўв сєм вўсңӑӆ, муй па ўңаӆ вўсӆ вәна таӆсӑӆӆэ: «Я-а! Йина щи нӑң митра тӑйӆӑн».
Щи юпийн па еша хәхӑтьӆясман. Ими-хиӆєм па Вот пухєм пиӆа паюм вәӆум вєрсум па хотєм пєӆа щи шәшумсум.
Тәп постум тӑхєма юхӑтсум, ухєм муӆты вўрн еша шивємӑсы па ма хотємӑн, ма нурємӑн нєш щи уӆӆум. Ащєм па Ими-хиӆы оӆӑңӑн моньщ моньщӑӆ. Ма нях мулӑңа ӆўв пєӆаӆа ӑңкӑрмӑсум, сємңӑӆам тәхӑрсӑӆам па щи нємасыя тәп вуюмсаюм.

Петя Молданов путӑртӑс (09.02.2012)
Нєпек щира Татьяна па Тимофей Молдановңӑн ӆэщӑтсӑңӑн