Шуши мирев культура - Культура обско-угорских народов

«Мўв-авӑт па Хӑннєхә» йис пурмӑсӑт ӑкӑтты па шавиты хот рәпатнекӑт ӑнтә тәп әмӑщ ванӆтупсэт вєрӆӑт па Югра мўвӑт-автӑт хўват экспедиция яӊхты-мӑнты ӛш ӆэщӑтӆӑт, ӆәӆн мўң мўвев арсыр вєрӑт оӆӑӊӑн уша вєрты па катра пурмӑсӑт мущатты – ванкўтӆы ӆыв сыр-сыр вәнӆтӑты хӑрӑта вошӑӊ мир ӑкӑтӆӑт. 

Вәнӆтӑты хӑрӑт ӆыв шуши мир вєрӑнтты оса тӑхи ёх унтасн па ӛрн эщӑтӆӑт. Кәщая тӑта айӆат нє Надежда Молда­нова вәӆ. Ияха катӆӑсман тӑм ёх апрӑӊ па вєрӑӊ шуши хуятӆўв вәнӆтӑты хӑрӑта, ӆўӊтупсэта ӑкӑт­ӆӑт, ӆәӆн ияха йис шўкщӑты вєрӑт оӆӑӊӑн тәса уша павӑтты. 

Сәрханӆ вошн Историко-куль­турной центр «Йис Сәр­ханӆ» нємуп тӑхийн «Питы вухсар оӆӑӊӑн вєрум хот йит» вәӆ.

«Россия мўв рәт ясӊӑт ӆавӑӆты оӆ» нємпи форум пурайн Ёмвоша арсыр мўвӑт эвӑӆт мир юхтыйӆсӑт. Ӆыв кўтэӆн Таймыр мўв Дудинка вош эвӑӆт Светлана Нереевна Жовницкая вәс. Ӆўв, нєш, нганасан мир пӑта 1999-мит оӆн оӆӑӊ­мит «Букварь» єсӆӑс.

«Год языков коренных народов в России» (ай кєр тыӑщ 21-22-митн Ёмвошн вәс) нємуп Мўвтє мирхотн рәт ясӑңа няврє­мӑт вәнтӑты нєңӑт ияха ӑктӑщийсӑт. Щӑта Башкортостан, Коми Республика па Краснодарской мўв эвӑт вәум нєңӑт ай павӑтсӑт, хутысаты ыв эвет па пухӑт вәнтӑӑт. Хӑнты ясӑң оӑңӑн ӑшколайн рәпитты нє Галина Лаптева ищи путӑртты вўтьщиӑс, тәп ӑн алємӑс.

Вән кєр тыӆӑщ 6-митн Ёмвошн «Югорский лыжный марафон» нємпи ӆухӑӊ кӑсупсы мӑнӑс. Щив Россия мўв яма ӆухн кӑсты ёх, па хон пєлӑк яртъяӊ мўв эвӑӆт мойӊ па кӑсты хуятӑт юхтыйӆсӑт. Кӑт щурӑс ветсот муӆтас хӑннєхә ӆухн хәхӑӆсӑт. 

Ӆыв пирисӑт, муй арат киломєтра хәхӑӆты ӆӑӊхаӆӑт: вет, хәс вет муй ветъяӊ. Щи кўтн кашӑӊ оӆ шуши хуятӑт ищи нымӑӆн хәхӑӆман кӑсӆӑт. Ӆыв кӑсты ӛшеӆ тӑм пўш 2020 мєтра хўваттыйн вәс. 

Ай кєр тыӑщн Мегион вошн няврємӑт хурӑт хӑншты вєра вәнтӑты ӑшколайн Светлана Солодиловайн хӑншум хурӑт эвӑт «Пространство настроений» нємпи вантупсы вәс. Ӆўв веншӑ пєы вантӑн – ўв щимӑщ ӑткӑш ими, щирн хура ищимщӑт. Ӆўв хуран вәупсыйн иты мўв-авӑт, ияха хурамӑңа пунум єтутӑт, хӑннєхәйт. Светлана – хурамӑң па сӑмӑң имие, щирн ищимӑщ хурӑт хӑншӑ.

Ай кєр тыӑщ 6-митн «Най Аңки» нємуп хӑр етшуптум хӑтӑн Ёмвош киникайт мийяты хотн Егор Морозов пиа вәйтантупсы вәс.

Ай кєр тыӆӑщ 28-29-мит оӆн Ёмвошн ремёслайт па промыслӑт Центр хот хуща няврємӑт пӑта «Ремёсла и промыслы: прошлое и настоящее» нємпи XIV-мит конференция вәс.

Мосӆ лупты, хуты мєт сыры тәнӆуп па ай кєр тыӆӑщӊӑнӑн Хулимсунт, Белый Яр, Урай, Мегион, Лянтор, Сәрханӆ па Нижневартовск вошӑтн ищимӑщ научно-практической мирхотӑт вәсӑт. Щӑта няврємӑт соткєм научной нєпек ӆўӊӑтсӑт, щи тумпи ӆыв щи арат вәнӆтыйӆты хӑрӑт ӆэщӑтсӑт. Ияха ӆўӊӑтты ки – 800-кєм хуят щи мирхотӑта юхтыӆӑс.

Кашӑӊ оӆ хӑнтэт па вухаӆьт Вурӊа хӑтӆ вєрӑнтӆӑт. Вурӊа имев мєт сыры увӑс мўвева юхтумтӑӆ, хуӆна ӆоньщ уӆ. Хән ӆўв тыв юхӑтӆ, еша вәӆ хӑтӆӑт хошума щи йиӆӑт.  

Вән кєр тыӑщ 13-мит хӑтӑн Ёмвош па округ эвӑӆт мойӊа юхтум  мир Вурңа имев емӑӊхӑт постӑсӑт. Хӑт кўтупн Бориса Лосева нємпи рўтьщӑты хӑра ар мир няврємӑт пиа ӑктӑщсӑт.