Айкеԯӑт - Новости

Кашӑӊ оӆ лыпӑт хойты тыӆӑщн 18-мит хӑтӑӆн мўвӑт-йиӊкӑт, вәнтӑт вантман тӑйты ёх мӑӊхӑтӆ постӑӆӑт. Щи вєр вўраӊӑн Ёмвошн «Югра-Экспо» хуща «Югорский лесной фо­рум» нємуп вән мирхот мӑнӑс. Тӑм мирхот округ правительства кәщайт, округ мўв-авӑт ԯавӑԯман тӑйты вєрӑт тәты департамент па Югра мўв вәнтӑт вантман тӑйты тӑхи ёх ԯэщӑтсӑт.

Москва вошн нӆ хӑтӆ мӑр Югра мўвев оӆӑӊӑн ванӆ­тупсыя 20 щурӑс муӆтас хуят юхтыӆӑс. Ӆыв ӑнтә тәп сыр-сыр пурмӑсӑт вантсӑт, кашӑӊ хуят муӆты әмӑщ ут вєрты па єпӆӑӊ ӆєтут ӆавємӑты вєритӑс. 

Кӑсупсыйн Югра мў­вев оӆӑӊ тӑхия питӑс, кимӑт тӑхи – Ямал мўв ёх вўсӑт, хәӆмит тӑхийн – Камчатка мўв хуятӑт. Мєт вән Гран-при мойӆупсы Сахалин мўв хуятӑт ёша павӑтсӑт. 
Кашӑӊ щив юхтыӆум оса тӑхи муй па ӆўв саттэӆа вәӆум хуят ищи мойӆӑсыйт па ишӑк нєпекӑтн мӑсыйт. 

Югра мўв тәса вє­рӑнтты хӑннє­хуя­тӑт лыпӑт хойты ты­ӆӑщ 14-мит хӑтӆ вўш эвӑӆт па 18-мит хӑтӆ вәнта Москва хон вошн Мўвтєӆ мир «Сокровища Се­ве­ра» XVII-мит ванӆтупсыйн рә­питсӑт. 

Югра мўвев делега­ция тӑхия ӆуӊум вєрӑнтты ёх мєт ар хӑн­нєхә тӑйс.

Лыпӑт хойты тыӆӑщ 16-18-мит хӑтӆӑтн Нуви сӑӊхум вошн хәӆмит пўш «Сияние Севера» нємпи мўвтєӆ мир ариты, якты ёх фестиваль вәс. Щит Нуви сӑӊхум район сєма питум хӑтӆӑӆ пурайн ӆэщӑтман вәс. Тыв Россия мўвевн па па хон пєлӑк мўвӑт арсыр ясӊӑтн арӑт ариты, якӑт якты мир юхтыйӆсӑт. Щит Россия, Армения, Грузия, Белоруссия, Мексика па Доминиканской мўвӑт эвӑӆт юхтум мир.

Атынг нявремыт шко­лаета ёхытсыт. Тывен шенгк ям, что школает нох тэсятса па итып мастерской верса. 

Полноватской куттып школа итпа ис, но мет мосты вер сит антом. «Школа утыпсы пита яха ат утсынгын» – си закон посны школаит па сира верты питсаит. Там от нявремыт итып программа посны унтлтыйтты питтыт.

Там школа учителит ре­шитсыт, тутн нявремыт ар унтлтаты отны ант маты па си кутны практичес­кой верыт арамты рупутая унтлтаты пата.

Кашинг от школа омыс­ты вер арамтл. Там от Чеускино хоси ни­выт клас­сып школа верта. Лямино хоси итып шко­ла етшипты вутсис. Аганской тапыт классып па Сургутской няты кла­ссып школайн­гын нох тэсяттайнгын.

Сургутской куттып шко­ла учителит пата кат хот етшиптатыйнгын.

Шимит хатл хасис итып учебной от унта. Кашинг школа нох тэ­сятта, тутн нявремыта унтлтыйтты ям ат утыс. Ситы яма нявремыт вуты Ларьякской куттып школа тэсятытыс. Там школаны курыт итпа верымыт, пар­таит отипны нэрымыт. Тата тат унта мосты арат тутьюх сопастым. Ов хоси итып плакат верым. 

С. Волков

Луговской куттып школа (Ём вош, район) йитып от хуньсита 25 август унта тэсятса. Учителитны директор школа Малышкин М.М. ёш итпины классыт, пар­таит отипны нэрсаит. Сята яма рупитсыт Анд­реева Ф.Е., Чаунина Д.П., Ржанова Л.В. па янас учителит. Сит то­хитпи отынгмит классыт парта ухтытат, классной сохыт няр пум хорасып отипны, а па тахитат парта хосьны хопшат отипны нэрсаит. Ситы версаит школаны сит пата, партаит па клас­сной сохтыт тутн па от иса классытны ситы верта. Симись памтыпсы журналны «Народное образование» уил. 

Сытоминской куттып школа нох тэсятты вер­ны нётыпсы Сургутской район эвыт «Родина» колхоз ёх вертыт. Тыв кат ота си ис нётты питмет и кашинг от 15 сёрыс шоитны мийтят. 

Там от колхоз средс­тваны колхозникытны школа итып хотхарны, хоттангытны, итып ку­рытны и па отытны верса. Интам школа новия, хошма ис.

С. Афанасьев 

Кашӑӊ оӆ лыпӑт хойты тыӆӑщ оӆӑӊ хӑтӆ еӆпийн Ёмвош округевн вәнт шушетн па ай кәртӑтн вәӆты няврємӑт ӑшколая ӑкӑтӆыйт. Щи пӑта нємасыя кәща ёх муй па учителят вертолёт тўтӑӊ хопн ай кәртӑт па вәнт шушет хўват ӊхӆӑт. Тӑм пўш ищи щи вєр ӆэщӑтсы. 

Нуви сӑӊхум район Касум кәрт кәща ими Алсу Назырова вәйт ӆор тыӆӑщ 29-31 хӑт­ӆӑтн Вўтвош, Тәрумӆор вош па вәнт шушийн вәӆ­ты хуятӑт хущи ӊхӑс. Ӆўв щив мосты кўрус тәс па няв­рємӑт Касума ӑкӑтсӑӆэ.