Айкеԯӑт - Новости

Щиты мўӊ аӆьщӑсўв етнхот, мӑта Вуаң Победа мӑңхӑт епийн Ас нопӑтты тыӑщ 6-мит хӑтӑн Ёмвошн «Югра ыңуптӑты» оса тӑхийн вєрсўв. «Вуаң нух питум хӑт арсыр мир унтасн тывӑс» нємпи вәйтантуп­сы мӑнӑс.

Оӆӑт вєра сора мӑнӆӑт, ин 77 оӆа щи йис, хән мўӊ Нух Питум мӑӊхӑтӆ тӑйты питсўв. Тәп щи шәкӑӊ вєрӑт ин па ма нәмӆӑӆўв, щи вєрӑт оӆӑӊӑн и хӑннєхә па хӑннєхәя путӑртӑӆ, и нәптӑӊ ёх па нәптӑӊ ёха путӑртӆӑт. Щимӑщ хӑннєхә мўӊ мўвевн ăнтә, мӑта хотӑӊ ёхӆаӆ щи ӆаӆь пурайн шәк ӑн вантсӑт.

Тӑм ванӑн «Хӑнты ясӑӊ» газетаева Сўмӑтвошӑӊ путрӑт хӑншты хуят Леонид Бабанин пищма хӑншӑс. Нєпекн ӆўв айкеӆ тәс, хуты Сўмӑтвош район сыры кәщая вәӆум хуят Владимир Фомин па ӆўв ӆӑӊкăр хәйӆ Сергей Титов унтасн Ас нопӑтты тыӆӑщн хўӆ веӆпӑсӆӑты ёха хўӆ веӆты кєншӑка питӆ.

Тӑм ванӑн Ёмвошн РИЦ «Югра» нємуп айкеӆӑт ӑкӑтты хотн XIX-мит мўвтєӆ мир «Спасти и сохранить» нємпи телефестиваль оӆӑӊӑн айкеӆ тәты щира мирхот ӑктыйӆсы. Тыв округев ӆуваттыйн мўвӑт-автӑт авӑты, вәнт войт-хўӆӑт, вәнтӑт ӆавӑӆман тӑйты вєр тәты тӑхи кәща кана вәӆты хә Алексей Ковалевский, вуӆаӊ хурӑт хӑншты ёх музей хуща рәпитты нє Елена Мотова па Югра мўвн ӆэщӑтум пурмӑсӑт, ӆєтутӑт па па сыр-сыр утӑт па хон пєлӑк мўвӑта тыныты щира китты вєрӑт тәты вуӆаӊ кәща нє Ирина Гайченцева нємасыя вохсыйт.

2023-мит оӆ лыпӑт хойты тыӆӑщ вўш эвӑӆт шуши мир ӑшколаятн няврємӑт программа щирн рәт ясӑӊа вәнӆтӑты питӆыйт. Щи оӆӑӊӑн шуши мирӑт Ассамблея мирхот пурайн вәнӆтӑты вєрӑт тәты департамент кәща хә Алексей Дренин лупӑс.

Россия мўвев Правительствайн 2022-мит оӆ ай кєр тыӆӑщ 16-мит хӑтӆӑн 376 нємпи поступсы хӑншман вәс, хутыса 2022-мит оӆн мир рәпата кӑншты нётӆыйт.

Щи поступсы хўват ӑн рәпитты ёх:

- психолог хуятн нётӆыйт;
- мосты рәпата кӑншты нётӆыйт;
- еӆӆы м па мосты рәпатая вәнӆ­тыйӆты вохӆыйт;
- кӑт муй еша аршӑк тыӆ­ща рәпа­тая вўӆыйт;
- ӆыв саттэӆа вєр тәты нётӆыйт.

Ешавәӆ йиӊк хўӆӑт тови хәйтупсыя щи мӑнӆӑт. Щи тәрум партум вєрӑт еӆпийн Югра Росгвардия па округ Природнадзор па Росрыболовства Нижнеобской территориальной управления хуща рәпитты ёх ха пиӆтӑщман айкеӆӑт ӑкӑтты па хӑншты ёх пиӆа вәйтантсӑт. Тӑмӑщ вәйтантупсы кашӑӊ оӆ вәӆӆяӆ.

Путӑртты вєреӆ – щит муй вўрн ха пиӆтӑщман вой-хўӆ веӆпӑс вєрӑт ӆэщӑтты.

Щи оӆӑӊӑн округ дума нивӑӆмит мирхот пурайн уша йис. Щит вән кєр тыӆӑщ 21-мит хӑтӆӑн вәс. «Шуши мира тәрум пӑта юридической нётупсы» нємпи поступсы хўват хўӆ, вой веӆпӑсӆӑты, вўӆы тащ ӆавӑӆты вєрӑт тәты ёх нётты питӆыйт.

Шуши мир ассамблея кәща хә Еремей Айпин эвӑӆт иньщӑссы, щи йис вєрӑт тәты пурайн шуши хә атум вєр вєрӑс ки, тәрум пӑта нётӆы муй ӑнтә? Юх­ӆы увӑс мир ассамблея тӑхи кәща хә лупӑс: 

Ас нопӑтты тыӆӑщ ртъяӊмит хӑтӑӆн Ёмвошн округев ӆуватн вәӆты хӑннєхуятӑт Вуӆаӊ ӆаӆьн нух питум ёх мӑӊхӑтӆ постӑсӑт. Щи пурайн ӆаӆьн вәӆум па щи оӆӑтн рәпитум хуятӑт, Югра мўв кәща нє Наталья Комарова, Ёмвош кәща хә Максим Ряшин, мӑӊхӑтӆ мӑнты мӑр парад ванӆтӑты па «Бессмертный полк» тӑхийн шәшты хӑннєхәйт вәсӑт. 

Иха ӑктӑщум хә ёх, нєӊӑт па няврємӑт еӆпийн мєт оӆӑӊӑн м вўща ясӑӊ округ кәща нєӊев Наталья Комарова тӑмиты тәса путӑртӑс:

Вән кєр тыӆӑщ 8-мит хӑтӆӑн «ВКонтакте» соцсеть хуща онлайн щирн мирхот вәс, щӑта шуши мир нётупсэт оӆӑӊӑн путӑртсы. Щит внутренней политика департамент тӑхи кәща хә Александр Скурихин тәс.