Айкеԯӑт - Новости

Муй щирн м рәпатая нынана питты, щит тӑм йисн шєӊк ӆавӑртӑӊ па щухӆӑӊ вєр.

Арсыр айшӑк муй вән­шӑк айкеӆӑт иса мўӊ вәӆты-хоӆты щирӆўва тӑмхӑтӆ юхӑтӆӑт. Кашӑӊ хӑннєхә сотовой телефон, Ин­тернет юӆн тӑйӆ, щитӑт унтасн арсыр социальной вєрӑт уша павӑтты вєритӆ, тынєсты па ӆәтӑсты, ӆўвеӆа мосты нємӑӊ нєпекӑт ӆэ­щӑтты щир тӑйӆ.  

Югра Дума хуща вән кєр тыӆӑщ 8-мит хӑтӆӑн увӑс мир Ассамблея хуща мирхот вәс. Щи мирхота мўӊ Югра хуща веӆты увӑс мир «Вурӊа хӑтӆ» пӑта ёх ӑктӑщсӑт.

Там мирхотн Югра де­путатӊӑн Еремей Айпин па Татьяна Гоголе­ва вәсӊӑн.

Вән кєр тыӆӑщ 19-мит хӑтӆӑн шуши мир ассамблея мирхот вәс, щит тӑм тӑхи кәща хә Еремей Айпин тәс. Тӑмхӑтӆ вет вєр нух вантсы. 

Мєт сыры мўв иӆпи питы вуй вўт тӑхи вєрӑт тәты департамент кәща хә Сергей Филатов вәнт шушет пӑта поступ­сы оӆӑӊӑн ай тәс: 

Ай кєр тыԯӑщ 24-мит хӑтӑӆн Ёмвошн Югра мўв арсыр мирӑт пурмӑсӑт вєрты хотн няврємӑт па айԯат ёх пӑта «Ремёсла и промыслы: прошлое и настоящее» нємпи XVII-мит межрегиональной ԯўңтупсы па вєрӑнтты хӑр вәc. Тӑм вәнӆтӑты хӑр 2004-мит оӆ вўш эвӑӆт Ёмвош ремёслайт хотн рәпитты ёхн ӆэщӑтты питсы. Щи пура вўш эвӑӆт кашӑӊ оӆ Россия па Югра мўв вошӑт, вән па ай кәртӑт эвӑӆт вєртутӑң няврємӑт арсыр мирӑт йис па йиԯуп пурмӑсӑт оԯӑңӑн ԯўңтупсэт ԯўңӑтӆӑт па ванԯтӑӆӑт, муй щирн щитӑт вєрты мосԯ.

Устав поступсы щирн, «Титул» нємуп ак­ционерной тӑхи кәща ёх 2022-мит оӆн вән кєр тыӆӑщ 26-мит хӑтӑӆн вән мирхот ӆэщӑт­ты вўтьщӑӆӑт.

Щи мирхотн кәщайт путӑртӆӑт:

- Муй щирн па хуты тӑм юхи хӑщум оӆ мӑр ӆыв рә­питсӑт, муй щирн ӆыв ву­хӑт аршӑка вєрсӑт, мӑ­та тӑхета вух сухуптӑсӑт.
- Аудитор хә йиӆпа пи­риты вєр оӆӑӊӑн.
- Кәща ёх совет йиӆпа пириты вєр оӆӑӊӑн.

Ёмвошн ай кєр тыӆӑщн 25-мит хӑтӆӑн Россия мир йис вәӆупсы нух ӆэщӑтты оӆ оӆӊит­са. Тӑм оӆ мӑр Югра мўвевн сыр-сыр вєрӑт нух ӆэщӑтӆайт па йиӆуп вєрӑт вєрты питӆайт, Россия ӆуват вєрӑт мўӊ мўвевн па вєрӆўв.

Югра хуща вәӆты хотӑт омӑсты департамент тӑхийн поступсы нєпек вәӆ, муй вўрн округевн вәӆты увӑс мир йиӆуп хотӑт ёша павӑтты пищ тӑйӆӑт. Щи ясӑӊ мӑнӆ щи хуятӑт оӆӑӊӑн, мӑта ёх 2014-мит оӆ ван хӑтӆуп тыӆӑщ 31-мит хӑтӆ вәнта хот ӆәтты муй хот омӑсты  вух вохты нєпекӑт хӑншсӑт. Щи вухӑт мӑӆыйт кан хот омӑсты муй па кан хот йит вән вошӑтн ӆәтты пӑта.

Тӑм мӑнум 2021-мит оӆн тӑмӑщ вух 395 семьяяӊ хӑннєхә ёша павӑтсӑт, иса мира 1254,98 млн вух ортса.

Ай кєр тыӆӑщ 21-мит хӑтӆ – щит Мўвтєӆ мир ӆўӊтупсэт хӑншты ёх хӑтӆ, щирн Москва хон вошн Россия мўвев хӑншты ёх «Поэт года», «Писатель года» нємпи литератур­ной премияйӊӑн ёша хоӆумсӑт. 

Щив вет щурӑс муӆтас хӑншты ёх ӆыв стихӆаӆ, путӑрӆаӆ китсӑт. Щит эвӑӆт мєт м хӑншты 300 хуят пирисы. Щи ёх кўтн мўӊ хӑнты хәев Вячеслав Юрьевич Кондин, ӆўв «Поэт года» премия хоӆумтӑс. Ин ӆўв хәӆум «Бессмертный полк», «Любовь», «Рыбачка» стихӆаӆ «Поэт года» киникайн хӑншман вәӆӆӑт.

Ай кєр тыӆӑщ 30-31-мит хӑтӆӊӑнӑн Ямало-Ненецкой округ Пуӆӊавӑт вошн «Ялякоця» (хӑнты щирн «тӑр хӑтӆ») нємпи кимит няврємӑӊ вән мӑӊхӑтӆ-кӑсупсы вәс. 

Ай кєр тыӆӑщ оӆӊитумн Югорской го­сударственной университет хуща Все­российской научно-практической ӆўӊтупсы вєрӑнтсы. Тӑта ӑнтә тәп Югра па Россия мўвӊӑн эвӑӆт, па хон пєлӑк мўвӑт учёнойт онлайн щирн вәйтантупсы вантты, хәӆӑнтты па ясӑӊ лупты ищи вєритсӑт.