Айкеԯӑт - Новости

Тәнӆуп тыӆӑщ сухӑнтты еӆпийн Ёмвошн шуши мир няврємӑт вәнӆтӑты тӑхийн (ин ДЭКОЦ, сыры оӆӑтн щи тӑхи «Ӆыӆӑӊ союм» нєм тӑйс) «Рәт мирєм ясӑӊ…» нємпи «ӊта пӑсан» вєрӑнтсы. Щив Ёмвош кәща ёх, арсыр оса тӑхет эвӑӆт хӑннєхуятӑт, «Хӑнты ясӑӊ» па «Луима сэрипос» редакцияев эвӑӆт па няврємӑт пиӆа рәпитты хуятӑт вәсӑт. 

Тӑм ванӑн Ёмвошн РИЦ «Югра» нємуп айкеӆӑт ӑкӑтты тӑхийн Росгвардия лицензионно-разрешительной тӑхи кәща хә Михаил Клепалов па государственной контроль тӑхи кәща хә Николай Горбатенко путӑртсӑт, муй щирн тӑм юхи хӑщум оӆӑтн ӆыв арсыр государственной контроль па лицензионно-разрешительной вєрӑт тўӊщирӑӊа па тәса ӆэщӑтсӑт. 

Вантэ, тәнӆуп тыӆӑщ 12-мит хӑтӑӆн Рос­гвардия тӑхийн рәпитты ёх мӑӊхӑтӆэӆ постӑсӑт. Госконтроль муй па ли­цензия вєрӑт артаӆӑты хӑннєхуятӑт юхи хӑщум оӆӑтн сыр-сыр вәӆупсы щирӑт Россия мўвев за­конӑт щирн тўӊщирӑӊа тәӆӑт. 

Тӑта мосванӑн 2021-мит оӆ Россия хон пєлӑк мўвев ӆуваттыйн Наука па технологияйт оӆа кантсы. Щи тумпийн округев ӆыпийн тӑм оӆэв «Кашӑӊ вєр вәйтты оӆа» постӑсы, рўщ щирн ки луптыя, Знания оӆа йис. 

Щи пӑта Югра мўвев Государственной биб­лиотека хот йитн Наука па  технологияйт оӆэв иха ӑктӑщум айӆат ёх пиӆа тәнӆуп тыӆӑщ нивӑӆмит хӑтӑӆн иса киникайт ӆў­ӊӑтты хотн рәпитты нєӊӑт пўншсӑт.
Сыры иха ӑктӑщум хӑннєхуятӑт еӆпийн щи нєӊӊӑн тӑмиты лупсӑӊӑн:  

Рәт ясӊӑт хӑтӆ постӑты вўраӊӑн мўӊ «Хӑнты ясӑӊ» па «Луима сэрипос» газетайӊӑӆўв єсӑӆты тӑхия округ дума депутат па ӛращты хә Руслан Проводников вохӑнтсўв. Ӆўв мўӊева депутат рәпатайӆ оӆӑӊӑн путӑртӑс.

Руслан Проводников Сўмӑтвошн сєма пи­тӑс па єнмӑс, щӑта ӑш­колайн вәнӆтыӆӑс. Ӑӊкеӆ – вухаӆь нє, ащеӆ – рўщ хә. Яӊ тӑӆ ӆуваттыйн ащеӆн ӛращты бокса мӑсы. Щи тӑхийн ӛращман ӆўв Россия мастер спорта нєм па па арсыр вуӆаӊ нє­мӑт па мойӆупсэт ёша павтыӆӑс.  

Кашӑӊ оӆ 1999-мит оӆ вўш эвӑӆт тәнӆуп тыӆӑщ 21-митн мўӊ мўвев хўваттыйн рәт ясӑӊ мӑӊхӑтӆ постӑӆы. Щи хӑтӆӑн Югра мўвевн 2015-мит оӆ вўш эвӑӆт шуши мирӑт хӑнты, вухаӆь па юрн ясӊӑтн диктант хӑншӆӑт.

Тәнӆуп тыӆӑщ 5-митн Ёмвошӑӊ хурӑт вантты хотн округ кәща нє Наталья Комарова коронави­рус мәш мӑӆты ёха Россия мўв государственной па округ эвӑӆт ишӑкты нєпекӑт мойӆӑс.

Щи пурайн ӆўв ӑктӑ­щум ёха лупӑс: «Нын иса муй вєрӆӑты, ӆәӆн округев, Россия мў­вев ӛрӑӊа па тащӑӊа ат йис».

Интӑм шуши ёх вәӆты хотӑт ӆәтты щира субсидия вухӑӊ нётупсыйн мӑӆыйт. Хән щи нєпекӑн хӑншаньщум ёх хуԯыева нётӆыйт, кәща ёх йиӆуп программа вєрӆӑт, ӆәӆн шуши хуятӑт еӆӆы ищиты нётупсыйн ат мӑсыйт.

Тӑм ванӑн округ кәща нє Наталья Комарова мирхот вєрӑнтӑс, щӑта уша йис, хуты Сўмӑтвош районӑн 2021-мит оӆн хәӆум йиӆуп ӑшкола пўншӆы.

- Няксимволь кәртӑн интӑм сыры пәӆьницая вәӆум хот йиӆпатӆы, щӑта ай няврємӑт хӑтӆ мӑр ӆавӑӆты питӆыйт. Ин щи хот 96 % вєрсы. Щив иса мосты хот пурмӑсӑт, мосты щўӊкӑт ӆәтсыйт, – лупӑс Наталья Комарова.

Ван хӑтӆуп тыӆӑщн 29-мит  хӑтӆӑн Федеральной закон № 473-ФЗ єтӑс. Щи поступсы щирн 2021-мит оӆ эвӑӆт оӆӊитман Ас хӑӆты тыӆӑщ оӆӑӊ хӑтӆ эвӑӆт сыр-сыр рәпата вєрты ёха 12 792 шойт эвӑӆт шимӆ тыӆӑщ вух сухуптӑты ӑн рӑхӆ. Щит МРОТ нємуп поступсы тӑйӆўв, мӑта тӑхийн хӑншман вәӆ, муйкєм киньща шимӆ тыӆӑщ вух рәпитты ёха сухуптӑты ӑн рӑхӆ.

Йиӆуп тыӑщ сухнум ӆєпн Ёмвошн интернет мухты «Югра ыңуптӑты» тӑхи хуща рәпитты ёх мирхот эщӑтыйӆсӑт. Видео щирн Нуви сӑӊхум, Сәрханӆ, Сўмӑтвош па Манстӑр вош районӑт па Нягань, Нижневартовск, Ӆӑӊкипос, Мегион, Пыть-Ях, Сәрханӆ, Лянтор па Урай вошӑт эвӑӆт «Югра ыңуптӑты» тӑхи кәща ӆӑӊкӑр ёх путӑртсӑт.