Айкеԯӑт - Новости

Югра мўвн хӑнты, вухаӆь па юрн мир ясӊӑтн айкеӆ ӆэщӑтты кєша «Развитие гражданского общества» поступсы хўват кашӑӊ оӆ нётупсы субсидия вухӑт єсӆыйӆӆайт.

Ас хӑӆты тыӆӑщ 28-мит хӑтӑӆн «Русское географическое общество» нємуп Россия мўвтєӆ мир тӑхия ӆуӊум хӑннєхә, сыр-сыр мўвӑт тәса вантман тывеӆт-тухеӆт ӊхты хә Ильдар Маматов па  «Управление по развитию туризма и внешних связей» кәща нє Анна Линкер кашащты нєпека ёш пос пунсӑӊӑн. 

Кашащты нєпек нє­масыя ӆэщӑтсы, ӆәӆн аршӑк мойӊ мир Увӑс мўвева ат юхтый­сӑт. Щи пӑта интӑм Ём­вошевн «Северными маршрутами экспедиции Беринга» нємпи йиӆуп туристической вєр пўншты ӆӑӊхаӆы. 

2020-мит оӆн Югра мўвев хўваттыйн 90 община нєпека хӑншман вәс, хуты ӆыв шуши мир йис вєрӑт ӆыӆӊуптуман рәпитӆӑт.

Ас хӑӆты тыӆӑщ 26-мит хӑтӑӆн Ёмвошн «Югра» нємуп айкеӆӑт ӑкӑтты тӑхийн округев телевиденияйн, радивайн муй газетаитн рәпитты хӑннєхуятӑт нємасыя Югра мўвев пенсияйн вәӆты пирщамум хуятӆўва вухӑт сухуптӑты тӑхев кәща нє Татьяна Зайцева пиӆа вәйтантыйӆсӑт па путӑртсӑт. 

Мӑнум номерн ма «Юрий Вэлла щирн вўт кәртӑн ӑшкола-ясли-хот» нємпи вәнӆтӑты вєр оӆӑӊӑн ай павӑтсум. Хӑншсум, хуты интернет хуща йиӆуп онлайн щирн ӆэщӑтум вәнӆтӑты хӑрн Сәрханӆ мўвн па Нуви сӑӊхум район Тўкъякӑӊ кәртӑн пушхӑт мӑнум оӆ лыпӑт хойты тыӆӑщ оӆӑӊмит хӑтӆ вўш эвӑӆт вәнӆтӑты вєр оӆӊитсӑт. 

Тӑм ванӑн Ёмвошн мирхотн имет оӆӑӊӑн путӑр манӑс. Муй вўрн имет тӑм атум мәш суртӑн па мәш йира питты пийн сыр-сыр мўвӑт нух ӆэщӑтты ӛр па пищ тӑйӆӑт. Тӑм ӆавӑрт суртэв пийн вәӆупсы сыры щира хән мӑнӆ, щи пӑта имета йиӆуп рәпатая вўянтты мосӆ. 

Югра кәща нєӊев Н. Ко­марова тӑм тӑхийн ищи вәс па путӑртӑс. 
Россия ӆуваттыйн Ас хӑӆты тыӆӑщн 2021-мит оӆн йиӆуп закон єтӑӆ. Щи поступсы мухты юӆн омӑсман мира мосты рәпата вєрты пищ вәӆ. 

Мӑнум оӆн па ин вәнты ӆавӑрт пандемия пурайн иса тохтурӑт, лекщитты нєӊӑт, «Скорая помощь» машинайн ӊхты ёх мєт ар рәпитӆӑт. 

Щирн мўӊ ӆӑӊхаӆўв лупты вән пәмащипа ясӑӊ Касум вошн пәӆьницайн рәпитты хуятӑта. Ӆыв мирева нётман атӆ-хӑтӆ ӆыв вєрӆаӆ тәӆӑт, мир лекщитӆӑт. Тӑӆаӊа, ма вәӆаты! Григорий Пет­рович Канев нын пӑ­тӑна стихотворения хӑншӑс, щӑта Россия мўвев иса леккӑрӑта, пәӆьницайн рәпитты хуятӑта вән пә­мащипа ясӊӑт тәӆ ӆыв ӆавӑрт па мєт вуӆаӊ рә­патаеӆ пӑта!

Ас хӑӆты тыӆӑщн 21-мит хӑтӆӑн Ёмвошн путӑр мӑнӑс, муй вўрн нётты ёха, мӑта хуятӑт хотӑт ёша павӑтты пӑта, хотӑт омӑсты пӑта вух сырышӑк мӑсӑт, па щи пийн хотӑт омӑсты тӑхет вухӆы хӑщсӑт, кәсӆы йисӑт, еӆӆы хотӑт вєрты ӑн пӑкӆӑт. Муй вўрн вух миюм хӑннєхәя нётты, хотн мӑты муй па вухӑт юхӆы кєрӑтты.  

«Хӑнты ясӑӊ» нєпекев ӆўӊӑтты тынӑӊ хуятӑт! 2020-мит оӆэв щи сухнӑс. Тӑмхӑтӆ нын 2021-мит оӆн єтум «Хӑнты ясӑӊ» газетаев оӆӑӊмит номер ёша вўсӆӑн.

Мӑнум оӆн мўӊ кӑт вуӆаӊ мӑӊхӑтӆ пос­тӑсўв. Щит Вуӆаӊ ӆаӆьн нух питум хӑтӆ вўш эвӑӆт 75-мит оӆ мӑнӑс па Ёмвош округев 90 тӑӆа йис. 

Мӑнум 2020-мит оӆн мўӊ нын пӑтана рә­питсўв, әмӑщ айкеӆӑт, путрӑт, моньщӑт, арӑт хӑнш­сўв. Мўӊ пиӆэва и ӛрн, и нумӑсн рәпитты хуя­тӑта вән пәмащипа луп­ӆўв. Сӑм хӑрӆўв вўш эвӑӆт нынана вән вўща па хо­шум ясӊӑт китӆўв.