Кашӑӊ хоттєӆ ёх хуща Вуӆаӊ ӆаӆьн ӆа­ӆясум ёх муй па щи пурайн тарма рәпитум хуятӑт вәсӑт. Ваньщавӑт кәртӑн ай пушхӑт вәнӆтӑты па ӆавӑӆты хотн Вуӆаӊ ӆаӆьн нух питум хӑтӆ вўраӊӑн нємасыя вәйтантупсы вєрӑнтсы. 

Воспитателя рәпит­ты нє Руфина Про­копьевна Гришкина ай пушхӑта ӆыв вән щатьща­щиӆаӆ-аӊща­щиӆаӆ, вән щащиӆаӆ-аӊкаӊки­ӆаӆ оӆӑ­ӊӑн путӑртӑс. 

Щи ёх оӆӑӊӑн, хуйтат ӆаӆя тәсыйт па ӆыв щӑта така ӆаӆяссӑт. Итәх хуятӑт юхи ӑнт юхӑтсӑт, веккеши ӆаӆь хӑрӑтн хӑщсӑт. Щи икет, хуйтат юхӑтсӑт, ӛхӑт колхосн ӛр ӑн шалитман рәпитсӑт, ӆаӆь пийн рәт мўвеӆ нух аӆумсӑт. 

Юӆн пирӑщ ёх, имет па няврємӑт хӑщсӑт, ӆыв икет кана ӆавӑрт рәпата тә­ты питсӑт. 

Няврємӑт вәнӆат рәт­ӆаӆ оӆӑӊӑн хәӆӑнтсӑт, хуты­са ӆыв ӆаӆяссӑт, муй щирн рәпитсӑт. Итәх пушхӑт оп­ращӆаӆ оӆӑӊӑн вәйтсӑт. Ӆывеӆа щи оӆӑӊӑн вән ёхӆаӆ путӑртсӑт. Татьяна Семёновна Колупайло хиӆыӆаӆа Марфа Ефре­мовна Молданова вән аӊкаӊкеӆ оӆӑӊӑн лупӑс, хутыса ӆўв ӆаӆь пурайн вән хуятӆаӆа нётӑс. 

Щӑӆта ай пушхиет Ву­ӆаӊ ӆаӆь оӆӑӊӑн стихӑт ӆўӊӑтсӑт, хурӑт хӑншсӑт па Победа хӑтӆ пӑта отк­рыткайт вєрсӑт. Ин ӆыв ӆаӆясум па щи пурайн рәпитум рәтӆаӆ оӆӑӊӑн ма вәйтӆӑт.

- Щимӑщ вәйтантупсэт няврємӑт пӑта мосӆӑт, – лупӑс Руфина Проко­пьевна. – Пушхӑт щи вў­раӊӑн рәтӆаӆ оӆӑӊӑн уша павӑтӆӑт па рәт мўвеӆ сӑ­мӑӊа тӑйты вәнӆтыйӆӆӑт.

Руфина Гришкина китум айкеӆ щирн 
хӑнты ясӑӊӑн хӑншӑс: Надежда Вах