Лыпӑт хойты тыӆӑщн 21-мит хӑтӆӑн Ём­вошн округ Дума хуща ӆаӆь хӑрн вәӆум хӑннєхәйт, ӆыв хотӑӊ ёхӆаӆ, ӆывеӆа нётты хуятӑт па ӆыв саттэӆа вєр тәты ёх иха ӑктӑщийӆсӑт.

Тӑм вәйтантупсыйн мевӆ посӑт кант­сайт щи ёха, мӑта хуятӑт ӆаӆь хӑрн вәӆум мирева па ӆыв хотӑӊ ёхӆаӆа нёт­ман вәӆӆӑт.
Тӑм ӑктупсыйн юхтум мирева мєт сӑма хоюм вєр – щит хән «Ассоциация ветеранов СВО Югры» «Иха тарма вәӆты – мўӊ ӛрев» ӆаӆь хӑрн хуӆам хӑннєхәйт ёша павтум мевӆ посӑт ӆыв хотӑӊ ёхӆаӆа кантсӑт.
Мевӆ посӑт мӑсыйт Олег Бадритдинов, Георгий За­гайкевич, Константин Ле­вин, Александр Попов па Егор Ваченков хотӑӊ ёх­ӆаӆа.
Ӆаӆь хӑрн хуӆам хуя­тӑт пӑта юхтум мирев и минута мӑра ӆоӆьсӑт па хәсӆа вәсӑт.
«Ассоциация ветеранов СВО Югры» хуща ух тәты хә Дмитрий Аксёнов ясӑӊ вўс.

- «Иха тарма вәӆты – мўӊ ӛрев» мевӆ пос – щит мўӊ вєрум мевӆ посэв. Щимӑщ мевӆ пос нємасыя ӆаӆь хӑрн хуӆам ёхӆўв пӑ­та вєрсўв. Щимӑщ мевӆ пос рәт ёхӆаӆа кант­ӆайт,  – лупӑс ӆўв. 

Вәйтантупсыйн па нёт­ты хуятӑт оӆӑӊӑн пу­тӑрт­сӑт. «Сбор ХМ» хуща ух тәты ими Кристина Фи­липпенко ясӑӊӑн: 

- Тӑмхӑтӆ тӑм нётӑсты тӑхийн 700 муӆтас ёх вәӆӆӑт. Нётты хуятӑт ӆаӆь хӑрн вәӆты ёх пӑта хошум ӆәмӑтӆяты сухӑт ёнтӆӑт, маскировочной хоӆпӑт вєрӆӑт, вухн ищи нётӆӑт па ӆаӆь хӑрн мосты сыр-сыр техника ёша павӑтӆӑт па щив китӆӑт. 

Ӆаӆь хӑрн вәӆты хӑн­нєхәйта па ӆыв хотӑӊ ёх­ӆаӆа нётты пӑта Кристина Филиппенко ишӑк нє­пекн мойӆӑсы. Щӑӆта па мойӆупсэт кантсайт ӆыв саттэӆа вєр тәты ёха па щи мирева, мӑта хуятӑт ӆаӆь хӑрн вәӆум ёха нётӆӑт.
Вәйтантупсыйн мєт әмӑщ вєр вәс, хән Дмит­рий Аксёнов «Орден Му­жества» мевӆ посн мой­ӆӑсы, щитӆ ӆўв мев­ӆӑӆа иха ӆаӆясум ёхӆаӆн мәступса. Щимӑщ мевӆ посн ӆўв ӆаӆь хӑрн тарма вәӆмаӆ пӑта кантса.
Тӑмӑщ ӑктупсы вєрса ӆаӆь хӑрн вәӆты ёха м ясӑӊ китты пӑта па пә­ма­щипа ясӊӑт щи ёха лупты, мӑта хуятӑт лывеӆа нётӆӑт па ӆаӆь хӑрн хуӆам мирев м нумӑсн еӆӆы тӑйӆэӆ.
Тӑмӑщ тӑхетн ӑкмийӆ­ты мирева иха катӆӑсты вєр – щит ӆыв еӆӆы вәӆты пищеӆ па щит ӆыв рәпа­таеӆ.

Путӑр хӑншӑс: Пётр Молданов