Лыпӑт хойты ты­ӆӑщ 7-мит хӑтӆӑн Ёмвошн шуши мир совет мирхот вәс, щит округ кәща ӆӑӊкӑр хә Павел Тараканов тәс. Щӑта общинайт па хўӆ веӆпӑсӆӑты вєр поступсы оӆӑӊӑн путӑртсы.

Мєт сыры «Восты­хой» община кәща хә Иван Слинкин хәӆум нў­ша оӆӑӊӑн путӑртӑс. Уша йис, ӆывеӆа веӆум хўӆ ӆавӑрт тыныты. «Хан­ты-Мансийской рыбо­комбинат» тӑхи тәп ӆыв саттэӆа хўӆ веӆпӑсӆӑты ёх пиӆа рәпитӆӑт, щирн община ёх ӆыв сат­тэӆа Тюменской па Сверд­ловской областьӊӑн ёха хўӆ тыныты ӊхӆӑт. Кимит нўша – кәртӑтн хўӆ вўты тӑхи ӑнтәм. Хәӆмит нў­ша – хўӆ вўты вєр ай тын тӑйӆ. 

- Хўӆ веӆпӑсӆӑты вєр – ӆа­вӑрт рәпата, вән хуятӑт рўть­щӑты мӑнӆӑт, айӆат ёх щив ӑн йиӆӑт, щирн щи вєр айӆтыева вәтшӑӆэв, – И.С. Слинкин лупӑс. 

Ӆўв щирӑӆн, щи нўшайт нётупсы вух унтасн тўӊ­матты рӑхӆ.
Округ промышленность департамент кәща хә Виктор Гамузов путӑртӑс:

- Тӑм оӆ лыпӑт хойты тыӆӑщ 1-мит хӑтӆ вўш эвӑӆт хўӆ веӆпӑсӆӑты федеральной поступсы йиӆпатсы. И вєр – щит 2028-мит оӆн ӑӆ хуята хўӆ веӆпӑсӆӑты пӑта вох­ты нєпек хӑншты ӑн мосӆ. Общинайт, вантэ, юри­дической тӑхет, щирн щи тӑхет кәщайта еӆӆы вохты нєпек хӑншты мосӆ. Тәп и вуӆаӊ вєр – мосӆ, ӆәӆн хӑннєхә «Фе­деральный список ко­ренных малочисленных народов Севера» нєпекн хӑншман ат вәс, щит хуӆна ӑн вєрсӑты ки, МФЦ хуща вєраты. 

Еӆӆы ӆўв ястӑс, интӑм Югра мўвевн 32 щурӑскєм шуши мир вәӆ, щит эвӑӆт 25 щурӑс хуят ай кәртӑтн па вўт кәртӑтн йис вєрӑт тўвман вәӆӆӑт. Ин щи «Федеральной список» хуща тәп 16 щурӑс хуят хӑншман вәӆ. Щирн ӆўв партӑс, ӆәӆн щи мосты вєр оӆӑӊӑн ӑӆ шуши ёха йиӆпа ат путӑртсы. Вантэ, 2028-мит оӆ вўш эвӑӆт тәп щи нєпекн хӑншум ёх вохты нєпек такӆы хўӆ веӆпӑсӆӑты вєритӆӑт. 

Щи тумпи ӆўв лупӑс, ин Ёмвошӑӊ хўӆкомби­нат йиӆпатӆы, щăта хўӆ вўты тӑхи рәпитӆ, щирн хўӆ мӑты рӑхӆ.

Федерация Совет се­натор хә Александр Но­вьюхов лупӑс, муйсӑр нўша тывӆ щи йиӆуп поступсы эвӑӆт:

 2,5 щурӑс хуят эвӑӆт 15 щурӑс хуят вәнты хўӆ веӆпӑсӆӑты ёх аршӑк йиӆ. Мўӊ Россия мўвев мўв хӑри рәпата вєрӑт тәты министерства па Рос­рыболовства тӑхи кәщайт пиӆа мирхот вєрсўв, ӆәӆн уша вєрты, муй арат еӆӆы квота вєрты. Вантэ, интӑм вән вошӑтн вәӆты шуши мир ищи хўӆ веӆты вєритӆӑт. Щирн ок­ругев промышленность департамент ёха щит уша  вєрты мосӆ па хўӆ веӆты йиӆуп квота хӑншты. 

«Катра Мулымья ву­хаӆь кәрт» община кәща хә Виктор Вискунов ищи нўшайӆаӆ оӆӑӊӑн путӑртӑс. Община ёх нюхи тыныты пӑта «Честный знак» пос омӑсты ӑн вєритӆӑт, вантэ, щи пӑта хӑншты мосӆ, муйсӑр нюхеӊ завод эвӑӆт нюхи вәӆ. Община пӑта щи вєр пасыра ӆэщӑтты мосӆ. 

Кимит нўша – вонь­щумутӑт эвӑӆт арсыр єпӆӑӊ ӆєтутӑт вєрты ёха вух ӑн тăрмӑӆ, ӆәӆн воньщуму­тӑт миюм община хуятăта вух сухуптӑ­ты. Щирн мосӆ 50% арат субсидия вух щи тӑхета сыры мӑты. Хәӆмит нўша – грант нётупсы вух ӑн тăрмӑӆ, ӆәӆн мосты вән машинайӆаӆ ӆәтты. Ӆўв лупӑс, мосӑӊ, мўв иӆпи пи­ты вуй вўты тӑхет кәщай­та лупты, ӆәӆн ӆыв хуӆна рәпитты катра машинайт шуши мир общинайта ат мӑсӆаӆ.
Нуви сӑӊхум район эвӑӆт «Потум союм» об­щи­на кәща нє Мария Ис­то­мина ищи нўшайӆаӆ оӆӑ­ӊӑн ай тәс:

- А муй грант нётупсы вух кӑсупсыйн оӆӑӊмит пўш имухты итәх вохты нєпекӑт йира вўӆыйт? Итәх пурайн и община кәща хуят кашӑӊ оӆ грант нётупсы вух ёша вўӆ, щит вєр хән? Щи тумпи мосты машинайт муй па пурмӑсӑт ӆәтты грант вух ӑн тăрмӑӆ, вантэ, вохты нєпекн хӑншман вәӆ, муй арат вух мосӆ, тәп шимӑӆшӑк мӑӆы. Итәх пурайн хўӆ веӆпӑсӆӑты ёх ӑн вәйтӆӑт, хуӆта хўӆӑт мӑты. 

Мўв иӆпи питы вуй вўты па мўвӑт-автӑт ӆавӑӆты вєр тәты департамент кә­ща ӆӑӊкӑр хә Александр Комиссаров община тăхет оӆӑӊӑн ай тәс:

 Ин округевн 105 шу­ши мир община вәӆ, щи эвӑӆт 78 община хўӆ веӆ­пӑсӆӑты, вўӆэт ӆавӑӆты, воньщумутӑт, тулхӑт, но­хӑр сємӑт ӑкӑтты вєрӑт тәӆӑт. Щӑта 686 шуши хуят рәпитӆ. Юхи хӑщум хәӆум оӆ мӑр 66 миллион шойт вух общинайта мӑнӑс. Щи унтасн 223 тонна арат хўӆ, нюхи, воньщумут ӆэщӑтман вәс.

Мирхот сухнум пурайн Павел Тараканов кәщайта партӑс, ӆәӆн общинайта субсидия нётупсы вух мӑты вєр йиӆпа нух ат вантсӑт.

Путӑр хӑншӑс: 
Людмила Шульгина