Лыпӑт хойты тыӆӑщ 7–12-мит хӑтӆӑтн Ёмвошн нӆмит пўш финно-угорской пи­са­телят вән мирхот вәс. Тыв Россия мўвев финно-угорской тӑхет эвӑӆт киникайт хӑнш­ты сот муӆтас ёх юхтыйӆсӑт. Интӑм мирхот «Рәт мўв: йис вәӆупсы ӆавӑӆты вєр» нєм тӑйс.

8-мит хӑтӆӑн вән мир­хот пўншум пурайн округ кәща хә Руслан Кухарук ястӑс:

- Вуща вәӆаты, тынӑӊ мойӊ ёх, киникайт хӑншты ёх, учёнойт! Шєӊк әмӑщ, тӑм вән мирхот Россия мў­­вев арсыр мир рәт ясӊӑт хӑтӆӑн оӆӊитсы. Юг­ра мў­вевн шуши ми­р вәӆупсы ӆавӑӆты щира 34 нётупсы вәӆ. Мўӊ кә­щайӆўв пӑта мєт вуӆаӊ – щит шуши мир йис вә­ӆупсы па рәт ясӊӑт ӆа­вӑӆ­ты. Вантэ, рәт ясӊӑт ки­никайт хущи вәӆ­ӆӑт. И вән вєр вєрсўв – ву­хаӆь ясӑӊ хў­ват нєма­сыя кор­пус пўншсўв, ин щи ясӑӊ «Яндекс Переводчик» сер­вис ху­ща вәӆ. Ин ищи­мӑщ вән рәпата хӑнты ясӑӊ пӑта вєрӆўв.

Финно-угорской писа­телят ассоциация кәща хә Еремей Айпин лупӑс:
- Тӑм ӆавӑрт пурайн мўӊ мўвев пӑта пи­са­тельӆўв ясӊӑт ӑнтә тәп Россия мўвевн сащӆӑт, па хон пєлӑк мўв хăннєхуятăт ищи ат хәӆӑнтӆӑт. Вантэ, тӑм йисн писателят – щит сӑмӆўв мӑӆтӑты ёх иты вәӆӆăт.

Еӆӆы пленарной мир­хот оӆӊитсы. Тӑта финно-угорской писателят ки­ни­кайт хӑншты вєр оӆӑӊӑн путӑртсӑт. 

Уша йис, хуты финно-угрӑт ихурпи нўшайт тӑйӆӑт – ар пєлӑк няврємӑт рәт ясӊӑт ӑн вәӆăт, щирн ӆыв иса муй вєрӆӑт, ӆәӆн няв­рємӑт айтєӆн рәт ясӑӊа ат вәнӆтӑсыйт – ӆыв пӑтэӆа әмӑщ киникайт хӑншӆӑт. 

Финно-угорской писа­телят путӑрӆаӆ ищи рўщ ясӑӊӑн хӑншӆӑт, ӆәӆн арсыр мир йис па тӑм йис вәӆупсы оӆӑӊӑн уша ат вєрсӑт. 
Кимит хӑтӆӑн Ас-угорс­кой институт кини­кайт ӆўӊӑтты хотн хӑнты мир поэтн. В. Волдинӑн хӑншум «Так молупщи» нємпи киника аӆьты вєр вәс. Щит кимит киника, оӆӑӊмит 1998-мит оӆн єсӑӆсы. Йиӆуп ки­никайн В. Волдин стихӑт хӑнты ясӑӊӑн хӑншман вәӆӆӑт, щи тумпи Любовь Федоркив па Ирина Мол­данова щитӑт рўщ ясӑӊа тулмащтӑсӊӑн. Тӑм нєпек Татьяна Волдина-Ледкова Владимир Волдин эвеӆ хӑншӑс.

Щи вәйтантупсыйн хӑн­ты рэпер хә Валентин Неттин Владимир Вол­динӑн хӑншум кӑт стих ар иты вєрӑс па арийс. 

- Тӑм сўсн музыкальной диск єтӆ, щӑта Владимир Волдин стихӑт хўват яӊ ар тывӆ, – лупӑс В. Неттин.

ЮГУ хуща хӑнты мир писатель хә Еремей Ай­пин «Штрихи к портрету Арктики» киникайӆ аӆяс па путӑртӑс.
Щи тумпи Ём­вошн ву­ӆаӊ киникайт ӆў­ӊӑтты хотн хӑнты мир киникайт хӑншты нє Зи­наида Лон­гортова «Лю­бовь Юхура» йи­ӆуп хӑншум нєпекӑӆ оӆӑӊӑн пу­тӑртӑс. 

- Щит шєӊк мосты хуят оӆӑӊӑн киника. Щит кӑт­ӊӑн оӆӑӊӑн путӑр. Ӆын эвӑӆтана еӆӆы йиӆуп хӑн­ты щемья тывӑс. Щи вєр ӆаӆь пурайн вәс. Ма щи­рємн, нынана шєӊк әмӑщ ӆўӊӑтты питӆ, – З.В. Лонгортова ястӑс. 

Ӛхӑт Ас-угорской инс­титут киникайт ӆўӊӑтты хот йитн ар оӆ Лямина кәр­тӑн няврємӑт хӑнты ясӑ­ӊа вәнӆтӑты нє, киникайт хӑншты хуят Галина Лапте­ва пиӆа вәйтантупсы вәс. Ӆўв тӑмхӑтӆ ай пурайӆ оӆӑӊӑн ай етнхот аӆяс, щи оӆӑӊӑн «Лўк вәӆум» путрӑӆн хӑншман вәӆ.
«Хӑтӆ» нємпи хӑнты-вухаӆь мирӊӑн театр хуща Елена па Ана­то­лий Ермаковӊӑн пиӆа вәйтантупсы вәс. Елена хўвн стихӑт хӑншӑӆ. Анатолий ӆўв пухӆ веӆ­щи ӆўӊтарӆаӆ хӑншты оӆӊитӑс. 
Щи хӑтӆӑт мӑр «Югорс­кая книга» нємпи кӑсуп­сы па «Югорика» киникайт ванӆтупсы рәпитсӑӊӑн, артӑӆӑты ёх уша вєрсӑт, муйсӑр писателят мєт м киникайт хӑншсӑт. 
Щи тумпи Ёмвошн ар­сыр тӑхетн киникайт хӑнш­ты, тулмащтӑты па па вєрӑ­та вәнӆтӑты хӑрӑт рә­пит­сӑт, вәтаӊ писате­лят пиӆа вәйтантупсэт ӆэщӑтман вәсӑт.

Еӆӆы финно-угорской писателят Пыть-Ях воша па Сўмӑтвоша ӊхсӑт, щӑта киникайт ӆўӊӑтты ёх пи­ӆа вәйтантыйӆсӑт. Пыть-Ях вош 6-мит ӑшколайн пермской сӑран писателят Елена Коньшина, Надеж­да Мальцева па Виктор Рычков «Созвучие» нємпи киникаеӆ оӆӑӊӑн ай тәсӑт. Щит «Писатели Пармы» литературной оса тӑхи хуятăт ӆэщӑтсӑт. 
Сўмӑтвошн няврємӑт пӑта ӆэщӑтум «От крае­ведения к книголюбию» нємпи мирхотн мойӊ ёх няврємӑтн хӑншум пут­рӑт хәӆӑнтсӑт. Мойӊ хуя­тăт лупсӑт, хуты ӆывеӆа Сўмӑтвош шєӊк мәстӑс – хурамӑӊ вошие.

Юхи хӑщум хӑтӆӑн уша йис, муйсӑр киникайт «Югорская книга – 2026» кӑсупсыйн нух питсӑт. Артаӆӑты ёх лупсӑт, хуты мєт м киника – щит «Под­земные сокровища Марийского края». 

Па нємӑтн щи киникайт пирисыйт – Еремей Ай­пин «Штрихи к портрету Арктики», Зинаида Лон­гортова «У рыбной реки, на оленьей земле: тра­диционные блюда на­рода ханты», Валентина Соловар «Ар сувэн», Светлана Фадейкина «Байгинеть» («Капельки») па карельской ясӑӊӑн киника «Путӑрта, ӆўӊта, хӑнша!». «Новости Югры» издательской хот ёха «Академическая история Югры» нивӆ киника єсӑӆ­ты пӑта ищи нємасыя диплом мӑсы.
Щи кӑсупсы тәты ар­таӆӑты ёх и нумса юхӑтсӑт – 2028-мит оӆн «Няврємӑт пӑта мєт м киника «Рәт ясӑӊ киника» нємпи йи­ӆуп номинация вєрты.
Щи тумпи юхи хӑщум хӑтӆӑн финно-угорской писателят пленарной мир­хотн путӑртсӑт, муй щирн тӑм мирхотн путӑртум нўшайт тўӊматты, рәт ясӑӊӑн хӑншты айӆат ёх ӆэщӑтты па хутыса ин­тӑм па оӆн финно-угорс­кой писателят ветмит вән мирхот ма па тәса ӆэщӑтты. 

Путӑр хӑншӑс: 
Людмила Гурьева