Айкеԯӑт - Новости

Йиӆуп 2022-мит оӆ щи юхтӑс. Вәнтӑт, ӆорӑт па пусӆӑт ӆоньща-ӊка вмеӆ. Хӑтӆ нувийн ӆоньщие ӑӆ щи вуӆийӆ! 

2022-мит оӆн мўӊ хӑнты газетаев 65 оӆ постӑӆ. Мўӊ уша вєрты ӆӑӊхаӆўв, муй нын мўӊ нєпекев оӆӑӊӑн вәйтӆӑты. Кашӑӊ газетайн щи оӆӑӊӑн и иньщӑсупсы хӑншты питӆўв. Юхи хӑщум 24-мит газетайн уша вєрӆўв, хуйтат нух питӆӑт. Юхӆы ясӑӊ тыв китаты: khanty-yasang-65@mail.ru.

1. Хән «Ленин пӑнт хўват» нємпи газета пўншты оӆӑӊӑн поступсы хӑншсы? 

Йиӆуп 2022-мит оӆ пиӆа! Мўӊ шєӊк ӆӑӊхаӆўв, ӆәӆн 2022-мит оӆн пӑӆтап коронавирус мәш йира ат мӑнӑс, ӆәӆн кашӑӊ хоттєӆ ёх тӑӆаӊа, кӑшиӆы-мәшӆы ат вәс. Ӆэщӑтум вєрӑт ма ат мӑн­ӆӑт, рәпата тӑхетн ищи тәп сӑмӑӊа па хӑрщия кашӑӊ утые ат тывӆ. 

Атэӆт пәмащипа ясӊӑт щи шуши мирӆўва ястӑ­ты ӆӑӊхаӆум, мӑта ёх йис вєрӆўв тәса вәӆӑт па щи вєрӆўва ай ёхӆўв вәнӆ­тӑӆӑт, рәт ясӑӊ сӑмӆаӆн тӑй­ӆӑт па щитн путӑртӆӑт, мўвев-йиӊкев ӆавӑӆман шавиӆӑт, ӆәӆн мўӊ мирӆўв йис вәӆупсы аӆ вәтшӑсўв.

Нын хӑнты муй вухаӆь мир ясӊӑт сӑмӑӊа тӑйӆӑты, тӑм айкеӆӑӊ нєпек кашӑӊ пўш ӆавӑӆӆӑты па ӆўӊӑтӆӑты!

Тӑмхӑтӆ нынана йиӆпа юхтум 2022-мит оӆ пиӆа м вўща ясӑӊ китӆум па ӆӑӊхаӆум щиты лупты, ху­ты ин йиӆпа питты оӆ пурайн мўӊ кашӑӊ пўш нәмӑсӆўв, муй щирн ма­шӑк па хурасӑӊашӑк вәӆ­ты-хоӆты щирӑт еӆӆы ӆэ­щӑтты. Шєӊк ӆӑӊхаӆум, ӆәӆн тӑм йиӆуп оӆн нын нумӑсӆан ат тывсӑт, еӆӆы ищиты вещката па тўӊщи­рӑӊа нын вәӆупсан ат мӑнӑс!

Югра мўвев йис пура вўш эвӑӆт тащӑӊа вәӆ, тӑта шуши мир йис вєрӑт ӆавӑӆман тӑйӆыйт, мўв иӆпийн ар тащ вәӆ. Юг­ра хущи мєт мутрайӊ па ӛрӑӊ, пӑӆтапӆы па каркам ёх вәӆӆӑт. Тӑта вәӆты мир йис щирн вәӆӆӑт па йиӆуп вєрӑт сӑмӑӊа уша павӑтӆӑт. 
 

2021-мит оӆ щи етшӑс. Вантэ, интӑм коронавирус мәш пурайн иса муй ӆӑӊ­хасўв, щи вєрӆўв еша па щирн тывсӑт. Ӆавӑрт вәс, тәп па иӆ ӑн питсўв.
Мўвевн вәӆты мирева вән пәмащипа. Итәх ёх тӑм мӑрыйн рәпатайн вәӆ, итәх хуятӑт вәӆты хотӑт омӑсӆӑт, па хӑннєхәйт вә­ӆупсы мшӑка вєрӆӑт.
Щи кўтн вуӆаӊ вєрӑт ищи тывсӑт. Сәрханӆ вошн ӑӊкет па няврємӑт ӆа­вӑӆ­ман па вантман тӑйты тӑхи пўншсы. 

Ван хӑтӆуп тыӆӑщн 6-9-мит хӑтӆӑтн Увӑс мўв, Сибирь па Дальний Восток мўвӑт эвӑӆт айӆат ёх Ямал мўва Пуӆӊавӑт воша вән мирхота юхӑтсӑт. Калиниград вош эвӑӆт па Чукот­ка мўв вәнты 28 тӑхи эвӑӆт апрӑӊ айӆат хуятӑт вәсӑт. 

Ӆыв щи вән мирхотн ӆэщӑтты вєрӆаӆ оӆӑ­ӊӑн путӑртсӑт. Муй ӆыв шуши мирӑт вәӆупсы мӑӆты щирн, культура па хутыса йис вєрӑт, рәт яс­ӊӑт ӆавӑӆты щирн вєрӆӑт па хутыса еӆӆы вєрты питӆӑт. Мирхота юхтум ёх кўтэӆн арсыр мосты вєрӑт щирн путрємӑсӑт. 

Ван хӑтӆуп тыӆӑщ 10-митн, округев сєма питум хӑтӆӑн «Югра-Классик» хотн округ губернатор нє Наталья Комарова арсыр кӑ­супсэтн нух питум няврємӑта ишӑкты нєпекӑт па мойӆупсэт мойӆӑс. 

Югра мўвевн 2006-мит оӆ вўш эвӑӆт шуши хуятӑт вәӆты хотӑт ӆәтты нётӆыйт. Щи пӑта кәща ёхӆўвн поступсы вєрман вәӆ. Интӑм субсидия вухн мӑӆыйт щи ёх, хуйтат 2015-мит оӆ вәнты вохты нєпекӑт хӑншийӆсӑт. Интӑм вәӆты хот ӑн тӑйты ёх очередя ӑн хӑншӆыйт. 

Тӑм ванӑн мўӊ окру­гевн хот омӑсты вє­рӑт тәты департамент ёх иньщӑссўв, хутыса интӑм щи поступсы хўват шуши ёх хотӑт ӆәтты нётӆыйт.

Росгвардия вет оӆа йис, щирн округев 91 оӆ постум еӆпийн Ёмвошн Росгвардия хуща служитты ёх нємасыя мевӆ посӑтн катӆуптӑсыйт.

Округевн Росгвардия тӑхи кәща, по­ли­ция хуща полковник хә Евгений Симаков эвӑӆт сот хуят щимӑщ мевӆ пос хо­ӆумсӑт. Щи ёх кўтн кӑт шуши хуятӊӑн, щит рә­питты тӑхет ӆавӑӆты вєр тәты тӑхи кәща ӆӑӊкӑр хә, полиция хуща полковник, вухаӆь хуят Игорь Копьев па Росгвардия хуща айкеӆӑт хӑншты хә, сержант, хӑн­ты айӆат хә Артём Енов.