Айкеԯӑт - Новости

Россия мўв вух ӆўӊӑтты тӑхи нєпек щирн, йиӆуп 2022-мит оӆн оӆӑӊ няврєм єнмӑӆты щира нётупсы вух аршӑка вєрӆы.

Интӑм 1,5 оӆ ӆуват вўша йиты тёпие єнмӑӆ­ты щира тыӆӑщ мӑр ёша вўты нётупсы вух 7083 шойт, мєт вән нётупсы па 29600 шойт арат вәӆ. Йиӆуп оӆ вотас тыӆӑщ вўш эвӑӆт оӆӑӊ няврєм єнмӑӆты щира нётупсы вух 5,8 арат процента нух єнумӆ. Щиты 7083 шойт кана 7494 шойта йиӆ. Ищиты 29600 шойт кана 31282 шойт ёша вўты питӆӑт.

Тӑӆаӊтєӆн тӑм нётуп­сэта Россия мўв бюджет эвӑӆт 169,5 миллиард шойт вух єсӑӆӆы.

Тәх щос щимӑщ вєр вәӆ, хӑннєхә пенсия вухӑӆ ӆўв ёшӑӆа вўты пищӑӆ ӑнтә. Мосӑӊ ӆўв мәша йис, ӑӆ рўтьщӑты тӑхия мӑнӑс муй па рәт ёхӆаӆ хуща мойӊа вәӆ па па вєрӑт вәӆӆӑт. Щирн пенсияйн вәӆты хӑннєхә нумӑс ат пунӆ, мӑта хуята ӆўв вухӆаӆ вўты рӑхӑӆтӑӆӆэ па щи хӑннєхәя ӆўвеӆа нємасыя нєпек хӑншты мосӆ. 

Пенсия вўты дове­ренность нєпек вєрты пӑта ар пищ вәӆ:

- нотариус мухты ёш посн па печатян пунты, ай вошн нотариус ки ӑнтәм – вош кәщайт хуща щи кана вәӆты хӑннєхә ёш пос па печать ат пунӆ;

- хӑннєхә рәпитты муй па вәнӆтыйӆты тӑхеӆ хуща ёш посн пунӆа;

Мєт кєн па сора ӑкмум пенсия вухӑт оӆӑӊӑн уша вєрты пищ, щит:

- карты щўӊкӑт мухты лўӊӑтты кан сайт хот йитн «Личный кабинет» Россия пенсионной фонд  хуща: www.pfr.gov.ru;

- кӑншты «Единый портал государства» па муниципальной вєрӑт хуща: www.pfr.gov.ru.

Электронной щўӊкӑт мухты пищ вәӆ уша вєрты кан лицевой счёт ПФР хуща, щӑта ӑкмум пенсия вухӑт оӆӑӊӑн иса вєрӑт хӑншман вәӆӆӑт па хӑншман, муй тӑхийн щи вухӑт вәӆӆӑт.

Кашӑӊ оӆ васы мӑнты муй па Ас потты тыӆӑщӊӑнӑн Югра мўв налоговой вєрӑт тәты тӑхи кәща нє Ольга Литова айкеӆӑт ӆэщӑтты ёх пиӆа вәйтантыйӆ, ӆәӆн налог сухуптӑты вєр оӆӑӊӑн йиӆпа лупты. Щиты тӑм сўсн мўӊ интернет хуща онлайн щирн кәща нє пиӆа путӑртсўв.

Сырыя имущественной налог оӆӑӊӑн путӑр вәс. Вантэ, Югра мўв кашӑӊ хӑннєхәя, мӑта ёх вәӆты-хоӆты хот, мўв хӑр муй па карты әхӑӆ тӑйӆ, нємасыя хӑншум пищмайт китты питӆыйт, ӆәӆн нємӑӆт хӑннєхә налог сухуптӑты вєр аӆ юрємӑсӆэ. 

Ай тӑхет потты тыӆӑщ 15-мит хӑтӑӆн Ёмвошн айкеӆӑт ӑкӑтты «Югра» тӑхийн теле­виденияйн, радивайн, газетаитн рәпитты хуятӑт округев информационной развития департамент кәща ӆӑӊкӑр нє Лариса Шанаулина, Тюменской область, Югра па Ямал федеральной служба государственной статистика кәща ӆӑӊкӑр хә Валерий Ярлов па Югра мўвев общественной па внешней связят департамент гражданской инициативӑт тӑхи кәща ӆӑӊкӑр хә Александр Пономаренко пиӆа вєрум мирхотн иха вәйтантыйӆсӑт па путӑртсӑт.  

Ай тӑхет потты тыӆӑщ 27–мит хӑтӑӆн Югра мўвев кәщаит хотн шуши ёх вєрӑт ӆэщӑтты щирӑтн видеоконференция мӑнӑс. Щи вән мирхот кәщая Александр Новьюхов вәс. 

Ԯўв путӑр­тӑс, хуты ко­ронавирус мәш вєр пӑта тӑм пўш VII-мит Mўвтєӆ мир вўӆы ӆавӑӆты ёх конгресс тәп вән кєр тыӆӑщ 2022-мит оӆн Ёмвошн вєрӆы. Щи тумпийн йиӆуп алфавит, кашӑӊ ясӑӊ, пос хӑншты пӑта арсыр м поступсэт вўсыйт.  

Тӑм ванӑн Кўтуп Васюган кәртӑн Каргасокской районӑн Томской область мўвн ӑшколайн вәнӆтыйӆты няврємӑт пӑта Россия мўвев писателят Союз тӑхийн вәӆты моньщӑт хӑншты хә Владимир Егорович Енов литературной вәйтантупсэт тәса вєрӑс па мсыева ванӆтӑс. 

Кашӑӊ оӆ Югра мўвн нємасыя кӑсупсы ӆэщӑтӆы, ӆәӆн мєт апрӑӊ, нумсӑӊ, вєрӑӊ па рәпата пєӆа сӑмӑӊ хӑннєхәйт пириты. Тэк кәртӑӊ хә Леонид Дмитриевич Рязанцев ищи щи кӑсупсыйн кӑсӆ. Тӑм ванӑн ӆўв «Югра мўв арсыр мирӑт сорни нємӑт» тӑхия нух хӑншсы.

Л. Рязанцев – хурӑт хӑншты хә, йис щирн картэт ӆуӆты вєр тәты хӑннєхә, ӆўӊӑт­ты арӑт хӑншты па гитара нарӑсъхн тәса юнтты хуят. 

Сўмӑтвош район Тэк кәрта ӆўв 1986-мит оӆн вәӆты-хоӆты юхтӑс.

«БуквА» нємуп ки­никайт ӆўӊӑтты хот йитн йиӆпа шуши мирӆўв «Ас/Шай» мирхота ӑк­тӑщсӑт. Вәйтантупсыйн тӑм ванӑн єтум «Поӆ­на­вӑт ими» нємпи киника оӆӑӊӑн пу­тӑр вәс. 

Васы мӑнты тыӆӑщ 5-мит хӑтӆӑн Ёмвошн Россия ӆуват мир ха вәӆты мирхот пўншса, щит 7-мит хӑтӆ вәнта рәпитӑс. Тӑм вән мирхота Россия мўв 55 сўӊӑт эвӑӆт мойӊ ёх юхӑтсӑт, иса 600 киньща аршӑк хӑннєхә вәс. Щи кўтн некоммерческой организация ёх ищи вәсӑт.

Юхтум ёх нумӑс тӑйсӑт, муй вўрн ха ӆәхсӑӊа, ма вәӆты, муй вўрн арсыр мир кўтэӆн мосты вєрӑт вєрты нётты пӑкӆӑт, Россия мўвевн сыр-сыр мир ӆәхсӑӊа, ма вәӆты политика тўӊа тәты.