Вәйт ӆор тыӆӑщ 13-16-мит хӑтӆӑтн Красноярск вошн «Международный форум коренных народов» нємпи вән мирхот вәс. Щӑта оӆӑӊ пўш «Сокровища Севера» нємпи ванӆтупсы вєрсы, сыры оӆӑтн щит Москва вошн вєрман вәс. Щи мирхота 700-кєм хӑннєхә 14 мўв эвӑӆт па Россияев 27 мўв сўӊ эвӑӆт юхӑтсӑт.

Югра мўвев эвӑӆт щив 50 муӆтас хуят ӊхсӑт, щит тәса ёнтӑсты муй шўкщӑты 35 хуят па 18 кӑсты хуят. Вантэ, щи пурайн Красноярск вошн ищиты «Кубок единства народов мира» нємпи кӑсупсы вәс.  
Тӑм оӆ Россия шуши мир оӆа аӆьщӑсы, щирн щи мирхотн юхтум ёх шуши мир ясӊӑт, «культурный код» па шуши мирӑт йис вәӆупсы оӆӑӊӑн путӑртсӑт. 
«Сокровища Севера» ванӆтупсы пурайн Югра мўвев эвӑӆт юхтум хәйт па нєӊӑт әмӑщ ванӆтупсы ӆэщӑтсӑт, мойӊ ёх пӑта арсыр вәнӆтӑты хӑрӑт вєрсӑт, щи тумпи ӆыв па шуши мирӑт кўтн кӑсуп­сэтн кӑссӑт. «Луч­шая региональная экспо­зиция» кӑсупсыйн Югра мўвев ванӆтупсы кимит тӑхи хоӆумтӑс. Мосӆ лупты, «Торум Маа» музейн рә­питты ёх «Меньнє пӑнт» нємпи ванӆтупсы ӆэщӑтсӑт, щит шуши мирев мой вєрты оӆӑӊӑн вәс. Мойӊ хуятӑта щи ванӆтупсы вантты шєӊк әмӑщ вәс. Щи кӑсупсыйн оӆӑӊмит тӑхия Ямал мўв ванӆтуп­сы йис, мєт вуӆаӊ «Грант-при» нємпи мойӆупсыйн Красноярской мўв хуя­тӑтн вєрум ванӆтупсы мӑсы.

Иха ки ӆўӊӑтты, Югра мўвев хуятӑт хәс мой­ӆупсыйн мӑсыйт. 
«Полярный стиль» кӑ­супсыйн мўӊ мўвев эвӑӆт ӊхум имєӊӑн хәӆум мой­ӆупсыйн мӑсыйӊӑн. На­талья Сопочина Сәрханӆ район эвӑӆт «Гран-при» вуӆаӊ мойӆупсыйн мӑсы, ӆўв тӑӆ мӑр ӊхты хӑнты мир ӆәмӑтсух ёнтӑс па щӑта ванӆтӑс. Мария Эк­керт ӆўӊ мӑр ӊхты хӑн­ты ӆәмӑтсух ванӆтӑс па оӆӑӊмит тӑхи хоӆумтӑс. Щи тумпи Мария Григорьевна «За бережное сохранение национальных традиций» кӑсупсыйн нємасыя мой­ӆупсыйн мӑсы.
«Кочевье Севера» кӑ­супсыя кашӑӊ оӆ Югра мўвев эвӑӆт якты-ариты ёх ӊхӆӑт. Тӑм оӆ щи кӑ­супсыя Нуви сӑӊхум вош эвӑӆт «Увӑс хурамӑт» якты-ариты няврємӑт, Ём­вош эвӑӆт округ мир творчества хотн нарӑс хн юнтты айӆат ёх Алек­сей Рещиков вәнӆтӑты хәйӆ пиӆа па кан арăт ариты хә Валентин Нет­тин ӊхсӑт. Ӆыв ищи щи кӑсупсыйн ишӑкты нє­пекӑтн мойӆӑсыйт.
Щи тумпи Югра мўвев эвӑӆт ӊхум па хуятӑт ар­сыр кӑсупсэтн ищи нух пит­сӑт, щит Галина Молданова, Сергей Хозумов, Надежда Коновалова (Ёмвош), Зоя Тарлина, Мария Игише­ва, Валентина Григорье­ва (Нуви сӑӊхум район), Аль­бина Ярсомова, На­талья Ярсомова, Светлана Марущак (Нефтеюганской район), Татьяна Егорова (Нягань вош). 

«Кубок единства на­родов мира» кӑсупсыйн Югра мўвев хуятӑт арсыр кӑсты вєрӑтн 17 ишӑк нє­пек хоӆумсӑт, щит Геор­гий Манастырлы, Артём Лакиенко, Николай Крутой (Сәрханӆ район), Мария Ижик, Маргарита Кушнер (Урай вош), Полина Яц­ковская (Ёмвош район). 
Шуши мирӑт форум пурайн арсыр ӊта пӑсанӑт па па мирхотӑт вєрсыйт. Щӑта путӑртсы, хутыса еӆ­ӆы яӊ оӆ мӑр шуши мирӑт йис вєрӑт, ясӊӑт, мувӑт-автӑт ӆавӑӆман тӑйты. Ёмвош округев эвӑӆт щи мирхотӑтн вәсӑт: шуши мирӑт правайт вәньӆьты нє Людмила Алфёрова, мўв иӆпийн тащ вўты па мўв-авӑт ӆавӑӆты вєрӑт тәты департамент кәща ӆӑӊкӑр хә Александр Комиссаров, «Югра ӆыӆӊуптӑты» тӑхи ёх Виктор Банк, Екатерина Жукова па Степан Кечимов. 
Мўӊ ӆӑӊхаӆўв м вўща ясӊӑт лупты иса хуятӑта, хуйтат щи кӑсупсэтн нух питсӑт па ишӑк нєпекӑтн катӆуптӑсыйт. Щирн, Югра мўвевн шуши мирӑт йис вєрӑт тәса вәты ёх вәӆӆӑт.

Интернет айкеӆӑт щирн хӑншӑс: 
Надежда Рагимова