Мирев рәт ясӑӊ, йис вәӆупсы, йис вєрӑт тӑмхӑтӆ шӑкӑнты питсӑт. Ин щи вєрӑт еӆӆы тәты пӑта щи щира рәпитты хӑннєхәйт мосӆӑт.

И щимӑщ хӑннєхә – щит Екатерина Жу­кова, ӆўв «Югра ӆыӆ­ӊуптӑты» оса тӑхи хуща оӆӑӊ ӆӑӊкӑр нєӊа рәпи­тӑӆ. Щӑта ӆўв арсыр вєр нєпекӑт вєрты щира вәӆ. Тӑм йисн щимӑщ нєпекӑт – щит мосты вєрӑт пӑта вух ёша павӑтты пищӑт. Щи имен нумӑсн, тәп хотӑӊ ёх­ӆўв мухты мўӊ сӑмӆўв увӑс мирев пєӆа кєрӆӑӆӑт.

Екатерина Нижневартовск вошн сєма питӑс. Ӑӊкеӆ – Светлана Андреевна, ащеӆ – Сергей Иванович. Опрӑщ нєм – Хунзи. Ӆын щи воша Шурышкарской район Ямало-Ненецкой округ эвӑӆт юхӑтсӑӊӑн. Екатерина мєт вана тӑй­сӑӆэ Елена Ефимовна То­гачева аӊкаӊкеӆ, мӑта хуя­тӑӆ эвӑӆт ӆўв иса пўш хӑнты ясӑӊ хәӆӑнтӑс.

- Ма нємӑсыя хӑнты ясӑӊ ӑн вәнӆтӑсум. Тәп ищимурт щи ясӑӊ ма вана тӑйӆєм. Хән хӑнты ясӑӊ хәӆӑнт­ӆум, хӑщ па иса ясӊӑт, иса путрӑт уша вєрӆӑӆам. Хән хўвшӑк мӑр хӑнтэт кўтн вәӆӆум, ма нумсємн хӑнты ясӊӑт иса щи сащӆӑт, – путӑртӑӆ Екатерина.

Ая вәӆмаӆн, кашӑӊ оӆ щи нєӊен хотӑӊ ёхӆаӆ пиӆа Ямал мўва ӊхӑс. Щӑта щи увӑс мирев йис вәӆупсы уша вєрсӑӆэ, па сӑмӑӊа тӑйты питсӑӆӆэ. Ӑӊкеӆн-ащеӆн вән вош хӑрн ищи муӆты вєрӑта вәнӆтыйӆса – хӑншет оӆӑӊӑн, йис вәӆупсы оӆӑ­ӊӑн путӑртыйӆса. Щит пӑта ӆўв йис вәӆупсы пєӆа кєрӆуман вәӆ.

Нижневартовск вошн ӑӊкеӆ-ащеӆ увӑс мирев Ассоциация тывум артӑн, щит 1980-мит оӆӑт хуӆам пурайн, щӑта рәпитсӑӊӑн. Ӑӊкеӆ па «Хунзи» нємуп ариты-якты ансамбль вєрӑнтӑс. Щӑта ай Ка­те­рина эви ищи якӑс па арийс.

Ӑшкола етшуптумаӆ пийн ӆўв юриста вәнӆ­ты­ӆӑс. Щӑӆта па и нєпек ёша павтӑс – щит «Государственное и му­ни­ципальное уп­рав­ле­ние», щит пӑта госу­дарст­венной служба Се­веро-Западной акаде­мия хуща вәнӆтыӆӑс. Щитӑт етшумаӆ пийн Екатерина Нижневартовской вошн «Югра ӆыӆӊуптӑты» оса тӑхи хуща рәпитты питӑс. Щи мӑр ӆўв арсыр вєрӑт вєрӑнтӑс. Ӆўв ясӊӑӆн, мєт вән вєрӆ – щит 2016-мит оӆн «Добрый югорчанин» вєрум вєр. Щит тащӑӊ, вухӑӊ ёх мухты ӆўв ай вошӑтн вәӆты кәняр увӑс мирева ӆәмӑтӆяты сухӑт па арсыр мосты пурмӑсӑт ёша павӑтты нётӆ. 

Ека­терина 2018-мит оӆ вўш эвӑӆт Нижневартовск вошн ай­ӆат ёх центр хуща рәпитӆ. Мєт оӆӑӊ ай музей хотые тӑта тывӑс, ӛхӑтшӑк па – этно­вош. Щитэн «Радуга» нємуп рўтьщӑты тӑхи хонӑӊӑн вєрса. Щӑта ӆўв экскурсияйт, мастер-классӑт, мӑӊхӑтӆӑт вє­рӑнтыйӆ.

- Мўӊ йис вәӆупсэв оӆӑӊӑн тӑм мўва юхтум мирева иса пўш путӑртты мосӆ. Щирн тәп ӆыв мўӊ мирев пєӆа м сємн вантты питӆӑт, – путӑртӑӆ Екатерина.  

Ӆўв нумсӑӆн, рәт ясӑӊ тәп хотӑӊ ёхӆўв мухты ёша павӑтты пищ вәӆ. 

- Ӑӊкет-ащет няврєм­ӆаӆ пиӆа хӑнты ясӑӊӑн путӑртты ки питӆӑт, тәп щирн ясӑӊ ӆыӆӑӊа хӑтьӆ. Нємӑӆт нєпекӑт мухты ясӑӊ вәнӆтӑты пищ ӑн­тәм, няврєма ӆыӆӑӊ ясӑӊ хәӆӑнтты мосӆ, – лупӑӆ тӑм ими.

Ӆўв айӆат ёх пиӆа мєт кашӑӊа рәпитӆ. Хән щи ёх м нумӑсн ӆўв эвӑӆтаӆа мӑнӆӑт, щирн тӑм имена мєт әмӑщ.
Екатериная ӆўв хотӑӊ ёхӆаӆ вєра нётӆӑт, икеӆ па кӑт пухӊӑӆ. Ӆыв нюки хот омсӑӆтыйӆӆӑт, юхтыйӆты хуятӑт увӑс мирев юнтты утӑта хутьӆийӆӆӑт па иса арсыр вєрӑтн нётӆӑт. 

- Мӑнєма тӑм вєрты вєрєм пиӆа рәпитты вєра әмӑщ. Хән юхтыйӆты ёхӆўв па сємн увӑс мир йис вәӆупсы пєӆа вантты питӆӑт, хән мўӊ увӑс мирев айӆат ёхӆўв тӑӆтаса ухӆаӆ кӑрща аӆумман мӑнӆӑт, щитӑт эвӑӆт ма сӑмєм хошум рўвн юхӑтӆа, – путӑртӑӆ Екатерина.

Щи кўш хўв мӑр тӑм вєрӑтн Екатерина рәпитӆ, ищимурт вәна вум ёх эвӑӆт хуӆна вәнӆтыйӆ. Щиты щи Екатерина Жу­кова кашӑӊ хӑтӆ рәпитӆ. Вән вошн увӑс мирев йис вәӆупсы ӆыӆӑӊ ӆєрие ӆавӆӑсман ӆўв вәӆ.

Путӑр хӑншӑс: 
Пётр Молданов