Нюки хотӑӊ мӑӊхӑтӆ
Вәйт ӆор тыӆӑщ 14-16-мит хӑтӆӑтн Сәрханӆ район Тром-Аган кәрт пўӊӑӆн хәтмит пўш шуши мир культура тәты ёх «Нюки хотӑӊ мӑӊхӑтӆа» ӑктӑщсӑт.
Щи хӑтӆӑӊ хӑтӆӑтн тыв юхтум мир ванӆтӑсӑт, муй щирн опращӆўв хӑюм вєрӑт еӆӆы тәты мосӆ. Ёмвошев эвӑӆт щив «Ёмвош ёх» ариты тӑхи, «Югра ӆыӆӊуптӑты» па «Вәна пєлка вум ёх» оса тӑхеӊӑн хуятăт вәсӑт.
мӑӊхӑтӆ ма па тәса ӆэщӑтман вәс. Хәӆум хӑтӆ мӑр Тәрум Юхан мўв хуща хӑнты, вухаӆь па юрн ясӊӑт сащсӑт. Тыв юхтум ёх путӑртсӑт, муй саты йиӆуп щирн округ шуши мир йис вәӆупсы тәты мосӆ. Ӆыв и нумса юхӑтсӑт – тӑмӑщ «Нюкеӊ хотӑӊ» мӑӊхӑтӆ еӆӆы ӆэщӑтты мосӆ!
Мєт әмӑщ шуши мир хурамӑӊ тўрӆопсӑт, ӆәмӑтсухӑт, кўр ӆәмӑтсухӑт, арсыр анӑт-сәнӑт па па утӑт ванӆтупсы ӆэщӑтман вәс. Щи тумпи нєӊӑт Увӑс мир єпӆӑӊ ӆєтутӑт кавӑртсӑт. Ёмвошӑӊ нє Наталья Владимировна Прутяну округ шуши мир хӑннєхәйт хурӑӊ ванӆтупсы аӆяс.
Литературной хӑрн «Хӑтӆ» нємпи хӑнты-вухаӆь мирӊӑн театр актриса нє Татьяна Огнёва Югра мўвев поэтӑт стихӑт сӑмӑӊа ӆўӊтӑс. Щи тумпи мойӊ ёх хӑнты Ермаковӑт хоттєӆ ёх пиӆа вәтаӊа йисӑт – ӑӊкеӆ Елена Никифоровна (эви опращнємӆ Тарлина) м стихӑт хӑншӑӆ, ӆўв пухӆ щитӑт тәса ӆўӊӑтӆ.
Тӑм хӑтӆӑтн тыв юхтум ёх хӑтӆ пєлӑк хӑнты мир ай хопн (облас) ӊхты вәнӆтыйӆсӑт. Айӆат ёха щи вєр оӆӑӊӑн шєӊк әмӑщ вәйтты вәс.
мӑӊхӑтӆӑт – щит культура вєрӑт тәты ёх рәпата па вәӆупсы, щирн ӆыв тӑта ищи ариты-якты етнхотӑт вєрсӑт, ӆәӆн мойӊ ёха әмща ат вәс. Якты вєр пєӆы сӑмӑӊ нєӊӑт хӑнты па вухаӆь мирӊӑн якӑт якты вәнӆтыйӆсӑт. Етн пурайн арсыр мир ёх иха тәса тӑм йис якӑт яксӑт.
VI-мит «Нюки хотӑӊ мӑӊхӑтӆа» округ Думайн вәӆты шуши мир ассамблея кәща хә Еремей Айпин па Ульт-Ягун кәртӑӊ кәща хә Максим Яковинов вәсӊӑн.
Тӑм оӆ тыв па хон пєлӑк Сербия мўв эвӑӆт сухта эвӑӆт анӑт-сәнӑт вєрты нє Катица Лишка юхтыӆӑс. Ӆўвеӆа Югра мўв шуши мир хӑншет шєӊк мәстӑсӑт, щирн еӆӆы ан-сәна щитӑт хӑншты питӆ.
Йиӆуп ёх пиӆа вәйтантупсэт, кўтэӆн путрупсэт, вәнӆтыйӆты вєрӑт вәсăт. «Нюкеӊ хотӑӊ мӑӊхӑтӆ» хуща юхтум кашӑӊ хуят сертификат нєпек па мойӆупсы ёша хоӆумтӑс. Тӑм вєр ӆэщӑтум ёх, тыв юхтум хуятӑт пӑта вән амӑт, ӆыв еӆӆы Югра мўв шуши мир – хӑнтэт, вухаӆят па юрнӑт оӆӑӊӑн уша вєрты ӆӑӊхаӆӑт.
Тӑм мӑӊхӑтӆ ӆэщӑтум нєӊа Майя Александровна Швейд па ӆўвеӆа нётум ёха вән пәмащипа лупӆўв. Вантэ, нын Ёмвош округев шуши мир йис вәӆупсы еӆӆы тәӆты. Нын ӆэщӑтум «Нюкеӊ хотӑӊ мӑӊхӑтӆ» хуща юхтум мойӊ мир Тәрум Юхан мўвн вәӆты хӑнты мир вәӆупсы оӆӑӊӑн уша вєрӆӑт.
Фаина Иштимирова
Хӑнты ясӑӊа тулмащтӑс: Людмила Гурьева
