Тәняӆ товийн округев мўв ӆуваттыйн ӆэщӑтум Россия мўв эвӑӆт юхтум Финно-угорской мир писателят вәйтантупсы мӑнӑс. 

Щи пурайн итәх мойӊ ёх нємасыя Междуреченской па Урай вошӊӑна мойӆӑты тәть­ӆясыйт, мӑта тӑхетн ӆыв ищиты киникайт ӆўӊӑтты няврємӑт па вән хӑннєхуятӑт пиӆа вәй­тантупсэт ӆэщӑтсӑт па арсыр айкеӆӑт тәсӑт, муйсӑр вєрӑт оӆӑӊӑн ки­никайт хӑншӆӑт.

Имуӆтыйн ай няврємӑт библиотека хот Урай вошн ванӆтӑты нємасыя ӆыв тәсыйт. Ма ищиты арсыр писателят кўтн вәсум па щи тӑхийн рәпитты нє­ӊев Марина Витальевна Кузнецова эвӑӆт щимӑщ айкеӆӑт вўсум, муй щирн ӆыв ин тӑм юхи хӑщум оӆӑтн сыр-сыр вошӑӊ ай няврємиет пиӆа тәса рәпитӆӑт. 

- Марина Витальевна, муй щирн библиотека хотн ёх айӆат ёх пиӆа рәпитӆăт? 

- Мўӊ тӑмхӑтӆ нын пи­ӆана Урай вошӑӊ айӆат ёхӆўв пӑта ӆэщӑтум ки­никайт ӆўӊӑтты хотн вәӆ­ӆўв. Тăм хот па йис хӑн­нєхуятӑт вәӆты-хоӆты кев хот хурасӑт щирн нє­масыя тӑта омӑссы. Ван­тэ, кєрӑтман мӑнты вән кевӑт хуща и пўша ар­сыр вәнт вой хурӑт нух хӑншман тӑйӆыйт, мӑтты ки ӆыв йис пурайн тӑта вәӆум хәятн-нєӊӑтн шєӊк тәса па хурамӑӊа нух щу­рӑтсыйт па ин тӑм оӆӑт вәнты иса щӑта щи хӑщсӑт. Щи киньща нуви тўтэв тӑта лӑп хәрӑтты ки, щит нын ӆӑщкам тәрум хӑрыя хуӆыева питӆӑты. Муй­ арат ар хәс нын шиваӆӑӆ­ты па щитăт хуӆыева нәмн хәтӆăты питӆӑт. Ма щи­рємн, ӑӆ әмӑщ щит пєӆы вантты па уша па­вӑтты щи­мӑщ ӆӑщкам па хурамӑӊ тәрум хӑр, ху­та арсыр хәс тэӆыева вәӆ. Мосӆ лупты, хуты мўӊ тӑм киникайт ӆўӊӑт­ты хотэвн м арат сыр-сыр вәйтантупсы па ванӆтуп­сы вошӑӊ няв­рємӑт пиӆа вєрӆўв. Щи­мӑщ мирхотӑт рәт мў­вев ма вәйтты щирӑтн, щӑӆта мўвев-йиӊкев сыс­тама еӆӆы тӑйты па рәт мўвев вещката ӆавӑӆты пӑта ӆэщӑтӆўв. Итәх пу­райн мӑтты ки тӑм биб­лиотека хотэва мєӊк икет па юхтыйӆӆӑт па айӆат ёхӆўва арсыр хӑнты па ву­хаӆь мирӊӑн йис монь­щӑт тәса моньщӆӑт.

Ма нәмӑстємн, шєӊк хурамӑӊ па мосты биб­лиотека хот вошӑӊ ай няврємӑт пӑта мўӊ Урай вошевн тӑйӆўв. Мосӑӊ, щит пӑта айӆат ёхӆўвн па вәншӑк хӑннєхуятӑтн сӑмӑӊа тӑйӆа. Тыв па ар хӑннєхә ӊхӑӆ. 

- Муй арат оӆ ӆувата вум няврємӑт киникайт ӆўӊӑт­ты хота юхтыйӆӆӑт?  

- Мўӊ библиотека хо­тэва ветмит оӆ вўш эвӑӆт па 12-мит оӆ вәнты вум ай эвет па пухӑт ӊхӆӑт. Тӑмхӑтӆ айӆат ёхӆўв киника ӆў­ӊӑтты хотэв, ма щирємн, шєӊк әмӑщ па ӆӑщкам тӑхи, хута ай няврємӆўв ӑӊкиӆаӆ-ащиӆаӆ пиӆа ищиты мсыева рўтьщӑ­ты вєритӆӑт. 

- Муй вєритӆӑн мўӊева крае­ведческой литература вєр оӆӑӊӑн лупты, муйсӑр Югра мўв поэтӑт па писателят хӑншум киникайт нын айӆат ёхӆўв Урай вошӑӊ библиотека хот хуща тӑмхӑтӆ вәнты тӑйӆӑты? 

- Краеведения щирн ки лупты, щит мўӊ биб­лиотека хотэвн арат­тєӆн арсыр шуши мир поэ­тӑт па писателят хӑн­шум киникайт вәӆӆӑт. Щит щимӑщ хәйт-нєӊӑт ӆэ­щӑ­тум нєпекӑт: Еремей Айпин, Мария Волдина, Андрей Тарханов, Иван Шесталов, Анна Конько­ва па па хӑннєхуятӑт. Ин мўӊ вєритӆўв ӊхты крае­ведения хот йита, хута мсыева вантты щирӑт тӑйӆӑты, муй арат Югра мўв писателят хӑншум арсыр киника мўӊ библиотека хотэвн араттєӆн вәӆ. 
Мўӊ хущева юхтыйӆты няврємӑт шєӊк ма па сӑмӑӊа хӑнты па вухаӆь мир моньщӑт тӑйӆӑт. Ка­шӑӊ пўш ӆыв вухаӆь моньщӑӊ нє Анна Конь­кова хӑншум монь­щӑт хәӆӑнтӆӑт па ӛхӑт ӆыв кўтэӆн путӑртӆӑт, муй хур­пи ущхўӆь па әмӑщ монь­щӑт щи нє хӑншмаӆ па ӆывеӆа ӆўӊӑтты щирӑта еӆӆы єсӑӆмаӆ. 

Щӑӆта итәх пурайн тӑм кев хурасн вєрум хот йитэвн библиотекаря вәӆты нєӊӑт Анна Конь­кова хӑншум моньщӑт ай няврємӑта ӆўӊӑтӆӑт. Кашӑӊ ай няврєм щи моньщӑт сухнум пийн путӑртӑӆ мўӊева, хуты еӆӆы па ӆӑӊхаӆ тыв юх­тыйӆты па шуши мир ху­рамӑӊ моньщӑт хә­ӆӑнт­ты! Щимӑщ әмӑщ библиотека хот ай няврємӑт пӑта Урай вошевн рәпитӆ.

Путӑр хӑншӑс: 
Владимир Енов