Ёмвошн лыпӑт хойты тыӆӑщн 24-мит хӑтӑӆн округ Об­ществен­ной па­лата Увӑс мир комиссия кӑши-мәшӑт мӑӆты оӆӑӊӑн путӑрт­ты щи­ра ӑктӑщийӆсӑт.

Щи тӑхийн увӑс мир вєрӑт әхтыйн ко­миссия кәща хә Виктор Вискунов ястӑс, муй оӆӑ­ӊӑн тӑмхӑтӆ Увӑс мўв шуши мирӑт тӑӆаӊа па кӑши-мәш такӆы вәӆты оӆӑӊӑн ясӑӊ мӑнӆ. 

Педагогической нау­кайт кандидат нє, Югра Увӑс мир профессиональной образования Институт кәща нє Ольга Муллер па Сәрханӆ университетн рәпитты па аспиранту­райн вәнӆтыйӆты нє Капитали­на Худи путӑртсӑӊӑн, муй­сӑр вәнӆтыйӆты програм­майт интернатн вәӆты няврємӑта вєрты мосӆ, ӆәӆн ӆыв аӆ мәшитсӑт па тӑӆаӊа ат єнумсӑт.

Октябрьской районной пәӆьница кәща ӆӑӊкӑр нє Наталья Иванских путӑртӑс: 

- Мўӊ районэвн 19 ай кәрта ӆавӑрт юхтуптыйӆ­ты. Октябрьской вошн – 332 хуят, Кевавăт кәртăн –346 хуят, Шӑнш кәртӑн – 172 хуят, Вән Аӊкӆум кәртӑн – 101 хуят вәӆ. Хўв тӑхетн вәӆты ай кәртӑта леккар бригадайт ӊхиӆыӆӑт. Тӑм оӆ щимӑщ бригадайт 53 пўш ай кәртӑта ӊхсӑт. Увӑс мир хущи па 1 805 пўш ӊхсӑт.

Тӑӆа йиты пурайн кон­сультативно-диагнос­ти­ческой передвижной по­ликлиника, ӆўӊӑн па плав­поликлиника ай кәр­тӑта ӊхиӆыӆӑт.

Ай кәртӑтн атӆ-хӑтӆ мӑр артериальной давле­ния па холтеровской мониторинг сӑм вантты утӑт вәӆӆӑт.

Тӑм пўш округ пәӆь­ницая шуши мирӑт эӆты 34 хӑннєхә китыйӆмеӆ, пәӆьницая лекщитты щира 78 хуят пунмеӆ.

Санаторно-курортной тӑхета мӑӆты щира 21 хуят китмеӆ. «Мать и ди­тя» путёвка щирн 8 хуят ӊхмеӆ. Мәш мӑӆты щи­ра – 9 хуят китмеӆ.
Унъюган, Кевавӑт, Ка­рым кәртӑтн йиӆуп ПЦР лаборатория вєрса.

Округ мир вәӆупсы ӆэщӑтты вєр тәты де­партаментӑн рәпитты нє Анна Габбасова шуши мира вєрты арсыр нётуп­сэт оӆӑӊӑн путӑртӑс.

Биологической наукайт кандидат нє, Сәрханӆ университетн медицинс­кой институт кәща ӆӑӊкӑр ими Ольга Литовченко ястӑс: 

- Вәнӆтӑты па наука вєрӑт тәты департамент, мир мӑӆты вєр тәты департамент па госу­дарственной власть пи­ӆа па мўӊ институтэв вєр­ты медицинской иссле­дованияйт пиӆа ха рәпитты мосӆ, ӆәӆн увӑс мира тӑӆаӊа вәӆты щира нётты.

«Югра ӆыӆӊуптӑты» нємпи шуши мир оса тӑ­хийн ух хәя вәӆты хуят Виктор Банк путӑртӑс, муй щирн ӆыв шуши мира нётӆӑт, мӑта ёх вән во­шӑ­та пәӆьницая юхтыйӆ­ӆӑт.

Комиссия эксперт Аг­рафена Сопочина ястӑс: 

- Шуши мир вәӆты щир ма вәйтты мосӆ. Мўӊ щи оӆӑӊӑн лекцияйт ӆўӊӑт­ӆўв, муя рәт ясӊеӆн тӑмиты путӑртӆа, йис вєрӑт оӆӑ­ӊӑн путӑртӆўв, найӆаӆа-вәртӆаӆа йир-поры вєрты щирӑт шуши мира шєӊк мосӆӑт. Тӑм пищӑт увӑс мир оӆӑӊӑн леккăрӑта, психологӑта па няврєм вәнӆтӑты ёха вәйтты мосӆ.

Шуши мир вєрӑт әх­тыйн уполномоченной нє Людмила Алфёрова ястӑс: 

- Мўӊ и пўша ха вәй­тантыйӆтэвн иса шуши мирев ясӊӑт ӆавӑӆты, вәнӆтӑты па нух аӆумты щирӑт па культура вєрӑт нух аӆумты оӆӑӊӑн пу­тӑртӆўв. Тӑм хӑтӆ м щи шуши мирев тӑӆаӊа вәӆ­ты пищӑт оӆӑӊӑн ясӑӊ мӑ­нӑс. м щи ин ха ӑктӑщ­сӑт наука, мир мӑӆты вєр тәты департамент, вәнӆ­тӑты па наука вєрӑт тәты департамент ёх па и нумӑс вєрсӑт, муй щирӑт мсыева, тўӊа-щирӑӊа ӆэщӑтты, ӆәӆн увӑс мирев тумтака ат вәс.

Путӑр хӑншӑс: Наталья Краснопеева