Кашӑӊ хӑннєхә ӆўвеӆа рӑхты кан мўвие, кан йиӊкие тӑйӆ, щи кўш щи оӆӑӊӑн имухты ӆўв ӑнт па нәмӑсӆ. Снежана Изюмова пӑта щимӑщ тӑхи – Силава, хута ӆўв єнмӑс па ӆўв йис ёхӆаӆ вєрӑт уша вєрсӑӆӆэ. Тӑмхӑтӆ Снежана «Учинской историко-этнографической» музей хуща рәпитӆ, щит Половинка вошн Кондинской район хуща. Щи музей ӆўв аӆьщӑӆӆэ «ма ӛрєм».

Снежана айтєӆн Ан­на Леонидовна Изю­мова ӑнкеӆ пиӆа мўӊ увӑс мирев йис вєрӑт ӆыӆ­ӊуптуман па шавиман вәсӊӑн, щитӑт пӑта арсыр вєрӑт вєрсӑӊӑн.

Ӑшкола етшуптумаӆ пийн Тюмень воша вәнӆтыйӆты мӑнӑс. Тўта «колледж цифровых и педагогических техно­логий» етшуптӑс, па щи вошн нивӆ оӆ мӑр рәпитӑс па вәс. Айкємн рәт йис вєрӑт ӆўв вәӆупсэӆ эвӑӆт иса йира мӑнты питсӑт. Щи йис вєрӑта Снежана юхӆы кєрӑтса музей кәща хәйн, ӆўв музея рәпитты вохса. Ас хӑӆты тыӆӑщн 2024-мит оӆн Снежана па щи рәт мўвӑӆа юхтӑс па щӑта рәпитты питӑс. 

- Ас хӑӆты тыӆӑщн тыв рәт мўвєма, ма музей кә­ща хәйн рәпитты вохсаюм. Па щи пийн ма вәӆупсєм мӑнєма мосты щира мӑн­ты щи питӑс. Тӑта ма щи вєрӑт вєрты питсум, муй мӑнє­ма әмӑщ вәс, – путӑртӑӆ тӑм хӑннєхә.

Снежана тӑмхӑтӆ арсыр ванӆтупсэт музейн вєрӆ па «Югра ӆыӆӊуптӑты» хуятӑт пиӆа вухаӆь йис вєрӑт ӆыӆӊуптӑӆӑт. Ӆўв тӑмхӑтӆ арсыр вєрӑт вєрӆ: муй тӑхия китӆа – щив щи мӑнӆ па партум вєрӑт вєрӆ.

«Учинской историко-этнографической музей» – щит мєт мӑӊ тӑхи Кон­динской район ху­ща. Щи музей Анатолий Николаевич Хомяков вє­рӑс, щи ики кӑӆы ӆєрӑӆ кондинской мўв йис ёх эвӑӆт мӑнӆ, ӆыв Каур­таев опращ нєм тӑйсӑт.

Музея юхтыйӆты ми­рева путӑртӆӑт, муй вўрн йисн кондинской вухаӆь ёх вәсӑт, муйсӑр ӆәӊхӑта пойкщӑсӑт, муйсӑр мӑӊ­хӑтӆӑт тӑйсӑт. И мӑӊхӑтӆ – щит Вурщӑк хӑтӆ. Снежана ясӑӊӑн, щит мєт вана тӑюм мӑӊхӑтӆ, ӆўв тәп тӑм мўвн вәс. Тӑта, тӑм музей хуща рўщ па вухаӆь вєрӑт ищира вана тӑйӆайт: тӑта кӑтсыр хотӑт вәӆӆӑт, рўщ па вухаӆь хотыет. Тӑм хо­тыет пєӆа ки вантты, иса пўш нумӑса питӆ щи­мӑщ вєр, тӑм мўвн рўщ па ву­хаӆь ёх хўвн иха вәӆты питсӑт.
Снежана нумӑсн, ӆўв мўвӆ вухаӆь ёх оӆӑӊӑн, щит хӑтӆ єтты пєлӑкн вәӆты вухаӆь мирев, нєпекӑтн вєра шимӆ хӑншман вәӆ. Ар нєпек хӑншман увӑс вухаӆь ёх оӆӑӊӑн. Мєт оӆӑӊ пўш Снежана Силавая 2008-мит оӆн юхтыӆӑс. Ӆўв щирн хәт оӆа тәп йис. Щирн Ольга Александровна Актаева тӑм вєр вєрты тәп оӆӊитӑс. Хәт оӆ эвӑӆт хәтхущъяӊ оӆ вәнта ӆўв кашӑӊ ӆўӊ иса пўш тыв ӊхиӆӑс, тәх щос па тӑӆн вәӆӆяс. Тӑта ӆўв єнмӑс, ёх пиӆа вәйтантыӆӑс. 

- Ма щирємн, Силава мухты эвӑӆт ма кан ӆы­пи нумӑс тӑйты питсум, – путӑртӑӆ Снежана. Ольга Александровна ӆўв кимӑт ӑӊкия аӆьщӑсӆэ. Щи имен ая вәӆум кәртӑӆ хонӑӊӑн йиӆуп кәрт вєрӑс, щитӆ ӛхӑт парка па культура центра йис. Ин тыв арсыр Югра мўв сўӊ эвӑӆт мир юхтыйӆӆӑт. 

Снежана ясӑӊӑн, тӑмӑщ кәрт вєрум ёх нумӑсн ӆўв иса пўш щи вәӆ, па щи нумсӑт, щи вєрӑт еӆӆы павӑтты каш тӑйӆ.

- Ӆўв па ма ӑӊкєм йис вєрӑт мӑнєма ая вәӆмєм эвӑӆт кантты питсӑӊӑн. Ин па щитӑт няврємӑта хӑйты мосӆ, – путӑртӑӆ Снежана. 

Тӑм айӆат хӑннєхә ар­сыр ӛшӑт хўват ӊхӑс: мєт оӆӑӊ, ая вәӆмаӆн, йис вєрӑт вана тӑйсӑӆэ, щӑӆта муӆты арат оӆа пасыр вәӆупсыя питыӆӑс, ин па хӆы щи кєрӆӑс. Тӑмхӑтӆ йис вєрӑт пиӆа рәпитты вєрӑт – щит ӆўв вәӆупсэӆ.

Снежана Изюмова ну­мӑсн, йис вєрӑт – и щирн ки – щит музеятн вәӆты пурмӑсӑт, йис хотӑт па мӑӊхӑтӆӑт, кимӑт щирн – щит ӆыӆӑӊ нумсӑт еӆӆы  кантты пищ. Тӑмхӑтӆ ӆўв щимӑщ хӑннєхә, мӑта хуятӑт мухты йис вәӆуп­сы нумсӑт йиӆпа єнумты айӆат ёх вўша юхӑтты питӆӑт.

Путӑр хӑншӑс: Пётр Молданов