Ай ӛрамӑт потты ты­ӆӑщн оӆӑӊмит хӑт­ӆӑн Россия мўв ӆу­ват­тыйн вәнӆата вум хуятӑт хӑтӆ пос­тӑӆы. Ёмвошн щи хӑтӆ вўраӊӑн пи­рӑщ хуятӑт пӑта «Ём­вош мєт апраӊ аӊкаӊ­ки муй па щащи» кӑ­супсы вєрса.

Тӑм кӑсупсы оӆӑӊ шәпӆ лыпӑт хойты ты­ӆӑщ 24-мит хӑтӑӆн «Выставка. Презентация. Хобби» ванӆтупсы ӆэщӑ­тыйӆса. Хута вәнӆата вум нєӊӑт ванӆтӑсӑт, муй ма вєрты хошӆӑт. Тәхӑӆ нєӊӑт єпӆӑӊ ӆєтутӑт вєрсӑт, тәхӑӆ нєӊӑт па ӆыв ёшӆаӆн вєрум пурмӑсӆаӆ аӆьсӑт. Щи хӑтӆ тәп кӑсупсы артаӆӑты ёх кєша вєрыӆыса. 
Тӑм пўш кӑсупсыйн нивӆ вәнӆат нє хуят юх­тӑс. «Визитная карточка» кӑсупсыйн ӆыв вәӆупсэӆ оӆӑӊӑн путӑртсӑт. «Ин­теллектуальная битва» кӑсупсыйн ӆыв сыр-сыр вєрӑт уша вєрсӑт, па мўӊ вантсўв, мӑта нє щи әхтыйн нух питӆ.
Ёмвошевн вәӆты хӑн­ты нєӊиев Мария Гри­го­рьевна Эккерт па щи кӑ­супсыйн вәс. Ӆўв опращ нємӆ Молданова, хӑнты йис рәт эӆты вәӆты хуят. Ваньщавӑт кәртӑн Нуви сӑӊхум (сыры Сўмӑтвош) районӑн ӆўв сєма питӑс.
Тӑм кӑсупсыйн лыпӑт хойты тыӆӑщ 24-мит хӑ­тӑӆн ӆўв увӑс мир арсыр юнтты утӑт тәтьӆийс. Щӑта аканьӆаӆ, тӑӆаӊ хоттєӆ арат хӑнты сухн ёнтсӑӆӆэ па ванӆтӑсӆэ. Щи тумпи ӆўв хӑнты сухӆаӆ – рнасӆ, щӑщкан сӑхӑӆ, ухшамӆ, сэвум вайӆаӆ па нирӆаӆ ищи ванӆтупсыя тәтьӆясӆэ. 

Ин тӑм етн вәӆты кӑ­супсыя Мария Григорьев­на йиӆпа ёнтум 11 арат ӆәмӑтсух тәс. Щи сухӆаӆн округ мир творчества хотн балетной студияя ӊхты айӆат ёх сцена хўват ванӆтуман шәшиӆысӑт. Ма­рия Эккерт ищи ӆўв хӑнты сух­ӆаӆн шәшиӆыйс па Мария Волдина хӑншум ван путӑр әмщиева ӆў­ӊӑт­сӑӆӆэ.
Мария Григорьевна йиӆ­па ёнтум сухӆаӆ, хӑн­ты хурамн хурамтсӑӆӆэ па щи коллекцияйӆ Россия мўвевн ар тӑхета ванӆтӑ­ты щира тәтьӆисӆэ. Щит Марий Эл республикая Йошкар-Ола воша, Буря­тия мўва тәтьӆисӆэ па мирӑта ванӆтӑсӆэ. Щӑта арсыр ишӑк нєпекӑтн па мойӆупсэтн мӑсы.
Тӑм етн Мария Григо­рьевна кӑсупсы артаӆӑты ёхн «Мєт әмӑщ аӊкаӊки» нємн ӆэщӑтса.
Мария Григорьевна пиӆа путӑртмємн, ӆўв щи ястӑӆ: 

- Ма ин кимит пўш тӑмӑщ кӑсупсыя юхӑтсум. Мєт оӆӑӊ 2019-мит оӆн кӑсты щира вәсум. Щи пурайн ма нух питсум па «Ёмвош вуӆаӊ аӊкаӊки муй щащи – 2019» вуӆаӊ нємн мӑ­сыюм. Щи вўш эвӑӆт 7 оӆ мӑнӑс. Тӑм мӑр ма вән коллекция ӆәмӑтсух ёнтсум, увӑс мир поэтӆӑв хӑншум ар ван путрӑт нух вәнӆтӑсум. Щитӆам ин щи ванӆтӑсум.

Па вәнӆат нєӊӑт тӑм етн ищи яксӑт, арисӑт па ӆыв хотӑӊ ёхӆаӆн нёт­сайт, тәхӑӆ нєӊӑт КДЦ «Октябрь» якты хот ёхн якты па ариты нётсайт.
Тӑм етн ар хотӑӊ рәт ёх, ӆәхсӑт па ӆәхӑс нєӊӑт тый юхтыӆысӑт. Ар ӑня лыпӑт тәсӑт рәтнєӆаӆа мойӆӑты щира. Арсыр ӑня щирн хӑншум плакатӑт тәсӑт. 
Тӑм хӑтӆ кӑсупсыйн мєт нух питӑс па «Ёмвош вуӆаӊ аӊкаӊки муй щащи -2026» вуӆаӊ нємн На­деж­да Климова мӑсы. Щи тумпи арсыр номинацияйт вәсӑт: «Мєт арӑӊ-путрӑӊ аӊкаӊки» нємн мӑсы Га­лина Ходылева; «Мєт современной аӊкаӊ­ки» – Елена Бабкина; «Мєт апрӑӊа ӆэ­тут вєрты аӊкаӊки» – Валия Тар­санова; «Мєт эле­гант­ной  аӊкаӊки» – Ольга Гай­даненко; «Мєт каркам аӊкаӊки» – Светлана Иванова; «Мєт хурасӑӊ аӊкаӊки» – Ири­на Бурко.
Ёмвошӑӊ кәща ёх, КДЦ «Октябрь» па арсыр спон­сорӑт эвӑӆт кашӑӊ вән­ӆат нєӊа ӑня лыптӑт па мойӆупсэт мӑсайт.

Путӑр хӑншӑс: 
Наталья Краснопеева