Красноярской край Эвенкийской район Ессей кәртӑн ес­сейской якутӑт вәӆ­ӆӑт. Иха ки ӆў­ӊӑт­ты, щи мир щу­рӑскєм хӑннєхә ӆўӊ­тӑсӆ. Ӆыв вой па хўӆ веӆ­пӑсӆуман, вў­ӆы ӆа­вӑӆ­ман вәӆ­ӆӑт. Тӑм ванӑн ма ес­сейской якут ими Татьяна Те­рентьевна Ботулу пиӆа вәтаӊа йисум. 

Тӑм ими «Дьулур» (рўщ щирн «Стре­ми­тельный») нємпи шу­ши мир община кәща нє­ӊа вәӆ. Щит ӆыв рәт ёхӆаӆ община, хә хуятӑт оӆ мӑр хўӆ веӆпӑсӆӑӆӑт. Щӑӆта щи хўӆ ӆыв Красноярск воша тәӆӑт па щӑта тыныӆӑт. Щи вухӑтн ӆыв хопӑт, моторӑт па хоӆупӑт ӆәтӆӑт. 

- Общинаевн хўӆ веӆ­пӑсӆӑты кӑт хә па хәӆум ёнтӑсты нє рәпитӆӑт. Имет ӆәмӑтсух па ай пурмӑ­сыет ёнтӆӑт. Щӑӆта щи утӑт мўӊ ванӆтупсэтн ищи тыныӆўв, – лупӑс Татьяна Терентьевна.

Ӆўв лупӑс, Красноярс­кой край кәща ёх грант вухӑт хоӆумты щира кӑ­супсэт вєрӑнтӆӑт, щит вєр­ӆы, ӆәӆн увӑс мир йис вәӆупсы, йис вєрӑт ӆа­вӑӆ­ты па еӆӆы тәты. Тӑм ва­нӑн Татьяна Ботулу пўншум «Дьулур» общинайӆ щи­мӑщ кӑсупсыйн нух питӑс па нётупсы вухн мӑсы. Ӆўв лупӑс: 

- Щи вухӑтн ма ёнтӑсты тӑхи пўншсум. Ма ӆә­мӑт­сух ёнтты щўӊкӑт, мос­ты пӑсанӑт ӆәтсум. Ин­тӑм мўӊ сорашӑк мосты пурмӑсӑт па ӆәмӑтсухӑт ёнтты щир тӑйӆўв. Щиты тӑм йис щўӊ­кӑт унтасн мўӊ мирев йис вєрӑт ӆавӑӆӆўв па хотӑӊ ёхӆўв пӑта тыӆӑщ вух ёша хоӆумӆўв. 

Татьяна Терентьевна ясӑӊӆаӆ щирн, ӆыв рәтэӆ пӑта кўрк мӑӊ тухӆӑӊ воя вәӆ. Рәт ёхӆаӆ йистєӆн щи воя пойкщӑсӑт. Татьяна Ботулу хотӑӊ ёхӆаӆ пиӆа ищи щи тухӆӑӊ вой мӑ­ӊа тӑйӆӑт па рәт мир йис вєрӑт, йис вәӆупсы ӆа­вӑӆман вәӆӆӑт. Ессей кәр­тӑн тохтӑӊ ищи мӑӊ воя ӆўӊӑтӆы. Щирн щи вой ёш-кўр хӑнши щирн ӆыв ӆәмӑтсухӑта ёнтӆӑт. 

Щи ими пиӆа путӑрт­мєм пурайн ӆўв пиӆэӆа хиӆнєӊӑӆ вәс. Татьяна Терентьевна ӆўвеӆа ӆыв миреӆ хурамӑӊ ӆәмӑтсух ёнтӑс, щӑта тохтӑӊ ёш-кўр хӑнши ёнтман вәӆ. Эвие рәт мир ӆәмӑтсухӑӆ мосман тӑйӆӑӆэ, иса мӑӊхӑтӆӑта ӆўв щит ӆәмӑтӆ 

Татьяна Терентьевна и пух па хәӆум хиӆы тӑйӆ. Хуӆыева рәт мир йис вәӆупсы ӆавӑӆман вәӆӆӑт. Хә хуятӑт няврє­мӑт вой па хўӆ веӆпӑсӆӑ­ты вәнӆтӑӆӑт. Имет эвета ванӆтӑӆӑт, хутыса рәт мир ӆәмӑтсух ёнтты мосӆ. Ӆыв мӑӊхӑтӆӑт пурайн щи ӆәмӑтсухн ӊхӆӑт. Ёнтум пурмӑсӑт ванӆтупсэта китыйӆӆӑт па нух питӆӑт. Ма щирємн, щимӑщ ӆә­мӑтсух кашӑӊ хӑннєхә ёнтты щир ӑн тӑйӆ, щи вєра айтєӆн вәнӆтыйӆты мосӆ. Татьяна Терентьевна ӑӊкеӆн щи вєра вәнӆтӑсы, ӆўв айтєӆн щи рнасӑт ёнтты хошӆ.

Мєт әмӑщ уша вєрты, хиӆнєӊӑӆ ищи ёнтӑсты вєр пєӆы сӑмӑӊа вәӆ, вантӑӆ, хутыса щащеӆ ёнтӑӆ па йинтуп вохӑӆ, ищи ёнтӑсты ӆӑӊхӑӆ. Щиты ессейской якутӑт рәт ёх йис вєрӑт еӆӆы тәӆӑт.

Путӑр хӑншӑс: 
Надежда Рагимова