Тӑм ванӑн Сўмӑтвош район Тэк кәртӑн вәӆмємн ма вәна пєлка вум ими Галина Михайловна Курганова (Новьюхова) хуща мойӊа ӊхсум. Интӑм ӆўв йиӆуп хурамӑӊ вән кӑт нартупӑӊ х хотн вәӆ. Шай яньщман ма ӆўвеӆ вәӆупсэӆ оӆӑӊӑн иньщӑссєм па уша вєрсум, интӑм муй вєрман вәӆ. 

Ӆўв Новьюхов хӑнты рәт эвӑӆт йиӆ. Щи рәт оӆӑӊӑн путӑртты ки, ӆыв хўв йисн Увӑс Кунавӑт мўв эвӑӆт Тэк мўва касӑӆсӑт. Тӑта ӆыв Новьюхов оп­ращнєм тӑйты питсӑт. Аӆ­па, сўмӑт нуви х, нуви ух муй па пасыр ясӑӊ эвӑӆт опращнєм тывӑс.

Ӆўв ащеӆ Михаил Анд­реевич Новьюхов Вущрэӊ кәртӑӊ икия вәс, ӑӊкеӆ Екатерина Семёновна хӑнты Рябчиков рәт эвӑӆт йис. Ӆыв семьяеӆн нивӆ няврєм сєма питсӑт. 1942-мит оӆн ащеӆ ӆаӆя мӑнӑс, Ленинград вош пўӊӑӆн ӆаӆясӑс. 1944-мит оӆн юхи кєрӆӑс. Ӆўв еӆӆы вәӆупсэӆ хўват хўӆ па вой веӆпӑсӆӑс, имеӆ «19 партсъезд» нємпи кол­хозн мис пәсты нєӊа, турн сэвӑрты хуята рәпитӑс па арсыр рәпатайт тәс. 

Галя Тэк кәртӑӊ ӑш­колайн вет класс вәнты вәнӆтыӆӑс, еӆӆы Сўмӑт­воша мӑнӑс, щӑта ӑш­кола етшуптӑс. Ӛхӑт Че­лябинской область Миасс вошн геолого­раз­ведоч­ной техникумн вәнӆтыӆӑс. 1970-мит оӆн геофизика йис, нєпекӑӊ айӆат хуят Узбекистан мўв Ташкент хон воша рәпитты китсы, вантэ, 1966-мит оӆн щӑ­та мўв така торитты вєр вәс, щит пӑта вош йиӆ­патты мосӑс. Еӆӆы 24 оӆ хиш мўвн йиӊк кӑншӑс, заводн рәпитӑс. Икеӊа йис, щемьяйн кӑт пухӊӑн сєма питсӑӊӑн, итӆ ӑнтә­ма йис.
СССР мўвев ара питум (лакки ӆосытум) пурайн Галина Михайловна 1994-мит оӆн Дмитрий пухӆ пиӆа юхӆы Тэк рәт кәртӑӆа кєрӆӑс, ӑшко­лайн «География» урок тәс. Щи тумпи ӆўв щи пурайн ванӑн вәӆты кәртӑта ӊ­хиӆӑс па пирӑщ ёх эвӑӆт йис путрӑт, моньщӑт, арӑт ӑктӑс, щӑӆта щитӑт тәса нєпека хӑншсӑӆэ па Югорской госуниверситет хуща вәӆум хӑнты ясӊуп научной тӑхия китсӑӆэ.
Ӆўв пухӆ Дмитрий Юрьевич Курганов ӑӊ­кеӆ иты ар оӆ ӑшколайн рәпитман «Информатика» урок тәӆ.

Рўтьщӑты мӑнмаӆн Галина Михайловна па вәна вум кәртӑӊ имет пиӆа «Ас нє» па няврємӑӊ «Ай Ас ёх» ариты, якты тӑхеӊӑн вєрсӑт. Ӆыв иха арсыр кәртӑта, вошӑта етнхотӑт аӆьман ӊхӆӑт па ишӑкты нєпекӑт пиӆа юхӆы кєрӆӑӆӑт. Ӆорвош район «Ван рәтӑт» вән мӑӊхӑтӆа ищи ар пўш ӊхийӆсӑт. 

- Шєӊк әмӑщ вәс Челя­бинской область хуща ӆэщӑтум вән фестиваля ӊхты, мўӊ ансамблев щӑта нух питӑс, – Галина Михайловна ястӑс.

Щи тумпи Галина Ми­хайловна тунты эвӑӆт арсыр мосты па хурамӑӊ пурмӑсӑт вєрты вәнӆтӑӆ, лупӆ: 

- Айтєӆн ма вантсум, муйсӑр пурайн па муй щирн ӑӊкєм тунты ху­рӑс, ӆэщӑтас, щӑӆта арсыр хурамӑӊ пурмӑсӑт вєрӑс. 1990-мит оӆӑтн Ёмвош округевн Касум, Вах мўвӊӑн тунты эвӑӆт пурмӑсӑт вєрты вәнӆтӑты хӑрӑт ӆэщӑтты питсыйт. Ма ищи нумса юхӑтсыюм аӆьты, муй щирн мўӊ хущева Тэк хӑнтэт тунты эвӑӆт арсыр пурмӑсӑт вєрӆӑт. Мосӆ лупты, увӑс хӑнтэт мўӊ пиӆэва еша и хурпия вєрӆӑт, хӑншет еша и хурпет вәӆӆӑт, Вах юхан хонӑӊӑн вәӆты хӑн­тэт – па щирн вєрӆӑт, ӆыв пасыр хӑншет тӑйӆӑт. Ма Тэк кәртӑӊ ӑшколайн кружок хуща эвет тунты пиӆа рәпитты вәнӆтӑсум, ин щи вєр еӆӆы хӑнты ясӑӊа вәнӆтӑты нє Олеся Вячеславовна Хандыби­на тәӆ. Ӆўв хуӆна еӆӆы няврємӑӊ ансамблев пи­ӆа рәпитӆ.

м оӆ юхӆы Галина Михайловна Пуӆӊавӑт воша «Душа тундры» фес­тиваля вохсы. Ӆўв щӑта ищи тунты эвӑӆт арсыр хурамӑӊ пурмӑсӑт вєрты вәнӆтӑс.
Интӑм Галина Михай­ловна рўтьщуман хиӆы­ӆаӆа хӑнты рнасӑт ёнтӑӆ, ястӑӆ: 

- Хиӆыӆам айтєӆн ищи хӑнты арӑт ариӆӑт, як­ӆӑт, интӑм арсыр шуши мир кӑсупсэтн кӑсӆӑт па нух питӆӑт, ма ӆыв пӑ­тэӆа амтӑтьӆяӆум. Ксю­ша хиӆнєӊєм Санкт-Пе­тербург вошн А.И. Герцен нємпи педуниверситетн вәӆты Увӑс мир институтн вәнӆтыйс па ин тыв юхтӑс па няврємӑт хӑнты якӑт якты вәнӆтӑӆ. Щит ма пӑтєма ищи вән амӑт! – Галина Михайловна Курганова ястӑс. 

Юхи хӑщум артӑн Га­лина Михайловна лупӑс: 

- Тэк – хӑнты йис кәртые, тыв ӆўӊ пурайн тўтӑӊ хопн Россия мўвев арсыр тӑхет эвӑӆт мойӊ ёх тәтьӆяты рӑхӆ. Мўӊ, вантэ, ӆывеӆа хӑнты мир вәӆупсы оӆӑӊӑн путӑртӆўв, арӑт ариӆўв, якӑт якӆўв, хурамӑӊ пурмӑсӑӊ ванӆтупсы ӆэщӑтӆўв.

Путӑр хӑншӑс: 
Людмила Шульгина