Ас нопатты тыӆӑщ 29-мит хӑтӆӑн Ёмвошн Василий Иванович Шульгин ӑнтәма йис.

Ӆўв 1952-мит оӆ лыпӑт хойты ты­ӆӑщ 10-мит хӑтӆӑн Ямал мўв Ӆорвош район Илья кәртӑн Вуӆаӊ Отечественной ӆаӆьн ӆаӆясум хә Иван Фи­липпович Шульгин ще­мьяйн сєма питӑс. 
Ӆўв хәӆмит няврєма вәс. Хәнты ӆўв путӑртӑс, Микуль (хӑнты мирев оӆӑӊмит поэт хә) вән яеӆ пєӆа вантман ищимӑщ хӑннєхәя йиты ӆӑӊхас.

Ӑшколайн ма вәнӆ­тыӆӑс. 1968-мит оӆн Асов кәртӑн нивӆ класс ет­шуптумаӆ пийн Ём­воша мӑнас. Щӑта пе­дучилищайн экзаменӑт ма мӑс па ай няв­рємӑт вәнӆтӑты вєр оӆӑӊӑн уша вєрты питӑс. 
Ӛхӑт Ленинград вошн А.И. Гер­цен нємпи го­сударст­венной педаго­ги­ческой институтн вәнӆ­тыӆӑс. Щи пурайн ипў­ӆяӊ мўӊ «Ленин пӑнт хўват» (ин «Хӑнты ясӑӊ») га­зе­таева Увӑс мир айӆат ёх вәнӆтыйӆты вєрӑт оӆӑӊӑн айкеӆӑт хӑншты оӆӊитӑс.
Нєпекӑӊа вмаӆн Сўмӑтвош район Тэк кәртӑн няврємӑт рўщ ясӑӊа па литературая вәнӆтӑс. 

Еӆӆы Ёмвоша касӆӑс. Тӑта мўӊ «Ленин пӑнт хўват» хӑнты газетаевн айкеӆӑт ӑкӑтты хәя рә­питӑс. 
Щӑӆта ар оӆ округ пра­вительствайн па Ду­майн рәпитӑс. Туӆта эвӑӆт рўтьщӑты мӑнӑс. ма рәпитман пӑта арсыр мевӆ посӑт па ишӑкты нєпекӑт тӑйс.
Ульяна Николаевна (эви опрӑщнємӆ Ран­дымова вәс) имеӆ пиӆа хәт няврєм єнмӑӆтӑс, хиӆыӆӑн єнмӑӆты нётӑс.
Ӆўв нумсӑӊ па кар­кам хуята вәс. Мўӊ ӆў­веӆ щимӑщ хуята нәм­ман тӑйты питӆўв.
Ӆўв щемьяеӆа, рәт ёхӆаӆа, ӆәхӑсӆаӆа шаль ясӊӑт китӆўв. 

«Хӑнты ясӑӊ» газетайн рәпитты ёх