Щимӑщ нєм тӑйӆ йиӆуп киника, мӑта ут Валентина Соловар хӑнты ясӑӊӑн няврємӑт пӑта хӑншӑс па тӑм ванӑн єсӆӑс. Няврємӑт ӆавӑӆты Мўвтєӆ мир хӑтӆӑн Ас-угорской научной институтн вәӆты киникайт ӆўӊӑтты хотн тӑм йиӆуп киника аӆьты вєр вәс. Әмӑщ, хуты тӑмхӑтӆ тӑта институт научной рәпатнекӑт няврємӆаӆ па хиӆыӆаӆ пиӆа ӑктӑщсӑт.

Институт кәща нє В.И. Сподина вўща вєрӑс:

- Шєӊк әмӑщ, хуты тӑм­хӑтӆ мўӊ хущева киникайт ӆўӊӑтты вєр сӑмӑӊа тӑй­ты эвет па пухӑт мойӊа юхӑтсӑт. Айтєӆн киникайт эвӑӆт пушхиет вәӆупсы оӆӑӊӑн уша вєрӆӑт. Па хон пєлӑк Швеция мўвн вәӆ­ты няврємӑӊ киникайт ака­демия учёной ёх ар хуят иньщӑссӑт, муй пӑта ки­ника мосӆ? Мир арсыр юх­ӆы ясӊӑт лупсӑт. И вуӆаӊ ясӑӊ: няврємӑт пӑта киника – щит еӆӆы ӆўӊӑтты вєр хўв ӛш, айтєӆн ӆўв киника ӆўӊӑтты мосман тӑйӆ ки, еӆӆы иса пурайн ӆўӊӑтты питӆ па нумсӑӊа йиӆ.

Няврємӑт пӑта киникайн мєт вуӆӑӊ – щит хурамӑӊ хурӑт, вантэ, щитӑт нётӆӑт уша вєрты, муй оӆӑӊӑн хӑншман вәӆ.

Киника єсӑӆты вєр – вән рәпата, нєпек хӑншты хуята ар хӑннєхә нётӆ – редактор, хур хӑншты хуят па па хуятӑт.
Мўӊ щимӑщ киника єсӑӆӆўв, ӆәӆн кашӑӊ няв­рєм имухты ӆўӊӑтты ат пиньщӑс. Айтєӆн эвета-пу­хӑта киникайт ӆавӑӆман тӑйты вәнӆтыйӆты мосӆ – щит вән ӆәхӑс!
Мўӊ хущева «Учёнойт няврємӑт пӑта» вєр ӆэ­щӑтман вәӆ, В.Н. Соловар тӑм йиӆуп киникайӆ ищи вән унтас тәс.

Па оӆн вән кєр тыӆӑщ 2-мит хӑтӆӑн няврємӑӊ киника мўвтєӆ мир хӑтӆ питӆ, мосӑӊ, щи хӑтӆ вәнта Валентина Николаевна йиӆуп киникайӆ єсӑӆӆэ.

Мосӆ лупты, тӑм нєпекӑн няврємӑт, ӆыв вәӆупсэӆ, хурамӑӊ мўв-авӑт, мойӊа ӊхты вєр па сыр-сыр әмӑщ вєрӑт оӆӑӊӑн стихӑт па амамӑтщет хӑншман вәӆӆӑт.

Валентина Соловар вў­ща вєрӑс:
- Ешӑк вән хуятӑт па няврємиет, вўща вәӆаты! Тӑмхӑтӆ няврємӑт пӑта мӑӊхӑтӆ па ипўӆяӊ йиӆуп киникам сєма питум хӑтӆэӆ. Йиӆуп нєпека «Ар сувэн» нєм мӑсум. Вантэ, йистєӆн кашӑӊ хӑнты кәртӑн мир хурамӑӊ мўвев, вәӆупсэв, няврємӆаӆ па па вєрӑт оӆӑӊӑн арӑт арисăт. Катрайн ар эвӑӆт хӑннєхә вәӆупсы оӆӑӊӑн уша вєрты рӑхӑс.

Кашӑӊ хӑннєхә ай пу­раеӆ – щит мєт вуӆаӊ пура, щи пурайн мўӊ вә­ӆупсы оӆӑӊӑн уша вєрӆўв. Тӑм киникайн ищи пух вой веӆпӑсӆӑты хәя йиты ӆӑӊхаӆ – ӆўв вәнтӑты сон­тумӑс, юхи веӆум войӆ пиӆа кєрӆӑӆ. Щи тумпи тӑта ӆаӊки па кўщар оӆӑ­ӊӑн хӑншман вәӆ, муйсӑр вєрӑт ӆыв тӑ­ӆаӊ хӑтӆ вєрӆӑт па муйсӑр сопасӑт тӑӆ пӑта ӆэ­щӑтӆӑт. Еӆӆы ӆўӊӑтӆаты, муй щирн ӆоньщӑн пойтэк хӑ­нятыйӆ, хоӊхра тыйӊ нюӆн х сэӊкӑӆ.
Мосӆ лупты, тӑм кини­ка хурамӑӊа єтӑс, вантэ, тӑм институтн рәпитты хур хӑншты нє Наталья Жеманская хурӑт хӑншӑс.

Тӑм йис щўӊк унтасн киника ӑнтә тәп ӆўӊӑтты рӑхӆ, хәӆӑнтты ищи рӑхӆ, Валентина Соловар ӆўӊ­тарӆаӆ ӆўӊтӑс.

Мєт әмӑщ вәс хәӆӑнт­ты, хутыса няврємӑт тӑм нєпек эвӑӆт хӑнты ясӑӊӑн ӆўӊтарӑт ӆўӊӑтсӑт.

Валентина Соловар йис хӑнты амамӑтщет иты ин вәӆупсы оӆӑӊӑн ама­мӑтщет хӑншӑс, тӑм­хӑтӆ мўӊ иха уша вєрсўв.

Юхи хӑщум артӑн В.Н. Соловар киникаеӆн ёш посӆ пунсӑӆэ па мойӊ ёха мойӆӑсӆэ. 

Путӑр хӑншӑс: Людмила Шульгина