Щиты лупӑс ар оӆ Нуви сӑӊхум вошн ай няврємӑт тӑйты хотн рәпитты хӑнты нє Любовь Николаевна Пашина (Немысова). Ма ӆўв пиӆэӆа тәняӆ Нуви сӑӊхум вошн вәтаӊа йисум, ӆўв хущеӆа мойӊа ӊхсум.

Любовь 1973-мит оӆн Нуви сӑӊхум район Поӆнавӑт кәр­тӑн сєма питӑс. Ӆўв ӑӊкеӆ – Мар­фа Петровна Немысова – Мущӑӊ кәртӑӊ нєӊие вәс, щӑта 1935-мит оӆн сєма питӑс. Ӆўв щемьяйн мєт ай 11-мит няврєма вәс. Любовь Николаевна ащеӆ – Пётр Гаврилович Пендахов – щӑта колхоз кәщая вәс. 
Любовь еӆӆы лупӑс:

- Мўӊ щемьяевн хәӆум няврєм вәс. Поӆнавӑт кәртӑн хӑтӆ мӑр ай няврємӑт тӑйты хота, щӑӆта ӑш­колая ӊхсум. 11-мит класс ет­шуп­тумєм пийн 1992-мит оӆн Ём­воша мӑнсум, педучилищайн ма экзаменӑт мӑсум па ай няврємӑт тӑйты вєра вәнӆтыйӆты питсум. Вәнӆтыйӆты пура – щит шєӊк әмӑщ пура, м вәнӆтӑты хуятӑт, м эвет пиӆа вәтаӊа йисум, тӑм пура вәнты ӆәхсӑӊа вәӆӆўв. Иха арсыр мӑӊхӑтӆӑт ӆэщӑтсўв, кӑсупсэтн кӑссўв, тӑӆ пурайн ӆухн хӑтӑтьӆясўв. Рәт Поӆнавӑт кәртӑн хӑтӆ мӑр ай няврємӑт тӑйты хотн практика вєр тәсум, ай няврємӑт пиӆа рәпитты вәнӆтыйӆсум. 
1994-мит оӆн Люба педучилища ештуптӑс, тәп щи пийн Нуви сӑӊ­хум вош пўӊӑӆн вәӆты «Северян­ка» нємпи рўтьщӑты хотн рәпитӑс, щӑӆта «Казымтрубстрой» тӑхийн рәпитӑс. Тәп 2008-мит оӆн Нуви сӑӊхум вошӑӊ «Моньщ» нємпи хӑтӆ мӑр ай няврємӑт тӑйты хотн нянечкая рәпитты оӆӊитӑс, айӆтые­ва воспитателя йис. Интӑм ар оӆ «Теремок» хотн рәпитӆ. Рәпатайӆ оӆӑӊӑн щиты путӑртӑӆ:

- Мўӊ хущева шуши мир няврємӑт ӑнт ӊхӆӑт, ар пєлӑк рўщ па па мирӑт эвет-пухӑт. Щит пӑта ӆывеӆа Нуви сӑӊхум районӑн вәӆты шуши хӑнты па юрн мирӊӑн оӆӑӊӑн путӑртӆўв, рўщ ясӑӊӑн моньщӑт моньщӆўв. м арат оӆ юхӆы шуши мир вәӆупсы, пурмӑсӑт па па утӑт аӆьты пӑта ай музей вєрсўв. Щи тумпи итәх мӑӊхӑтӆӑт ванӆтӑӆўв, щиты Вур­ӊа хӑтӆ ӆэщӑтӆўв, хурамӑӊ вурӊа ӆәмӑтсух кӑсупсыйн кӑсӆўв. 
Эвета-пухӑта «Пасха» рўщ мир мӑӊхӑтӆ оӆӑӊӑн путӑртӆўв. «Пасха светлая» кӑсупсыйн кӑсӆўв па нух питӆўв.
Любовь Николаевна рәпатайӆ щирн кашӑӊ хәӆум оӆ вәнӆтыйӆты ӊхийӆ па уша вєрӆ, хутыса йиӆуп щирн няврємӑт пиӆа рәпитты мосӆ. Ӆўв ар оӆ рәпитман «высшей категория» ут тӑйӆ. Еӆӆы лупӆ:

- Ай пушхиет пиӆа шєӊк әмӑщ рәпитты, ӆыв, вантэ, сыстам нєпек иты, муйсӑр вєрӑта вәнӆтӑӆыйт, щи­мӑщ хӑннєхәя йиӆӑт. Мӑнєма мєт шаль, хән ӆыв мўӊ эвӑӆтэва ӑш­колая мӑнӆӑт. Шєӊк м, хән ӆыв еӆ­ӆы мўӊев камн шиваӆӑтэӆн вўща вєрӆӑт. 

Ар оӆ няврємӑт пиӆа рәпитман Любовь Николаевна арсыр ишӑкты нєпекӑт тӑйӆ.
Любовь Виталий Иванович икеӆ пиӆа Дмитрий пу­хӑн па Анатолий Немысов апщеӆ єнмӑӆсӑӊӑн. Тӑм ванӑн икеӆ ӑнтә­ма йис. Пухӆ Нуви сӑӊхум вошн программиста рәпитӆ. Апщеӆ «Центроспас-Югория» хуща тўт хә­рӑтты хәя вәӆ. Еӆӆы лупӑс:
 Ӆўӊ пурайн мўӊ иха вәнтӑн воньщумутӑт па тулхӑт ӑкӑтӆўв, Асн хўӆ ншӆўв. Ванкўтӆы рәт Поӆ­навӑт кәртєма рәтӆўв хуща мойӊа ӊхийӆӆўв. Ин Немысов рәтєм оӆӑ­ӊӑн родословной нєпек хӑншты вўтщийӆӆум, ма ар рәт тӑй­ӆум, щирн хӑншты мосӆ. Сыры ма рўтьщӑты пурайн ёнтсум, тыйсум, ин сємӊӑӆам вевтама йисӊӑн. 
Любовь Николаевна юӆн нєпекӑт эвӑӆт вєрум хурамӑӊ оригами утӑт шиваӆӑсум, ӆўв щитӑт юхи хӑщум оӆӑтн вєрты питӑс, лупӆ:

- Ипўш щит рәпатам пӑта вєрты мосӑс, щӑӆта мӑнєма шєӊк мәстӑс па ма юӆн ищимӑщ арсыр утӑт вєрты питсум, шєӊк әмӑщ. Итәх пурайн хуйтат вєрты вохӆӑт, ма ӆывеӆа сӑмӑӊа вєрӆум. 
Л.Н. Пашина мўӊ «Хӑнты ясӑӊ» газетаев ӆўӊӑтӆ, ӆўвеӆа мєт әмӑщ м хӑннєхәйт оӆӑӊӑн путрӑт ӆўӊӑтты. Щи тумпи мўӊ газетаев эвӑӆт рә­патайӆ щирн няврємӑт пӑта ай путрӑт па моньщӑт иха ӑкӑтӆ, щӑӆта ай пушхиета ӆўӊӑтӆ. Любовь Николаевна путӑртӑӆ:

 Шєӊк м, хуты нын, айкеӆӑт ӑкӑтты ёх, няврємӑт пӑта ищи кӑсупсэт ӆэщӑтӆӑты, ӆыв путӑрӆаӆ па арсыр әмӑщ нумсӑӊ кӑсты утӑт хӑншӆӑты. Няврємӑт вәнӆтӑты ёх па мўӊ пӑтэва щит шєӊк вән нётупсы.     

Путӑр хӑншӑс: Людмила Гурьева