Нуви сӑӊхум район Касум вошн «Вўӆы сўх эвӑӆт пурмӑсӑт ёнтӆум» нємпи вєрӑӊ тӑхи тӑм ӆўӊӑн рәпитты питӑс. 

2026-мит оӆн «Грант губернатора» кӑсупсы хуща «Вўӆы сўх эвӑӆт пурмӑсӑт ёнтӆум» нємпи вєр нух питӑс. Щи вєр Юрий Кузьмич па Ольга Александровна Тарлин­ӊан ӆэщӑтсӑӊӑн. «Вўӆы ӆавӑӆты ёх» община хущи кәщая Юрий Кузьмич рәпитӆ. 
Щит шуши ёх община, щӑта Тарлинăт хоттєӆ ёх рәпитӆӑт. Ӆыв кәртӑӆ Касум вош пўӊӑӆӑн вәӆ. 
Ӆыв тӑӆ пурайн щив «Буран» тўтӑӊ хопн кӑт щос мӑр мӑнӆӑт, ӆўӊӑн вәнт кәрта кўрн шәшты мосӆ па щаӆта «Буран» тўтӑӊ хопн мӑнӆӑт. 
Тарлинӑт вәнтӑн вўӆы ӆавӑӆман вәӆӆӑт. Вәнт кәр­тэӆн кашӑӊ хӑтӆ ар вєр, ӆў­ӊӑн пєӆӊа пурайн пә­шӑс хуща пәсӑӊ пунты мосӆ. Ӆыв ӆўӊ па сўс пурайн арсыр воньщумутӑт ӑкӑтӆӑт. 

Щит вєрӑӊ хӑннєхәйт, йистєӆн лын ӑӊкиӊӑӆан-ащиӊӑӆан вәнтӑн вўӆы­ӆаӆ пиӆа вәсӑт па тащ ху­ща рәпитсӑт. Муй вєрӑт вәӆӆӑт, иса хошӆӑт, мосты хӑнты пурмӑсӑт вєрӆӑт, хӑнты ӆәмӑтсух ёнтӆӑт.

Щи проектӑн ӆын ар мосты вєр ӆэщӑтӆӑӊӑн. Ӆыв хущеӆа мойӊ ёх па шуши мир хоттєӆ ёхӆаӆ пиӆа юхтыйӆты питсӑт. Щӑта ӆыв рўтьщӑӆӑт па хӑнты мир вәӆупсы оӆӑӊӑн уша вєрӆӑт, муй вўрн вўӆы сух эвӑӆт пурмӑсӑт вєрты па ёнтты. 

Мойӊ хуятӑта хўв мӑр вәнӆтыйӆты мосӆ, ӆәӆн ху­рамӑӊ хошум сухӑт ёнт­ты па м тынщӑӊ тый­ты. Щӑта вән ёх айӆат хуя­тӑт па няврємӑт арсыр вє­рӑта вәнӆтӑӆӑт. Айӆат ёх вантӆӑт, муй вўрн вўӆы ӆа­вӑӆты ёх рәпитӆӑт, муй вўрн нюки хот омӑсӆӑт.   
Мосӆ лупты, итәх хуя­тӑт тӑм ӆўӊӑн оӆӑӊмит пўш ӆыв хущеӆа юхăтсӑт. На­талья Канева хоттєӆ ёхӆаӆ пиӆа щив ищи ӊхӑс. Ӆўв лупӑс:

- Ма нәмӑстємн, тӑмӑщ хӑрӑта ар кәртӑӊ мир няв­рємӆаӆ пиӆа юхтыйӆты питӆӑт. Мўӊ ёнтӑсты вәнӆ­тыйӆсўв, муй вўрн йис щирн ёнтты мосӆ, йис вє­рӑт уша вєрсўв. Мўӊ вәнӆ­тӑсыюв, муй вўрн вўӆы сух тӑнӑӆты мосӆ, муй вўрн вўӆы сух эвӑӆт нюки вєрты. Вәнта нӛрума ӊхсўв, ӆәӆн тўӊк ӑкӑтты, щӑӆта вўӆы сух пушӑӆтӑты пунсўв, пўнӑӊ сух эвӑӆт нюки вєр­сўв, щит ӆавӑрт рәпата. Мўӊ вәнтӑн воньщумут ӑкӑтсув. Няврємӑт пиӆа турн ӑкӑтты ӊхсўв. Турн ӑкӑтты мосӆ, ӆәӆн тӑӆн єпӆӑӊ шайт кавӑртты. Мўӊ ар вєр оӆӑӊӑн уша вєрсўв. 

Мўӊ щи рўтьщӑты тӑ­хи ӆэщӑтты хуятӑта ӆӑӊ­хаӆўв пәмащипа ясӑӊ лупты. Мєт м, хуты ӆыв мойӊ ёх хӑнты мир йис вєрӑта вәнӆтӑӆӑт, щирн мўӊ мўвевн шуши мир йис вєрӑт еӆӆы мӑнӆӑт.

Путӑр хӑншӑс:
Светлана Рандымова