Ямал мўв Пуӆӊавӑт воша ӊхмємн ма Лилия Сергеевна па Олег Тимофеевич То­больчинӊӑн пиӆа вәтаӊа йисум. Пиӆӊӑн Приуральской район Катравош кәртӑн вәӆӆӑӊӑн.

Лилия Сергеевна эви опращ нємӆ Рус­каламова вәс. Ӆўв Ямал мўвн хӑнты семьяйн єн­мӑс, ащеӆ – Сергей Егорович – хўӆ веӆпӑсӆӑты хәя вәс. Ӑӊкеӆ – Альбина Ирьевна – вухсар вошн рәпитӑс. Сыры рәт ёхӆаӆ хуӆыева нӛрумн вўӆы ӆавӑӆман рәпитсӑт. Ӛхӑтшӑк хўӆ веӆ­пӑсӆӑты питсӑт. Хотэӆн хә­ӆум няврєм вәс, Лилия вән эвия вәс, ӆўв пеӆн – Евгений, Матрёна па Юлия апщиӆаӆ. 

Лилия ӑшколайн 11-класс вәнты вәнӆты­ӆӑс, щи пийн рәт кәр­тӑӆн хӑщӑс. Ӆўв хӑтӆ мӑр вухсар вошн рәпитты питӑс, етн пурайн еӆӆы вәнӆтыйӆты щира кини­кайт ӆўӊтӑс. Щӑӆта ӆўв заочной щирн Омской финансовой техникум хущи вәнӆтыйӆты питӑс. Еша вәс ӆўв кәща хота вух ӆўӊӑтты нєӊа рәпитты вохсы. 

Щиты иха ки ӆўӊӑтты, Лилия Сергеевна 33 оӆ мӑр вух ӆўӊӑтты нєӊа рә­питӆ, ӛхӑт 14 оӆ ӆўв Кат­равош кәртӑн няврємӑт вәнӆтыйӆты тӑхийн вух ӆўӊӑтты нєӊа вәӆ. 

1994-мит оӆн Лилия Сергеевна икия мӑнӑс, щит Олег Тимофеевич То­больчин. Пиӆӊӑн ая вәӆ­мӑӆн ӆәхсӑӊа вәсӊӑн, и­ха юнтсӑӊӑн, вәна в­маӆн пиӆӑӊа йисӊӑн. Олег Германия мўвн кӑт оӆ мӑр служитӑс. Лилия ӆў­веӆ ӆавӑӆсӑӆэ, пищмайт хӑншӑс. 

Олег Тимофеевич ищи хӑнты семьяйн єнмӑс. Тәп ащеӆ Тимофей Ива­нович Тобольчин рәт ёх­ӆаӆ кўтн вухаӆь ёх ищи вәсӑт. Ӑӊкеӆ – Прасковья Павловна (эви опращ нємӆ Серасхова вәс) – хӑнты нєӊа вәс. Прасковья Павловна хӑнты мир йис вәӆупсы, йис вєрӑт тәса вәсӆэ. Кәртӑӊ хӑннєхуятӑт ӑнтәма вмеӆ пийн иса пурайн Прасковья Павловна вохӑнтсы. Ӆўв хӑннєхә шавиты вєр иса хӑнты щирн вєрсӑӆэ. Щи имэн ма вәсӆэ, муй рӑхӆ вєрты, муй ӑн рӑхӆ. 

Интӑм Лилия Сергеевна па Олег Тимофеевич рўщ щирн вәӆӆӑӊӑн, тәп хӑнты мир йис вєрӑт вәӆӊӑн, мӑӊхӑтӆӑт постӑӆӊӑн. Лилия Сергеевна лупӑс:

- Хӑнты щирн имия хә хуят ӆәмӑтсух муй па па пурмӑсӑт әхтыйн сәхмӑтыйӆты ӑн рӑхӆ. Щи вєр ма ма вәӆєм. Щӑӆта мўӊ мирев хущи имия сорт па паннэ хўӆ эвӑтты ӑн рӑхӆ, щи хўӆ тәп хә хуят эвӑтӆ. Мўӊ рәт ёхӆўв хущи кашӑӊ ими хӑнты рнас тӑйӆ.

Лилия Сергеевна па Олег Тимофеевич рўть­щӑты хӑтӆӑтн вәнта вонь­щумут воньщты ӊх­ӆӑ­ӊӑн, вой па хўӆ веӆпӑсӆӑ­ӊӑн. Щи вєрӑт ӆын ай­тєӆн мосман тӑйӆӑӊӑн. Сыры ай пураенӑн ӆын ӑӊ­киӊӑӆан-ащиӊӑӆан пи­ӆа вәнта ӊхсӑӊӑн па хўӆ веӆпӑсӆӑсӊӑн.  

Тӑӆ пурайн тӑӆ ӛш хўват рўтьщӑты хӑтӆӑтн пиӆӊӑн Пуӆӊавӑт воша ӊхӆӑӊӑн. Щӑта Виктория эван хотӑӊ ёхӆаӆ пиӆа вәӆ. Ӆын Максим хиӆэӆ мосман тӑйӆӑӊӑн.

Мўӊ Лилия Сергеевна па ӆўв хотӑӊ ёхӆаӆа ӆӑӊ­хаӆўв м вўща ясӊӑт луп­ты, тӑӆаӊа, ма, уяӊа-пи­щӑ­ӊа ат вәӆӆӑт!

Путӑр хӑншӑс: Надежда Рагимова