Интӑм Россия мўвев хўваттыйн иса ӑшколаятн няврємӑт вәнӆтыйӆты оӆӊитсӑт. Мєт әмӑщ, хуты вўӆы ӆавӑӆты ёх няврємӆаӆ ищи вәнӆтыйӆты щир тӑйӆӑт. Югра мўвевн «Стойбищная школа» вєр унтасн пушхиет ар оӆ мӑр вәнӆтыйӆӆӑт. Интӑм ма хӑншӆум, хутыса щи вєр Ямал мўвн мӑнӆ. Щи оӆӑӊӑн ма уша павӑтсум Ямал мўвн Пуровской район Харампур кәрт ӑшкола кәща нє Людмила Казымкина эвӑӆт.  

Щи районӑн вәӆты шуши ёх вўӆэт ӆа­вӑӆман вәӆӆӑт. Вән няв­рємӆаӆ Харампур кәртӑн интернатн вәӆӆӑт па вәнӆтыйӆӆӑт. Щи тӑхи 16 оӆ мӑр рәпитӆ, кәща нєӊа щӑта Людмила Вла­димировна Казымкина вәӆ. 

Мєт ай няврємӑт юрн хотӑтн вәнӆтыйӆӆӑт. Щӑта няврємӑт хӑтӆ мӑр тӑйты хот кана кочевой группайт вєрсыйт. Щитӑт нӛрумн вўӆы ӆавӑӆты ёх вәӆты юрн хотӑт хуща вәӆӆӑт. Интӑм щӑта ӆапӑт щимӑщ группа рәпитӆ. 

Щӑта няврємӑт тӑм йис щирн вәнӆтӑӆыйт. Мосты киникайт, юнтутӑт, тӑм йис щўӊкӑт, камн юнтты хӑрӑт – иса щӑта вәӆ. Пушхиет ӑӊкет-ащет пиӆа вәӆӆӑт па ӑшколая па тӑм йис вәӆупсыя ӆэщӑтты щир тăйӆăт. 

- Мўӊ щит вєрӆўв, ӆәӆн няврємӑт тӑм йис вәӆупсыя хўщты, ӆәӆн ӆыв хўвшӑк нӛрумн ат вәсӑт па рәт ясӑӊ аӆ рємӑсӑт, – лупӑс Людмила Владимировна.

Юрн хотӑтн вәнӆтыйӆты няврємӑт ӑнтә тәп юнтӆӑт, ӆыв вўӆы ӆавӑӆты, вой па хўӆ веӆпӑсӆӑты вєрӑт уша павӑтӆӑт. Ӆыв рәт мўвеӆ йис вєрӑт оӆӑӊӑн уша вєрӆӑт, юрн ясӑӊ па литература вәнӆтӑӆӑт. Эвет юрн хотн вәӆты вєрӑта, ӆєтутӑт кавӑртты, ёнтты па па шўкщӑты вє­рӑта вәнӆтӑӆыйт. Ӑӊкет-ащет пӑта «Мўӊ иха» тӑхи рәпитӆ, щӑта ӆыв арсыр мосты вєрӑт оӆӑӊӑн уша павӑтты щир тӑйӆӑт. Щӑта кашӑӊ хӑннєхә мосты вєрӑтн нётӆы.
Няврємӑт ӑшколайн вәнӆтыйӆты етшуптумаӆ пийн еӆӆы районной профессиональной кол­лед­жӑн вәнӆтыйӆӆӑт, щ­ӑта ӆыв арсыр мосты рәпа­тайт уша вєрӆӑт. 
Мосӆ лупты, Увӑс мўвн вәӆты няврємӑт пӑта ӑшколайн ӑнтә тәп мосты урокӑт вєрӆыйт, ӆыв рәт мир па рәт мўв йис вєрӑт, йис вәӆупсы уша павӑтӆӑт.

Людмила Казымкина путӑртӑс, хутыса щи вєр әхтыйн ӆўв рәпитты оӆ­ӊитӑс:

- Оӆӑӊмит кочевой группа ма 2012-мит оӆн пўншсум, нӆхущъяӊ оӆ мӑнӑс, интӑм ӆапӑт щимӑщ группа рәпитӆ. Тӑта ин ай пушхиет пӑта группайт вәӆӆӑт, хута ӆыв ӑшколая ӆэщӑтӆыйт. Щи тумпи начальной ӑшкола па основной ӑшкола щирн няврємӑт вәнӆтӑӆыйт. Мўӊ колледж кәща ёх пиӆа иха рәпитӆўв, щирн ӑшкола етшуптумаӆ пийн няврємӑт имухты колледжа вўӆыйт па еӆ­ӆы вәнӆтыйӆӆӑт. Щӑта вәнӆтыйӆты пурайн мўӊ няврємӑт пиӆа еӆӆы рә­питӆўв па мосты вєрӑтн ӆывеӆа нётӆўв. Ма юрн имия вәӆӆум, ищи юрн хотн єнумсум, щирн щи вє­рӑт ма вәӆєм. Ӆӑӊхаӆум, ӆәӆн рәт ясӊев еӆӆы вәс, ӆәӆн няврємӑт ӑӊкиӆаӆ-ащиӆаӆ пиӆа юрн ясӑӊӑн ат путӑртсӑт, ӆәӆн мўӊ ми­рев йис вәӆупсы ӑӆ вәт­шӑсы.

Әмӑщ вәс уша вєрты, хуты Ямал мўвн вәӆты юрн ёх щиты няврємӑт вәнӆтӑӆӑт. Щи тӑхийн рә­питты няврємӑт вәнӆ­тӑ­ты хуятӑта па няврємӑта мӑӊхӑтӆ пӑта мўӊ м вўща ясӊӑт лупӆўв, тӑ­ӆаӊа ат вәӆӆӑт, ма ат вәнӆтыйӆӆӑт!

Путӑр хӑншӑс: 
Надежда Рагимова