Анатолий Ермаков хотӑӊ ёхӆаӆ вәнт кәртӑн вәӆӆӑт. Ӆыв вәӆупсэӆ йисн вәӆум ёхӆаӆ щирн мӑнӆ, веӆпӑсӆуман вәӆӆӑт, вўӆы тӑйман вәӆӆӑт.

Ащеӆ – Иван Ермаков – сәрханӆ хӑнты, ӆўв йис ёхӆаӆ иты вўӆы тӑйты хә, вой-хўӆ ёша павӑтты хә. Ӆўв йис вәӆупсы вєра вана тӑйӆӑӆэ, Ная-Вәрта пойкщуман вәӆ. 
Ӑӊкеӆ – Елена Ермакова – касум хӑнты, иса пўш мира нётман вәӆ, хӑнты вєрӑт вана тӑйӆӑӆэ, хӑнты арӑт хӑншӑӆ па арийӆ, арӑӊ путрӑт хӑншӑӆ.
Тӑмӑщ хотн єнмум няврєм хӑнты вәӆупсы пєӆа сӑмӑӊ, хӑнты ясӑӊ пєӆа сӑмӑӊ.
Ермаковӊӑн нӆ няврєм тӑй­ӆӑӊӑн. Хәӆум эви Валерия, Анна, Анастасия па Анатолий атэӆт пух. Упеӊӑӆ рәпитӆӑӊӑн, апӑлнєӊӑӆ ӑш­колая ӊхӑӆ. Няврємӑт вәнт кәртэӆ сӑмӑӊа тӑйӆэӆ, рәпитӆӑт муй па вәнӆтыйӆӆӑт, иса пўш вәнт кәрта юхтыйӆӆӑт. 
Анатолий айтєӆн вәнт вәӆупсы ма вәӆӆэ. Ая вәӆум вєрӆаӆ – щит иса пўш вәнт кәрт, хўӆ веӆты пищӑт, вўӆєӊ әхӆӑт, хотӑӊ ёхӆаӆ пиӆа воньщумут ӑкӑтты вєр.

- Ма сєма питсум вуӆєӊ хотӑӊ ёх хуща. Ма ая вәӆум вєрӆам ма нәмӆӑӆам. Хәӆум муй нӆ оӆ кємн снегоходӑн ӊхум вєрєм нәмӆум, вет оӆн тӑӆ пурайн ащєм пиӆа хўӆа ӊхум вєрєм нәмӆум. Айӆат хәя йиты питмємн атэӆт вуӆєӊ әхӑӆн мӑнмємн ха хойсум па кўӆ ӆонь­ща иӆ шойӆӑсум. Хотӑӊ ёхӆам пиӆа воньщумут ӑкӑтты вєрӑт ищи ма нәмӆум, – Анатолий путӑртӑӆ. 

Ермаковӑт кәрт Когалым вош хонӑӊӑн вәӆ. Йис ёх вәӆупсы щи хотӑӊ няврємӑта – щит айтєӆн кашӑӊ хӑтӆ вәӆты вєр. Вәнт кәртӑн Анатолий ёхӆаӆа нётӆ: вўӆэт пиӆа ешащӆ, хўӆа ӊхӑӆ. Хән мосты вєрӑт етшӑӆӑт, щирн нюхрантты омӑсӆ. Щӑӆта па муӆты ӆєты лыптӑт єнмӑӆтӑӆ – кӑт парник тӑйӆ. Ӆўвеӆа вєра әмӑщ история, мифология, фи­лософия, электроника вєрӑт уша вєрты. Литература мєт ма тӑйӆӑӆэ – ӆўв арӑӊ путрӑт па аӆ путрӑт хӑн­шӑӆ. Ӆўв ясӊӑӆн, ӆўв тәп тӑм ванӑн хӑншты оӆӊитум хә. 
Ӆўв хӑншум арӑӊ путрӑт газетайт хуща вәӆӆӑт, щит «Когалымский вестник» па «Вестник Ассамблеи представителей коренных мало­численных народов Югры Думы Югры». Тӑм айӆат хәя газетайтăн хӑншум арӑӊ путӑр – щит амтупсы рўв. 

- Ма тӑм ванӑн хӑншты оӆӊитум хә, «Когалымский вестник» пиӆа вана вәӆӆум. Мӑнєма әмӑщ щи газета пиӆа рәпитты па ма хӑншум путӑрӆам щата ӆўӊӑтты. Когалым вошӑӊ миревн ма иса пўш вана тӑйӆаюм, – путӑртӑӆ Анатолий. 

Шуши мир ассамблея нєпек хуща тӑм айӆат пух хӑншум арӑӊ путрӑт «Проба пера» рубрика хуща хӑншсайт. Литература ӛш хўват, ӆўв лупум ясӊӑӆн, тәп оӆӑӊ сәхмӑт вєрӆ.
Анатолий арсыр вәйтантупсэта ӊхӑӆ, мӑта тӑхетн увӑс мир ӑктӑ­щийӆӆӑт. 
Мєт оӆӑӊ пўш Касум воша ӊ­хӑс, щӑӆта Мегион вошн «Хатӆые» фестиваль хуща па ар тӑхетн Ём­вошн, Русскинской вошн па Ко­га­лым хуща вәс.
Ӆўвеӆа мєт әмӑщ музейт па библиотека хотӑтн ӑктӑщийӆты. Ӆўв ясӊӑӆн, щӑта и нумӑсн вәӆты шимӑӆшӑк мир вәӆ, щӑта мирев и хотӑӊ ёх иты ӑктӑщийӆӆӑт. Мєт әмӑщ ӆўвеӆа Русскинской вош музей хуща вәс.
Ӆўв вєра ӆӑӊхӑӆ рәт ясӑӊӑн арӑӊ путрӑт хӑншты. Щит пӑта ин хӑнты ясӑӊ ма вәнӆтӑӆ. Ӆўв щирӑӆн, ясӑӊ вәнӆтӑты тӑхет няврємӑта па айӆат ёха вєра мосӆӑт. 

- Хӑнты ясӑӊ ӑшколайтăн па пред­метӑт иты вәнӆтӑты мосӆ. Ин ма хӑнты ясӑӊ вәнӆтӑӆум, ӛхӑт нумӑс тӑйӆум тӑм ясӑӊӑн арӑӊ путрӑт хӑншты, –  Анатолий путӑртӑӆ.

Ӆўв хӑнты мирев еӆӆы вәӆты вәӆупсы оӆӑӊӑн ищи нәмӑсӆ. Ӆўв щирӑӆн, вўӆы тӑйты вєрӑт, хўӆ веӆпӑсӆӑты вєрӑт па вәнт вәӆупсы еӆӆы тәты вєра мосӆ. Щирн тәп хӑнтэт хӑнтыя хӑтьӆӑт, вәнт вәӆуп­сы ки хӑтьӆ. 
Тӑм айӆат пух еӆӆы вәӆты ар ну­мӑс тайӆ. Хотӑӊ ёхӆаӆ пӑта сборник вєрты вўтьщӑӆ, путрӑт хӑншты, некоммерческой организация вєр­ты. Ӆўв Тюменской колледжа вәнӆ­тыйӆты мӑнты нәмӑсӆ, финно-угорской хӑншты ёх ӑктупсыя ӊхты. 
Анатолий Ермаков вәӆупсы и щирн – щит ащеӆн-ӑӊкеӆн кат­ӆуптум йис щир вәӆупсы вєрӑт. Кимӑт щирн, ӆўв тӑмхӑтӆ вәӆупсыйн вәӆты пух. Ӆўвеӆа әмӑщ мўвтєӆ вәӆупсы вєрӑт уша вєрты, щит ли­тература, техника па арсыр вєрӑт. Тӑм йис вәӆупсы вєрӑтн вәӆман тӑм пух ищимурт рәт мўвие, йиӊкие сӑм ӆыпийн така тӑйӆӑӆэ. Тӑмиты вәӆты айӆат ёхӆўв, мӑтта хуятӑт йиӆуп вәӆупсы пєӆа каш тӑйӆӑт па йис ёхӆаӆ вєрӑтн, нумсӑтн тэкумман вәӆӆӑт, ӆыв и щирн хӑнтыя хӑтьӆӑт, кимӑт щирн па ӆывеӆа мәстум ӛш хўват еӆӆы шәшумӆӑт.

Путӑр хӑншӑс: Пётр Молданов