Щиты Тэк кәртӑӊ ӑшколайн няврємӑт хӑнты ясӑӊа па рәт литературая вәнӆтӑты нє Олеся Вячеславовна Хандыбина ястӑс. Ӆўв ар оӆ щи рәпата тәӆ, Тэкн сєма питӑс, щӑта єнмӑс, Ёмвошн вән нєпекӑӊа вмаӆн шив кєрӆӑс. 

Тӑм ванӑн щи кәрта ӊхмємн ма ӆўв пи­ӆэӆа вәйтантыйӆсум. Ӆўв ай тәс, муй щирн интӑм рәт ясӑӊа вәнӆтӑты вєр ӆэщӑтман вәӆ:

- Вантэ, тӑм йисн юӆн рәт ясӑӊ ӑн сащӆ, ӑӊкет-ащет няврємӆаӆ пиӆа рәт щирн ӑн путӑртӆӑт, щирн эвет-пухӑт хӑнты ясӑӊ ӑн тӑйӆӑт. Мўӊ, няврємӑт вәнӆтӑты ёх, йиӆуп щирн рәпатаев ӆэщӑтӆэв. Ин­терактивной сохӑӆ хуща әмӑщ урокӑт тәӆўв. Щи тумпи арсыр кӑсупсэт ӆэ­щӑтӆўв, итәх утӑт ӑӊкет-ащет пиӆа вєрӆўв. Щиты округев сєма питум хӑтӆ постӑты щира «Рәт ясӑӊ, литература па мўвев оӆӑ­ӊӑн урокӑт ӆапӑт» ӆэ­щӑтсўв. Щи ӆапӑт хӑтӆ мӑр ӑшколаевн арсыр станцияйт рәпитсӑт, щит «Хўӆӑт», «Тови», «Вурӊа хӑтӆ» мӑӊхӑтӆ, «Щол» па «Кусы» юнтутӊӑн, «Арӑт», «Ясӑӊ кӑр» – няврємӑта нєпек мӑсўв, щӑта и ясӑӊ рўщ ясӑӊан хӑншман вәс, мосӑс хӑнты ясӑӊӑн хӑншты. Щи тумпи хӑнты юнт «Щол», рәт ясӑӊӑн арӑт ариты па ай путрӑт хӑншты мосӑс. Щи тухаӆпи няврємӑт амамӑтщет уша вєрсӑт. Кашӑӊ тўӊ ясӑӊ пӑта и балл мӑсы. 
Щи хӑтӆӑтн мўӊ ӑшко­лаева кәртӑӊ вәна вум ёх мойӊа юхтыйӆ­сӑт па няврємӑта ӆыв вәӆупсэӆ, рәпатайӆаӆ оӆӑӊӑн пу­тӑртсӑт. 
Щи тумпи арсыр хӑнты пурмӑсӑт вєрты хӑрӑт рәпитсӑт, вєрӑнтты ёх няв­рємӑт арсыр мосты пур­мӑсӑт вєрты вәнӆтӑсӑт. 
Юхи хӑщум хӑтӆӑн етн­хот вєрсўв, хӑнты ясӑ­ӊӑн арӑт арисўв па якӑт яксўв. 
Тӑм оӆ вән кєр тыӆӑщ 30-мит хӑтӆӑн веӆщи Рос­сия мўвев шуши мир хӑтӆ постӑсўв. Щи хӑтӆ мӑр «Хӑнты ёх» (ай няврємӑт), «Каркам ёх» (вән классӑтн вәнӆтыйӆты няврємӑт), «Вән ёх» (вәнӆтӑты ёх) па «Тэк ёх» (кәртӑӊ ёх) ко­мандайт кўтэӆн нумсӑӊ кӑсупсэтн кӑссӑт. Оӆӑӊ­мит тӑхия «Тэк ёх», кимит тӑхия – «Каркам ёх», хәӆ­мит тӑхия – «Хӑнты ёх» па нӆмит тӑхия «Вән ёх» питсӑт.
Кашӑӊ оӆ рәт ясӑӊ хўват олимпиадайн кăсӆўв, тӑм оӆн Сўмӑтвош район кӑ­супсыйн кăссўв. Тӑм оӆн 9 классӑн тәп кӑт эви вәс, вантэ, и эви нє­масыя программайн вәнӆ­тыӆӑс, щирн округ кӑ­супсыя вохты нєпек ӑн кит­сўв. 

Олеся Вячеславовна ястӑс, м арат оӆ юхӆы «Ас нє» нємпи ариты тӑ­хи кәща нє Анастасия Алек­сеевна Новьюхова «Ай Ас ёх» нємпи няврємӑт ариты-якты тӑхи ӆўвеӆа еӆӆы тәты партӑс.

- Вантэ, Анастасия Алексеевна Новьюхова ин рўтьщуман вәӆ, щирн ӆўвеӆа ӆавӑрт ипўӆяӊ кӑт тӑхи тәты, щирн «Ай Ас ёх» нємпи ариты-якты няврємӑӊ тӑхи мӑнєма еӆӆы тәты партӑс. Мўӊ ӑш­колаевн етн эвет-пухӑт пиӆа ӑктӑщӆўв, хӑнты ясӑӊӑн арӑт ариты па якӑт якты вәнӆтыйӆӆўв, щи тумпи моньщӑт хўват спектаклят ӆэщӑтӆўв. 9-мит класс етшуптум эвет еӆӆы колледжӑта вәнӆ­тыйӆты мӑнӆӑт, щирн ай классӑт эвӑӆт няврє­мӑт вў­ӆум. Ай эвета-пухӑта шєӊк әмӑщ рәт ясӑӊӑн ариты па якӑт якты. Интӑм «Ухшамӑӊ як» вәнӆтӑ­ӆўв. Мўӊ, вантэ, ром Ай Ас хонӑӊӑн вәӆӆўв, щирн мўӊ хущева якӑт рома якӆӑт, «Куренька» як ищи айӆтыева якӆўв. 

Тэк кәртӑн вәӆмємн няврємӑт мӑнєма етнхот альсӑт, мӑнєма шєӊк мәс­тӑс, вәнӆтӑты ёха па няв­рємӑта вән пәмащипа ястӑӆум. 
Ма Олеся Вячеславовна эвӑӆт иньщӑссум, интӑм мўӊ редакцияевн ӆэщӑ­тум хӑнты мир поэтесса ӆўӊтарăт ӆўӊӑтты кӑ­супсыя ӆэщӑтӆӑт муй ӑн­тә? Юхӆы ӆўв лупӑс, айӆ­тыева ӆэщӑтӆӑт, ин ӆўв няврємӑт пиӆа стихӑт вантӆӑт па пириӆӑт, мӑта утӑт камера еӆпийн тәса ӆўӊӑтты питӆӑт.
Еӆӆы О.В. Хандыбина лупӑс, интӑм Санкт-Пе­тер­бург вошн Рос­сийс­кой государст­вен­ной пе­дагогической уни­вер­ситет хуща вәӆты Увӑс мир институтн Тэк кәртӑӊ ӑшкола етшуптум нӆ эви, щит Ксения Курганова, Анна Нахрачёва, Верони­ка Броваренко па Юлия Гудкова вәнӆтыйӆӆӑт, мо­сӑӊ, хуйтӑт ӆыв эвӑӆтэӆа кєрӆӑӆӑт па тӑта рәпитты питӆӑт. Интӑм ӆыв Тэк кәр­та практика тәты щира юхтыйӆӆӑт. Еӆӆы Олеся Вячеславовна лупӆ:

- Тӑм товийн кӑтӊӑн Аня Вениаминова па Дина Яврова няврємӑт вәнӆтӑты нєӊев Елена Леонтьевна Новьюхова пиӆа Москва хон воша «Сокровища Се­вера» фестиваля ӊхсӑт. Еӆӆы Санкт-Петербург воша мӑнсӑт па Увӑс мир институтн вәсӑт. Щӑ­та мўӊ кәртэв эвет пи­ӆа вәйтантыйӆсӑт. Юхи юхӑтсӑт па эвеӊӑн луп­ӆӑӊӑн, ищи ӑшкола пийн щӑта вәнӆтыйӆты ӆӑӊ­хаӆӊӑн.

Путӑр хӑншӑс: 
Людмила Гурьева